„De nanga faya nanga yepi fu a yeye”
1. Fa wi musu du wi diniwroko?
1 Nowan pisi fu wi Kresten diniwroko musu tron wan hebi gi wi. Na presi fu dati, wi e kisi a deki-ati fu „de nanga faya nanga yepi fu a yeye”, èn fu „dini Yehovah leki srafu” (Rom. 12:11). Ma furu sani de di kan meki taki a faya di wi abi na ini a diniwroko, e kon kowru. Fa wi kan du wi Kownukondre diniwroko „nanga moro faya”?—2 Tim. 1:6, 7.
2. Fu san ede wi musu studeri Bijbel fu man du wi diniwroko fayafaya?
2 Studeri Bijbel: Wan fayafaya Kownukondre preikiman lobi den wet fu Gado, èn den tru tori di de na ini Bijbel, abi furu krakti na en tapu (Ps. 119:97). Te wi e studeri Bijbel, èn e kon sabi den tru tori na ini, dan dati e naki wi ati èn a e meki taki wi de nanga moro faya. A lobi di wi abi gi a Sma di leri wi den tru tori disi, èn na angri di wi abi fu fruteri trawan a bun nyunsu, e meki taki wi e preise Gado èn meki en nen bekènti na trawan (Hebr. 13:15). A de krin taki te wi e du furu muiti fu fruteri trawan a bun nyunsu, dan wi e sori taki wi abi furu warderi gi a boskopu disi.
3. Fa a yeye fu Gado kan yepi wi na ini wi diniwroko?
3 Begi Gado fu gi yu en yeye: Nanga wi eigi krakti, wi no o man du a diniwroko na wan bun fasi. Wi o man de nanga trutru faya, te wi e kisi a yeye fu Gado (1 Petr. 4:11). Te wi e kon moro krosibei na a Sma di „abi bigi krakti pasa marki”, dan dati o gi wi a krakti fu gi kotoigi sondro frede (Yes. 40:26, 29-31). Di na apostel Paulus ben kisi gens na ini en diniwroko, dan ’Gado yepi en’ (Tori. 26:21, 22). Yehovah en santa yeye kan yepi wi fu de fayafaya na ini wi diniwroko. Sobun, wi musu begi Gado fu gi wi en santa yeye.—Luk. 11:9-13.
4. Sortu bun bakapisi a abi te wi de nanga faya, ma nanga san wi musu luku bun?
4 Te wi de fayafaya na ini a Kownukondre preikiwroko, dan nofo tron a sani dati e gi tra brada nanga sisa deki-ati fu de fayafaya tu (2 Kor. 9:2). Den sma na ini a kontren pe wi e preiki sa de moro gaw fu arki a boskopu fu wi, te wi de fayafaya èn te wi e taki nanga overtoigi. Ma awinsi wi de fayafaya, ala ten wi musu taki nanga koni èn wi musu abi safri-ati fasi (Tit. 3:2). Ala ten wi musu suku fu taki na wan lespeki fasi nanga na ososma èn wi musu hori na prakseri taki a abi a reti fu teki en eigi bosroiti.
5. Sortu Bijbel rai wi musu du muiti fu fiti?
5 Ala ten, wi leki Kownukondre preikiman musu „de nanga faya nanga yepi fu a yeye”. Meki a de so taki wi e kon de nanga faya fu di wi e studeri Bijbel èn e begi Yehovah fayafaya, bika en na a sma di kan gi wi santa yeye. Na so fasi wi o du wi diniwroko fayafaya „nanga yepi fu a krakti fu santa yeye èn sosrefi nanga tranga bribi”.—1 Tes. 1:5.