Ondrofenitori fu a Jaarboek 2013
’Wi ben o man taki nanga en?’
Wan kring-opziener na ini Etiopia ben preiki oso fu oso nanga wan tra brada. Na wan oso den miti wan uma di ben e krin na oso èn den aksi en efu den kan taki nanga a man di abi na oso. Di na uma taigi den taki dati no ben o man, dan den aksi en efu den kan libi wan tu tijdschrift gi a man. Na uma go aksi a man èn di a kon baka a taigi den brada taki a man wani si den tijdschrift fosi.
Den brada gi na uma den tijdschrift fu sori a man. Baka wan tu miniti, na uma kon baka èn a taigi den brada taki a man wani leisi den tijdschrift. Dan wan fu den brada taki: „Efu a no man kon na wi, dan wi kan kon na inisei fu taki nanga en?” Na uma go aksi a man baka. Disi leisi na uma tan moro langa na inisei, èn den brada ben aksi densrefi efu na uma ben o kon baka. Ma te fu kaba na uma kon èn a kari den kon na inisei. Den brada kon si taki Yirgu ben de wan owru man di ben siki èn ben e didon na bedi sowan tin yari langa kaba, fu di a no ben man opo fu en bedi noso sidon srefi. Na uma di ben krin na oso ben tan langa na inisei fu di a ben musu yepi a man fu weri en krosi èn a ben musu krin a kamra.
Den brada fruteri a man a bun nyunsu. Yirgu ben prisiri nanga den sani di a yere èn a ben wani studeri Bijbel. O moro a ben e studeri, o moro a ben kon betre. Baka wan pisi ten, a ben man komoto fu en bedi èn ben man sidon na ini wan rolsturu. Syatu baka dati, a bigin go na den konmakandra èn a dopu na wan distrikt kongres no langa pasa.
Fu di den ben sori mi switifasi, meki mi ben wani tron wan Kotoigi
ZAW BAWM
A GEBORE NA INI 1954
A DOPU NA INI 1998
A LIBI FU EN: A ben e seri drugs èn a ben e gens a tru anbegi. Ma fu di Kotoigi sori en switifasi, meki dati naki en ati.
◆ Di mi wefi Lu Mai bigin studeri nanga Yehovah Kotoigi, mi ben gens en fayafaya. Mi ben trowe den buku fu en na ini a toilet èn mi ben yagi den Kotoigi gowe.
Bakaten mi bigin seri drugs èn dati meki mi ben go na strafu-oso. A dei baka di den sroto mi, dan mi wefi Lu Mai seni wan Bijbel gi mi èn sosrefi wan brifi nanga Bijbeltekst na ini di gi mi deki-ati. A seni tra brifi gi mi tu di ben e taki fu Bijbel èn di ben gi mi furu deki-ati. Heri esi mi ben si taki efu mi ben du san Bijbel ben e taki, dan mi no ben o de na strafu-oso.
Di mi ben de na strafu, dan tu sma ben kon luku mi aladi mi no ben fruwakti dati. Den man disi di ben de Yehovah Kotoigi ben taigi mi taki na mi wefi aksi den fu kon luku mi èn fu gi mi deki-ati. A teki den tu dei fu man doro mi. Mi ben de nanga tangi trutru taki den ben kon luku mi. Nowan fu den furu famiri fu mi ben kon luku mi, ma soso den sma di mi ben gens fayafaya ben kon.
No langa na baka, mi kisi a siki tyfus èn mi ben musu didon na ati-oso. Ma mi no ben abi moni fu pai datra. Na a ten dati, wan tra Kotoigi di mi wefi ben seni, ben kon luku mi. Fu di a ben sari mi meki a ben pai datra gi mi. Mi ben kon si taki mi no ben libi bun nanga den Kotoigi, èn mi pramisi fu tron wan Kotoigi fu Yehovah. Feifi yari baka dati, di mi komoto na strafu-oso, mi tron wan Kotoigi leki fa mi ben pramisi.