Wi abi na okasi fu du moro na a ten fu a Memrefesa
1. Sortu reide wi abi fu du moro na ini a diniwroko na ini maart, april, nanga mei?
1 Yu kan du moro na ini a diniwroko na a ten fu a Memrefesa? Son preikiman o abi fakansi fu den wroko noso fu skoro, èn den kan gebroiki a ten dati fu du a preikiwroko. Bigin fu 2 april, wi o abi wan spesrutu kotoigiwroko fu gi sma wan kari fu kon makandra nanga wi na a Memrefesa tapu 17 april. Baka dati, wi o du muiti fu go baka na den sma di ben kon na a Memrefesa èn wi o gi den wan kari fu kon na a spesrutu lezing di o hori na ini a wiki fu 25 april. Iya, wi abi furu reide fu du moro na ini a diniwroko na ini maart, april, nanga mei.
2. San na wan moi fasi fa wi kan du moro na ini wi diniwroko?
2 A yepi-pionierwroko: Wan moi fasi fa wi kan du moro, na te wi o go na ini a yepi-pionierwroko. Fu di wi alamala abi furu fu du, meki wi musu seti sani na fesi èn kenki wan tu sani na ini wi schema (Odo 21:5). Kande wan tu sani de di yu gwenti du, ma di yu kan skoifi go na wan tra ten (Fil. 1:9-11). Fu san ede yu no e taigi trawan na ini a gemeente taki yu wani pionier? Kande dati o meki taki den wani du a yepi-pionierwroko tu.
3. Fa osofamiri kan seti sani fu du moro?
3 A tra leisi te yu o hori na Osofamiri Anbegi, a ben o bun fu taki leki osofamiri fu den marki di unu kan poti (Odo 15:22). Te ala sma na ini na osofamiri e wroko makandra, dan kande wan tu sma na ini na osofamiri kan du a yepi-pionierwroko wán, noso moro mun. Ma san yu kan du te dati no kan? Na osofamiri kan seti sani fu du moro na ini a preikiwroko, fu di unu e preiki tapu son mofoneti noso fu di unu e preiki moro langa tapu satra nanga sonde.
4. Sortu blesi wi o kisi te wi e du moro na ini a diniwroko na a ten fu a Memrefesa?
4 Yehovah e si ala den sani di wi e du fu dini en èn a e warderi a muiti di wi du (Hebr. 6:10). Wi o kisi prisiri te wi e gi sani na Yehovah èn na trawan (1 Kron. 29:9; Tori. 20:35). Yu kan du moro na a ten fu a Memrefesa so taki yu kisi moro prisiri nanga blesi?