Meki sma kon sabi a nen fu Gado
1. Fa sma kan feni en te den e leri sabi a nen fu Gado?
1 Fa yu ben feni en di yu kon leri sabi a nen fu Gado a fosi leisi? Furu sma ben firi a srefi fasi leki wan uma di ben taki: „Di mi si a nen fu Gado a fosi leisi na ini a Bijbel, mi krei. A naki mi ati trutru di mi kon sabi a nen fu Gado èn di mi kon sabi sosrefi taki mi ben kan gebroiki en nen.” Gi en, a nen fu Gado, ben de wan prenspari sani fu kon sabi Yehovah leki wan trutru sma èn fu man kweki wan bun banti nanga en.
2. Fu san ede a de tumusi prenspari taki wi leri trawan fu Yehovah?
2 Fu san ede wi musu meki sma kon sabi a nen? A nen fu Gado abi fu du nanga den fasi fu en, nanga den prakseri fu en èn nanga a fasi fa a e handri. A abi fu du sosrefi nanga frulusu. Na apostel Paulus ben skrifi „Ala sma di e kari a nen fu Yehovah, o kisi frulusu”. Paulus ben taki „fa den o kari en”, efu den no leri fu en fosi èn efu den no sori bribi na ini en? Fu dati ede, a de tumusi prenspari taki Kresten e leri tra sma a nen fu Gado èn taki den e leri den tu san a nen wani taki (Rom. 10:13, 14). Ma wan moro prenspari reide de fu san ede sma musu kon leri sabi a nen fu Gado.
3. San na a moro prenspari reide di wi abi fu preiki?
3 Na ini den yari baka 1920 a pipel fu Gado ben kon leri fu a strei di abi fu du nanga a reti di Gado abi fu tiri libisma èn sosrefi fu a nen fu en di musu kon santa baka. Den ben kon leri den sani disi nanga yepi fu Bijbel. Bifo Yehovah pori den godelowsuwan di gi en porinen,’sma na heri grontapu musu kon sabi’ a waarheid di abi fu du nanga en (Yes. 12:4, 5; Esek. 38:23). Fu dati ede, a moro prenspari reide di wi abi fu preiki, na fu prèise Yehovah na publiki èn fu santa en nen na fesi ala sma (Hebr. 13:15). Te wi lobi Gado nanga tra sma, dan wi sa teki prati dorodoro na a wroko di Gado gi wi fu du.
4. Fa Yehovah Kotoigi du kisi a nen fu Gado?
4 „Wan pipel fu tyari en nen”: Na ini 1931 wi teki a nen Yehovah Kotoigi (Yes. 43:10). Sensi a ten dati a pipel fu Gado meki so furu sma kon sabi a nen fu Gado, taki a Verkondigers-buku e taki na tapu bladzijde 124: „Na ala sei fu grontapu a de so, taki te wan sma e gebroiki a nen Yehovah, dan heri-esi tra sma e si en leki wan Yehovah Kotoigi.” Sma sabi yu leki wan Kotoigi fu Yehovah? Te wi de nanga tangi na ati gi a bun-ati fu Yehovah, dan dati musu meki wi ’blesi a nen fu en’, fu di wi e taki fu en na ibri okasi di fiti.—Ps. 20:7; 145:1, 2, 7.
5. Fa a fasi fa wi e tyari wisrefi abi fu du nanga a tyari di wi e tyari a nen fu Gado?
5 Fu di wi na ’wan pipel di musu tyari en nen’, meki wi horibaka gi den markitiki fu en (Tori 15:14; 2 Tim. 2:19). Nofo tron, a fosi sani di sma e si, na a bun fasi fa den Yehovah Kotoigi e tyari densrefi (1 Petr. 2:12). Noiti wi musu pori a nen fu Gado fu di wi e wisiwasi den gronprakseri fu en, noso fu di wi no e si na anbegi fu en leki wan prenspari sani na ini wi libi (Lef. 22:31, 32; Mal. 1:6-8, 12-14). Na presi fu dati, meki wi libi na wan fasi di e sori taki wi e warderi a grani fu tyari a nen fu En.
6. Sortu grani wi kan kisi nownow èn fu têgo?
6 Na ini a ten disi wi e si a kontru fu a fruklari fu Yehovah: „Fu son-opo, iya, te go miti sondongo mi nen sa bigi na mindri den nâsi” (Mal. 1:11). Meki wi tan fruteri sma a waarheid fu Yehovah èn meki wi „blesi a santa nen fu en te ten di no skotu, iya fu têgo.”—Ps. 145:21.