Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • kr kap. 4 blz. 44-54
  • Yehovah meki a nen fu en kisi glori

Felem no de na a pisi disi.

Sorry, wan sani no go bun di wi pruberi fu drai a felem.

  • Yehovah meki a nen fu en kisi glori
  • Gado Kownukondre e tiri!
  • Edeprakseri
  • A srefi sortu tori
  • Fu san ede a nen fu Gado musu kon santa?
  • Gado sreka en pipel fu tyari en nen èn fu gi en nen glori
  • Yehovah teki ’wan pipel di musu tyari en nen’
  • Gado nen e kisi glori na heri grontapu
  • Gi a bigi nen fu Yehovah glori
    A Waktitoren—A e taki fu Yehovah Kownukondre 2013
  • San na Gado nen?
    A Waktitoren—A e taki fu Yehovah Kownukondre (Gi a preikiwroko) 2019
  • Meki sma kon sabi a nen fu Gado
    Wi Kownukondre diniwroko 2003
  • Na moro hé nen di de
    A Waktitoren—A e taki fu Yehovah Kownukondre 1984
Moro sani
Gado Kownukondre e tiri!
kr kap. 4 blz. 44-54

KAPITEL 4

Yehovah meki a nen fu en kisi glori

FU SAN A KAPITEL E TAKI

A pipel fu Gado kon frustan o prenspari a nen fu en de

1, 2. Fa a Nyun-Grontapuvertaling e gi glori na a nen fu Gado?

TAPU tudewroko 2 december 1947 wan pikin grupu salfu brada fu Betel na ini Brooklyn, na New York, bigin nanga wan bigi wroko. A wroko no ben makriki, ma den tan du en 12 yari langa. Te fu kaba, tapu sonde 13 maart 1960, den kaba a lasti pisi fu wan nyun vertaling fu Bijbel. Dri mun baka dati, tapu 18 yuni 1960, Brada Nathan Knorr tyari a lasti pisi kon na doro fu a Nyun-Grontapuvertaling na ini Ingrisitongo. A sani disi pasa na wan kongres di ben hori na ini Manchester, na Ingrisikondre èn ala sma drape ben breiti srefisrefi. Brada Knorr taki nanga wan tranga sten: ’Tide na wan prisiri dei gi ala Yehovah Kotoigi na heri grontapu!’ Na so ala den sma di ben de drape ben e firi tu. A Bijbel disi abi wan spesrutu sani di ben meki den brada nanga sisa prisiri srefisrefi. A ben abi a nen fu Gado na ala den presi pe a ben skrifi fosi.

1) Den e prati a Nyun-Grontapuvertaling fu den Kresten Griki Buku fu Bijbel na ini 1950; 2) Sma na ini Gana e sori sma a Nyun-Grontapuvertaling fu den Kresten Griki Buku fu Bijbel

A Nyun-Grontapuvertaling fu den Kresten Griki Buku fu Bijbel ben kon na doro na ini 1950 na wan kongres (Kruktu-anusei: Yankee Stadion, New York City; reti-anusei: Gana

2 Furu vertaling fu Bijbel no abi a nen fu Gado na ini. Satan no wani taki sma sabi a nen fu Gado. Ma den salfu futuboi fu Yehovah no meki Satan kori den. Na fesisei fu a Nyun-Grontapuvertaling di kon na doro na a kongres dati, ben skrifi: „A moro prenspari sani na ini a Bijbel disi, na taki wi poti a nen fu Gado baka na ini den Bijbeltekst pe a musu de.” Iya, Yehovah, a nen fu Gado, skrifi moro leki 7000 tron na ini a Nyun-Grontapuvertaling. A no de fu taki dati a Bijbel disi gi glori na a nen fu wi hemel Tata, Yehovah!

3. (a) San den brada kon frustan fu a nen fu Gado? (b) Fa wi musu frustan Eksodes 3:13, 14? (Luku a faki di nen „San a nen fu Gado wani taki?”)

3 Fosi, den Bijbel Ondrosukuman ben frustan taki Gado nen wani taki „Mi de di mi de” (Eks. 3:14, King James Version). Dati meki A Waktitoren fu 1 yanuari 1926 ben taki: „A nen Yehovah e sori taki . . . Gado no abi wan bigin nanga wan kaba.” Ma di den brada ben e vertaal a Nyun-Grontapuvertaling, Yehovah yepi en pipel fu frustan taki a nen fu en wani taki moro. A no wani taki nomo dati Yehovah no abi wan bigin nanga wan kaba. Ma san moro prenspari na taki Yehovah na wan Gado di sabi san a wani du èn di e du tu san a taki. Den kon frustan taki a nen fu Yehovah wani taki „A e meki kon tron”. Na en meki ala sma nanga ala sani di de na hemel èn na grontapu. Boiti dati, a e tan du sani fu meki a wani fu en kon tru. Ma fu san ede a de so prenspari taki Gado nen kisi glori? Fa wi kan gi glori na a nen fu Gado?

Fu san ede a nen fu Gado musu kon santa?

4, 5. (a) Te wi e begi Gado fu meki en nen kon santa, dan san disi wani taki? (b) Fa Gado o meki en nen kon santa èn o ten a o du dati?

4 Yehovah wani taki a nen fu en kisi glori. Fu taki en leti, a moro prenspari sani di a o du, na taki a o meki en nen kon santa, sobun a o krin en nen. Na dati e kon na krin te wi e luku a fosi sani di Yesus taki na ini a Wi Tata Begi. A taki: „Meki yu nen de santa” (Mat. 6:9). Te wi e begi Gado fu meki en nen kon santa, dan san disi wani taki?

5 Soleki fa wi leri na ini kapitel 1 fu a buku disi, Yesus aksi dri sani na ini a Wi Tata Begi di abi fu du nanga den sani di Yehovah o du. A fosiwan na: „Meki yu nen de santa.” Den tu trawan na: „Meki yu Kownukondre kon. Meki yu wani pasa” (Mat. 6:10). Boiti taki wi e aksi Yehovah fu meki en Kownukondre kon èn fu meki en wani pasa, wi musu aksi en tu fu meki en nen kon santa. Sobun, wi e aksi Yehovah fu krin en nen, fu di a kisi porinen sensi di Satan, Adam nanga Eva opo densrefi teige en na ini Eden. Fa Yehovah o piki a begi disi? A taki: „Mi o meki a bigi nen fu mi kon santa, bika unu ben pori en di unu ben de na mindri den tra pipel” (Esek. 36:23; 38:23). Te Yehovah o puru ala ogri na ini Armagedon, dan ala sma na hemel nanga grontapu o sabi taki en nen santa.

6. Fa wi kan wroko makandra nanga Gado fu meki en nen kon santa?

6 Na ini ala den yari di pasa, Yehovah gi en futuboi a grani fu wroko makandra nanga en fu meki en nen kon santa. A no de fu taki dati wi no man meki a nen fu Gado kon moro santa, fu di a santa dorodoro kaba. Sobun, san a wani taki dati wi musu meki en nen kon santa? Yesaya taki: „Na Yehovah di e tiri den legre un musu si leki wan santa sma.” Èn Yehovah srefi ben taki fu en pipel: „Den e si mi nen leki wan santa sani . . . èn den o abi bigi lespeki gi a Gado fu Israel” (Yes. 8:13; 29:23). Sobun, wi e meki Gado nen kon santa te wi e si en leki wan aparti nen di bigi moro iniwan tra nen, te wi e lespeki a sma di e tyari a nen, èn te wi e yepi trawan fu si en nen leki wan santa nen. Wan prenspari fasi fa wi kan sori bigi lespeki gi a nen fu Gado, na te wi e si Yehovah leki wi Tiriman èn te wi e gi yesi na en nanga wi heri ati.​—Odo 3:1; Openb. 4:11.

Gado sreka en pipel fu tyari en nen èn fu gi en nen glori

7, 8. (a) Fu san ede Gado no meki en pipel tyari en nen wantewante? (b) San wi o luku now?

7 Sensi den yari baka 1870, den futuboi fu Gado gebroiki Gado nen na ini den buku fu den. Fu eksempre, A Waktitoren fu augustus 1879 èn a singibuku „Singi fu a Trowmisi” di kon na doro na ini a srefi yari, ben abi a nen Yehovah na ini. Ma soleki fa a sori, dan fosi Yehovah meki en pipel tyari a nen fu en, a sorgu taki den ben de warti fu tyari a nen dati. Fa Yehovah sreka den Bijbel Ondrosukuman, so taki den ben kan tyari en nen?

8 Na ini a pisi ten fu 1850 te 1950 Yehovah yepi en pipel fu frustan prenspari sani di abi fu du nanga en nen. Meki wi poti prakseri na dri fu den sani disi.

9, 10. (a) Fu san ede den fosi Waktitoren ben e poti furu prakseri na Yesus? (b) Sortu kenki kon sensi 1919, èn san ben de a bakapisi? (Luku sosrefi a faki di nen „Fa A Waktitoren gi glori na Gado nen”.)

9 A fosi sani, na taki den futuboi fu Yehovah kon frustan o prenspari a nen fu Gado de. Fosi, den reti-ati Bijbel Ondrosukuman ben e si a lusu-paiman leki a moro prenspari leri fu Bijbel. Dati meki A Waktitoren ben poti furu prakseri na Yesus. Fu eksempre, na ini a fosi yari A Waktitoren ben abi a nen Yesus tin tron moro furu leki a nen Yehovah. Ma A Waktitoren fu 15 maart 1976 ben taki dati den Bijbel Ondrosukuman ben e poti „tumusi furu prakseri” na Yesus. Bakaten Yehovah yepi den fu frustan taki Bijbel e sori krin o prenspari a nen fu Gado de. Sortu krakti dati ben abi na tapu den Bijbel Ondrosukuman? A srefi Waktitoren taki dati spesrutu sensi 1919, den Bijbel Ondrosukuman „bigin gi moro grani na Yehovah, a Papa fu a Mesias”. Fu taki en leti, na ini den yari baka 1919 a nen fu Gado ben skrifi na ini A Waktitoren moro leki 6500 tron!

10 Fu di den brada fu wi bigin gebroiki a nen Yehovah moro furu, meki den sori taki den lobi a nen fu Gado. Neleki Moses fu owruten, den meki muiti fu „fruteri ala sma fu Yehovah” (Deut. 32:3; Ps. 34:3). Yehovah si a lobi di den ben abi gi a nen fu en. Dati meki a blesi den, soleki fa a pramisi na ini Bijbel.​—Ps. 119:132; Hebr. 6:10.

11, 12. (a) Sortu kenki kon na ini den buku fu wi syatu baka 1919? (b) San Yehovah ben wani sori den futuboi fu en èn fu san ede?

11 A di fu tu sani, na taki tru Kresten kon frustan krin san na a wroko di Gado gi den. Syatu baka 1919 den salfu brada di ben e teki fesi, ondrosuku a buku fu a profeiti Yesaya. Baka dati den buku fu wi bigin poti moro prakseri na a preikiwroko. Fu san ede wi kan taki dati a kenki dati ben de „nyanyan na a reti ten”?​—Mat. 24:45.

12 Fosi 1919 noiti A Waktitoren ben taki finifini fu den wortu fu Yesaya: „’Unu na mi kotoigi’, na so Yehovah taki. ’Unu na den wan di mi teki leki mi futuboi.’” (Leisi Yesaya 43:10-12.) Ma syatu baka 1919 den buku fu wi bigin poti prakseri na a Bijbeltekst dati. Ala salfu brada nanga sisa ben e kisi a deki-ati fu du a wroko di Yehovah gi den fu du. Sobun, den ben musu fruteri sma fu Yehovah. Fu taki en krin, fu 1925 te go miti 1931, den brada taki fu Yesaya kapitel 43 na ini 57 difrenti Waktitoren. Ibriwan fu den Waktitoren dati ben e sori taki den wortu fu Yesaya abi fu du nanga tru Kresten. A de krin taki na ini den yari dati, Yehovah ben e yepi den futuboi fu en fu frustan sortu wroko den ben musu du. Fu san ede wi kan taki dati? Te yu luku en bun, dan Yehovah ben e ’luku fosi efu den ben bun nofo’ (1 Tim. 3:10). Fosi den Bijbel Ondrosukuman ben kan kisi a grani fu tyari a nen fu Gado, Yehovah ben musu si na a fasi fa den ben e tyari densrefi taki den ben de en kotoigi trutru.​—Luk. 24:47, 48.

SAN A NEN FU GADO WANI TAKI

A Tetragrammaton, noso den fo Hebrew letter fu a nen fu Gado

A NEN Yehovah e kon fu a Hebrew wortu di wani taki „kon tron”. Soleki fa a sori, dan a nen wani taki „A e meki kon tron”. A nen disi e fiti Yehovah trutru fu di en na a Mekiman fu ala sani. Na en meki ala sma nanga ala sani di de na hemel èn na grontapu. Boiti dati, a e tan du sani fu meki a wani fu en kon tru.

Fa wi musu frustan a piki di Yehovah gi Moses na Eksodes 3:13, 14? Moses ben aksi Yehovah: „Kon meki wi taki dati mi go na den Israelsma èn mi taigi den: ’A Gado fu den afo fu unu seni mi kon na unu’, èn den e aksi mi: ’Fa a nen?’, dan san mi musu piki den?” Yehovah taki: „Mi sa tron san mi wani tron.”

Luku taki Moses no ben aksi Yehovah fu kari a nen fu en. Moses nanga den Israelsma ben sabi heri bun fa Gado nen. Moses ben wani Yehovah fu du wan sani di ben o sori krin sortu Gado a de èn san a nen fu en wani taki. Dati meki di Yehovah taigi en „Mi sa tron san mi wani tron”, dan a sori Moses wan prenspari sani fu ensrefi: Na ini ibri situwâsi, a kan tron iniwan sani di de fanowdu fu meki a wani fu en kon tru. Fu eksempre, gi Moses nanga den Israelsma Yehovah tron wan Frulusuman, a tron wan sma di gi den wet, a tron wan sma di sorgu den èn a tron iniwan tra sani di ben de fanowdu. Sobun, na Yehovah srefi e bosroiti fu tron iniwan sani di de fanowdu fu du san a pramisi en pipel. Ma a nen Yehovah no wani taki dati wawan. Boiti taki Yehovah srefi kan tron iniwan sani, a kan du a srefi sani tu nanga den sani èn den sma di a meki. A kan meki den tron iniwan sani di de fanowdu fu meki a wani fu en kon tru.b

b Efu yu wani sabi moro, dan luku a brochure Studeri Gado Wortu moro fini, Pisi 1.

FA A WAKTITOREN GI GLORI NA GADO NEN

Na ini ala den yari di pasa, A Waktitoren sori moro nanga moro o prenspari a nen Yehovah de. Luku den kenki di kon na tapu a kafti fu A Waktitoren.

  • A kafti fu a tijdschrift Zion’s Watch Tower fu yuli 1879

    Yuli 1879

    Sensi a bigin a tijdschrift gebroiki Gado nen. A di fu tu Waktitoren di kon na doro taki: ’Wi e bribi taki YEHOVAH e horibaka gi a Waktitoren.’

  • 15 oktober 1931

    A nen Yehovah nanga a tekst Yesaya 43:12 skrifi na tapu a kafti.

  • 1 yanuari 1939

    A nen Yehovah skrifi na tu presi na tapu a kafti, makandra nanga den tekst Yesaya 43:12 nanga Esekièl 35:15.

  • A kafti fu a tijdschrift The Watchtower fu 1 maart 1939

    1 maart 1939

    A nen Yehovah skrifi na dri presi na tapu a kafti. Disi ben de a fosi Waktitoren di ben abi a heri nen A Waktitoren​—A e taki fu Yehovah Kownukondre.

Sensi den yari baka 1925 a nen Yehovah ben skrifi na ini ala den fosi paragraaf fu ibri fosi artikel fu A Waktitoren. Den brada tan du disi 20 yari langa. Disi na wan moi sani di e memre Gado pipel taki den musu gi Gado nen glori!

13. Fa Gado Wortu e sori san na a moro prenspari tori di musu seti?

13 A di fu dri sani, na taki a pipel fu Yehovah kon frustan o prenspari a de taki Gado nen kon santa. Na ini a pisi ten fu 1920 te 1930 den kon si taki a moro prenspari tori di musu seti, na taki a nen fu Gado musu kon santa. Fa Gado Wortu e sori taki disi de so? Luku tu eksempre. San na a moro prenspari sani di meki taki Gado frulusu den Israelsma fu Egepte? Yehovah taki: „Fu meki sma na heri grontapu sabi mi nen” (Eks. 9:16). Èn fu san ede Yehovah sori sari-ati gi Israel di den ben e trangayesi en? Yehovah taki baka: „Mi du wan sani fu no kisi porinen na den kondre di ben de lontu den” (Esek. 20:8-10). San den Bijbel Ondrosukuman leri fu den sortu Bijbel tori disi?

14. (a) San Gado pipel kon frustan na ini den yari baka 1925? (b) Di den Bijbel Ondrosukuman kon frustan sani moro bun, dan sortu krakti dati ben abi na tapu a preikiwroko? (Luku sosrefi a faki di nen „Wan prenspari sani di e meki taki wi e preiki”.)

14 Na ini den yari baka 1925, a pipel fu Gado kon frustan o prenspari a sani de di Yesaya ben taki. Sowan 2700 yari pasa, a ben taki fu Yehovah: „Na so yu tyari a pipel fu yu, so taki yu ben kan gi yu nen glori” (Yes. 63:14). Den Bijbel Ondrosukuman frustan taki a frulusu fu den no de a moro prenspari sani, ma na a santa di a nen fu Gado musu kon santa (Yes. 37:20; Esek. 38:23). Na ini 1929, a buku „Profeititori” ben taki: „A santa di Yehovah nen musu kon santa, musu de a moro prenspari sani gi ala sma na hemel nanga grontapu.” A nyun sani disi di den futuboi fu Gado kon frustan gi den moro deki-ati fu fruteri sma fu Yehovah èn fu tyari kon na krin sortu lei sma fruteri fu Gado.

15. (a) San den brada fu wi kon frustan syatu baka 1930? (b) Sortu grani den ben o kisi now?

15 Syatu baka 1930, den brada fu wi ben frustan krin o prenspari a nen fu Gado de, san na a wroko di Gado gi den, èn o prenspari a de taki Gado nen kon santa. Now a ten ben doro taki Yehovah gi den futuboi fu en a grani fu tyari en nen. Fa a du disi? Meki wi poti prakseri na wan tu sani di pasa fositen.

WAN PRENSPARI SANI DI E MEKI TAKI WI E PREIKI

Helen Borchert

Helen Borchert

DI DEN Bijbel Ondrosukuman kon frustan moro krin taki Gado nen musu kon santa, dan fa dati ben abi krakti na tapu a preikiwroko fu den? Na ini 1930, A Waktitoren ben taki: „Te wan Kresten e go denki moro dipi [fu a santa di Gado nen musu de santa], dan a e bigin frustan o bigi a grani de fu de wan kotoigi di e preiki a wortu èn di e meki sma kon sabi a nen fu Yehovah Gado.” Iya, wan fu den moro prenspari sani di e meki taki wi e preiki, na fu di wi e frustan taki a nen fu Gado musu kon santa (Ps. 8:1). Luku na eksempre fu Helen Borchert. A bigin pionier tapu 1 april 1930, èn a tan dini Yehovah teleki a kaba a diniwroko fu en na grontapu na ini yuli 2003 di a ben abi 96 yari. Fu san ede a tan preiki someni yari langa? Baka di a pionier furu yari, a taki: „Sensi mi bigin pionier teleki now, mi e angri . . . fu fruteri trawan taki son sani di sma e fruteri fu Bijbel èn fu Yehovah Gado, no tru kwetikweti.” Te now ete wan fu den moro prenspari sani di e meki taki wi e preiki, na fu meki a nen fu Gado kon santa.

Yehovah teki ’wan pipel di musu tyari en nen’

16. (a) Na sortu moi fasi Yehovah e gi en nen glori? (b) Sortu pipel ben e tyari Gado nen fosi?

16 Yehovah teki wan pipel na grontapu fu tyari en nen èn fu gi en nen glori. Sensi 1513 Fosi Krestes, Israel ben de a pipel fu Yehovah (Yes. 43:12). Ma den no hori densrefi na a frubontu di den ben meki nanga Gado. Te fu kaba na ini a yari 33 Baka Krestes, den no ben de Gado pipel moro. Syatu baka dati, Yehovah „poti prakseri na den sma di no de Dyu, fu puru wan pipel na den mindri di musu tyari en nen” (Tori 15:14). A nyun pipel disi di Bijbel e kari „na Israel fu Gado”, na den salfu bakaman fu Krestes di komoto fu difrenti pipel.​—Gal. 6:16.

17. Fa Satan tyari bruya kon?

17 Na a pisi ten fu a yari 44 Baka Krestes, ’Gado meki sma kari den disipel fu Yesus, Kresten’ (Tori 11:26). Biginbigin dati ben de wan spesrutu nen, fu di na soso den tru Kresten ben abi a nen dati (1 Petr. 4:16). Ma soleki fa na agersitori fu Yesus fu na aleisi nanga a takru wiwiri e sori, dan Satan ben o tyari bruya kon na ini a tori. Baka wan pisi ten a no soso den tru bakaman fu Krestes ben abi a nen Kresten, ma ala sortu sma bigin kari densrefi Kresten tu. Fu dati ede, hondrohondro yari langa yu no ben man si krin suma ben de tru Kresten èn suma ben de den falsiwan. Ma a sani disi bigin kenki na ini „a kotiten” di bigin na ini 1914. Fa so? Na a pisi ten dati den engel bigin puru den tru Kresten na mindri den falsi Kresten.​—Mat. 13:30, 39-41.

18. San yepi den brada fu wi fu si taki den ben musu suku wan tra nen?

18 Baka di Yehovah poti wan koni srafu di de fu frutrow na ini 1919, a yepi en pipel fu frustan sortu wroko a gi den. A no langa baka dati den kon si taki na oso-fu-oso preikiwroko ben e sori taki den de tra fasi leki ala den falsi Kresten grupu. Di den kon frustan a tori disi, den bigin si taki a nen „Bijbel Ondrosukuman” no ben e sori trutru san ben de a moro prenspari wroko gi den. Den no ben musu ondrosuku Bijbel nomo. Ma a moro prenspari sani gi den, na fu fruteri sma fu Gado èn fu gi en nen glori. Sortu nen ben o fiti a wroko di den ben e du? Na aksi disi kisi piki na ini 1931.

Programa fu a kongres di den Bijbel Ondrosukuman hori na Columbus, Ohio, Amerkankondre, na ini 1931

Kongres programa, 1931

19, 20. (a) Sortu prenspari bosroiti den brada nanga sisa teki na wan kongres na ini 1931? (b) Fa den brada nanga sisa ben feni a nyun nen di den kisi?

19 Na ini yuli 1931, sowan 15.000 Bijbel Ondrosukuman go na wan kongres na ini Columbus, Ohio, na Amerkankondre. Na tapu a programa den letter J nanga W ben skrifi bigi èn ala sma ben aksi densrefi san den letter disi ben wani taki. Tapu sonde 26 yuli Brada Joseph Rutherford leisi wan prenspari bosroiti gi den arkiman. A taki: „Wi wani taki ala sma kon sabi a nyun nen fu wi, èn wi wani den kari wi Yehovah kotoigi.” Na a momenti dati ala sma kon frustan taki den tu letter ben wani taki Yehovah Kotoigi (Ingrisitongo, Jehovah’s Witnesses). A nen disi komoto fu Yesaya 43:10.

20 Di den sma drape yere disi, den bari fu prisiri èn den naki anu bun langa. A prisiri sani disi ben de fu yere na tapu radio na ini furu tra kondre. Ernest nanga Naomi Barber ben de na ini Australia na a ten dati. Den taki: „Di wi yere fa den brada nanga sisa na ini Amerkankondre bigin naki anu, dan wi alamala na ini Melbourne dyompo opo èn bigin naki anu wan heri pisi ten tu. Noiti wi o frigiti a dei dati!”a

Gado nen e kisi glori na heri grontapu

21. Sortu krakti a nyun nen ben abi tapu a preikiwroko?

21 A nen Yehovah Kotoigi di komoto fu Bijbel, gi den futuboi fu Gado moro krakti fu du a preikiwroko. Edward nanga Jessie Grimes, wan pionier trowpaar fu Amerkankondre, ben go na a kongres di hori na Columbus na ini 1931. Den taki: „Wi komoto na oso leki Bijbel Ondrosukuman, ma wi drai kon baka leki Yehovah Kotoigi. Wi ben breiti taki now wi abi wan nen di e yepi wi fu gi glori na a nen fu Gado.” Baka a kongres dati, son Kotoigi bigin du wan nyun sani fu gi glori na a nen fu Gado. Te den ben e preiki oso fu oso, den ben gi den sma wan karta di ben sori suma na den. Na tapu a karta ben skrifi: „Mi na wan YEHOVAH kotoigi di e preiki fu a Kownukondre fu YEHOVAH wi Gado.” Iya, a pipel fu Gado ben si en leki wan grani fu tyari a nen fu Yehovah, èn den ben de klariklari fu sori sma na ala sei o prenspari a nen dati de.​—Yes. 12:4.

„Wi komoto na oso leki Bijbel Ondrosukuman, ma wi drai kon baka leki Yehovah Kotoigi”

22. San e sori taki a pipel fu Yehovah no de leki tra kerkigrupu?

22 Furu yari pasa sensi Yehovah yepi den salfu brada fu si taki den musu teki a spesrutu nen disi. Soleki fa wi sabi, dan Satan no wani taki sma sabi suma na Gado pipel. Ma a de so taki a ben man du disi sensi di wi kisi a nyun nen na ini 1931? A de so taki sma no man si a difrenti na mindri Gado pipel nanga tra kerkigrupu? Kwetikweti! Noiti a ben de so krin fu si taki wi na kotoigi fu Gado. (Leisi Mika 4:5; Maleaki 3:18.) Fu taki en leti, te wan sma na ini a ten disi e taki furu fu Yehovah, dan nofo tron sma e denki wantewante taki en na wan Yehovah Kotoigi. Awinsi den falsi bribi de leki bergi na wi lontu, toku ala sma man si krin suma na tru Kresten. Disi de so fu di a tru anbegi fu Yehovah e „tanapu steifi” èn a „hei pasa den ede fu den bergi” (Yes. 2:2). Iya, na ini a ten disi na anbegi fu Yehovah èn a santa nen fu en hei trutru.

23. Te wi e luku Psalm 121:5, dan sortu prenspari sani di Yehovah o du e gi wi furu deki-ati?

23 A e gi wi furu deki-ati fu sabi taki Yehovah o kibri wi gi iniwan ogri di Satan wani du nanga wi now èn na ini a ten di e kon! (Ps. 121:5) Fu dati ede wi abi a srefi denki leki a psalm skrifiman di ben taki: „Koloku fu den sma di abi Yehovah leki Gado. Iya, koloku fu a pipel di a teki leki a gudu fu en.”​—Ps. 33:12.

a Efu yu wani sabi moro fu a fasi fa den ben e gebroiki radio gi a wroko fu wi, dan luku kapitel 7, bladzijde 81-84 fu a buku disi.

A Kownukondre na wan trutru sani gi yu?

  • San a Kownukondre du fu meki Gado nen kisi glori?

  • San yu e du fu gi Gado nen glori?

  • Fu san ede yu feni en wan grani fu tyari Gado nen èn fu san ede yu de fayafaya fu fruteri trawan san a nen disi wani taki?

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma