Meki a pisi ten fu a Memrefesa disi gi yu furu prisiri!
1. San wi kan du fu abi moro prisiri na ini a pisi ten fu a Memrefesa?
1 Yu ben o wani abi moro prisiri na ini maart, april nanga mei? Wán fasi fa yu kan du dati na fu du moro na ini yu diniwroko, kande fu di yu o du a yepi-pionierwroko. Fa disi o meki yu de nanga prisiri?
2. Te wi o du moro na ini a diniwroko, dan fa dati o yepi wi fu abi moro prisiri?
2 Fa wi kan abi moro prisiri: Yehovah meki wi na so wan fasi taki wi man abi prisiri, èn fu di wi alamala abi a firi fu anbegi en meki wi o de koloku te wi e du dati (Mat. 5:3). A meki wi na so wan fasi taki wi kan de koloku te wi e gi trawan sani (Tori 20:35). A diniwroko e gi wi na okasi fu du den tu sani disi. A e yepi wi fu anbegi Gado èn fu yepi trawan. A no de fu taki dati te wi e du moro na ini a diniwroko, dan wi o abi moro prisiri. Boiti dati, o moro wi e preiki, o moro wi o man du a preikiwroko bun. Te wi sabi fa fu du wi preikiwroko bun, dan wi o abi moro deki-ati èn wi no o senwe so furu moro. Wi o abi moro okasi fu preiki èn fu bigin Bijbelstudie. Ala den sani disi o meki taki wi o abi moro prisiri na ini a diniwroko.
3. Fu san ede den mun maart nanga april na bun mun fu go na ini a yepi-pionierwroko?
3 Den mun maart nanga april bun fu go na ini a yepi-pionierwroko, fu di wi kan wroko 30 noso 50 yuru. Tapu satra 22 maart te go miti a Memrefesa tapu munde 14 april wi o man gi sma wan kari fu kon na a Memrefesa èn dati o gi wi furu prisiri. Den gemeente o abi furu fu du te den o wroko makandra „leki wán man” fu gi furu sma na ini a kontren wan kari na ini a pisi ten dati.—Sef. 3:9.
4. Efu wi wani go na ini a yepi-pionierwroko, dan san wi musu du?
4 Sreka now: Efu yu no sreka nowan sani ete, dan luku yu schema èn luku sortu kenki yu kan tyari kon fu man du moro na ini wán noso moro mun. Begi Yehovah fu a tori (Yak. 1:5). Taki nanga yu osofamiri èn nanga trawan fu yu gemeente (Odo 15:22). Kande yu no abi wan bun gosontu noso yu e du grontapuwroko ala dei. Ma toku yusrefi o man go na ini a yepi-pionierwroko èn yu o si taki a e gi furu prisiri.
5. San o de a bakapisi te wi o du moro na ini a diniwroko na ini a pisi ten fu a Memrefesa?
5 Yehovah wani taki den futuboi fu en abi prisiri (Ps. 32:11). Te wi e du muiti fu du moro na ini wi diniwroko na a ten fu a Memrefesa, dan a no wi wawan o abi prisiri, ma sosrefi wi hemel Tata.—Odo 23:24; 27:11.