Joe e waka ini na nen foe joe Gado?
„Ala pipel, foe dem see, sa waka ibri wan foe dem ini na nem foe . . . dem gado; ma wi, foe wi see, sa waka ini na nem foe Jehovah, wi Gado, foe tem sondro marki, ja foe teego.” — Micha 4:5.
1. Ini soema nen ibri soema nanga verstan e waka?
IBRI soema nanga verstan e waka ini na nem foe na wan ofoe tra gado. Ja, ofoe naatsi ofoe aparti soema e verstan ofoe no verstan disi, dem e dini wan ofoe tra gado. „Fa dati kan”? kande joe sa aksi. We, no ibriwan soema e dini now wan gado nanga wan spesroetoe nem, soleki dati ben de ini owroetem. Ma son soema e gi grani na acteurs, politiek man, sportman ofoe ooktoe demsrefi leki gado. Ja, dem kan meki srefi dem bere leki dem gado! (Fil. 3:18, 19). Son soema e aanbegi Satan Didibri wantron wantron, aladi trawan e dini hem sondro foe dem sabi, bikasi „na heri grontapoe de ini na makti foe na ogriwan” (1 Joh. 5:19). O troe dem woortoe de di na hebreeuw profeeti Micha ben skrifi ini na di foe aiti eeuw bifo wi teri! A ben taki: „Ala pipel, foe dem see, sa waka ibri wan foe dem ini na nem foe dem gado.” — Micha 4:5.
2, 3. (a) Ini soema nen troe kristen soema e waka, en otem spesroetoe? (b) Soortoe fasi dem e sori? (Kol. 3:23, 24)
2 Bifo dem woortoe dati ben taki, Micha ben meki bekenti san ben sa pasa „ini dem laatste dee”. Dan na bergi foe na oso foe Jehovah ben sa poti steevi tapoe ala tra bergi (foe sori na hee presi foe na troe aanbegi). Boen bigi ipi foe soema ben sa hari go drape. Dem ben sa „meki dem feti-owroe tron ploegoenefi, en dem lansri tron grasinefi, en dem no ben sa leri feti moro”. — Micha 4:1-4.
3 Dem soema di e hari go na Jehovah oso, e verstan, dati „no wan gado de leki wan” (1 Kor. 8:4). Aladi „ibri pipel e waka ini na nem foe hem gado”, na fasi foe dem troe kristen disi e kon boen na fesi foe datede ini dem tra woortoe foe Micha: „Ma wi, foe wi see, sa waka ini na nem foe Jehovah, wi Gado, foe tem sondro marki, ja foe teego” (Micha 4:1-4). San dem woortoe dati wani teki gi joe? Joe e waka ini Gado nem?
SAN A WANI TAKI FOE WAKA INI WAN NEM
4. San na wan nen? Verklari disi.
4 Wan nem e sori tapoe wan soema ofoe afersi. Na woortoe gado na wan algemene nem. Wan eeginem na a tra see e poeroe wan soema poti aparti foe ala tra soema. „Jehovah” na wan eeginem. Ma na woortoe „nem” wani taki ooktoe boen nen ofoe barinem. Na „nem foe wi Gado” e sori soboen tapoe na eeginem ofoe a nem di a habi leki persoon, aladi wan bepaalde boen nen tai nanga disi.
5, 6. (a) Ini owroetem, nanga san na nen foe wan gado ben go makandra? (b) San a wani taki „foe waka ini na nen foe wan gado”?
5 Ini owroetem dem soema ben de gewoon foe gi dem gado foe dem spesroetoe nem. So dem ben habi foe eksempel Tammuz, Artemis, Zeus, Baäl nanga Mardoek. Te foe kaba dem difrenti gado nanga oema-gado ben kisi nanga dem vreemde doe foe dem wan nen; dem ben kisi barinen. So wan barinen ben go makandra nanga na nen foe ibri gado. Mardoek foe eksempel ben de bekenti leki na gado di ben meki Babylon.
6 Waka ini na nen foe wan bepaalde gado wani taki, dati wan soema e doe san na gado dati e feni boen ofoe e doe. A wani taki dati wan soema e libi akroederi nanga na boen nen foe na gado dati en ooktoe moe erken a makti foe na gado dati. „Waka ini na nen foe wan gado” wani taki troe troe dati wan soema gi hem srefi abra na a gado dati, dati na nem foe na gado dati ben kari poti tapoe na soema dati en dati a de teki presi gi na gado dati tapoe grontapoe. A wani taki dati wan soema e libi akroederi dem eegifasi foe na gado dati.
WAKA INI NA NEM FOE JEHOVAH
7, 8. San no de ini na waka ini na nen foe Jehovah wawan?
7 A troe Gado ben gi hemsrefi wan nen. Kristen soema e verstan boen, dati Jehovah de „na Moro Heewan foe na heri grontapoe” (Ps. 83:18). Dem de grantangi dati Gado tjari hem eegi nen kon na krin. Ma waka ini na nen foe Gado, wani taki moro leki na kari foe na nen foe Gado. A wani taki moro leki na si foe na gado nen ini bijbel-anoe-skrifi.
8 Waka ini na nen foe Jehovah, no wani taki foe taki soso, dati a de wi Gado. Ooktoe a wani taki moro leki na go na kristen konmakandra ini na Koonoekondre-konmakandra-presi foe Jehovah Kotoigi. En a no de foe taki dati na waka ini na nen foe Jehovah wani taki moro leki soso preekiwroko.
9. Na waka ini na nen foe Jehovah, wani taki wawan san wi e taki foe wisrefi?
9 Aladi dem sani disi de prenspari, dan disi no e bewijsi ete, dati wi de waka troe troe ini na nen foe Jehovah. San de prenspari no de wawan san wi e taki foe wisrefi, ma san wi e doe troe troe nanga wi heri ati, wi heri verstan, wi heri sili nanga wi heri krakti (Luk. 10:27; Jak. 1:22-27). Na kristen apostel Paulus ben aksi na aksi disi di meki joe prakseri: „Joe no sabi, dati te joe pristeri joesrefi leki srafoe na wan soema, joe de srafoe foe hem, bikasi joe e jere hem, ofoe foe na sondoe nanga dede na joe fesi ofoe foe na gi jesi nanga retidoe na joe fesi?” (Rom. 6:16). Dem soema di e waka ini Gado nen, ben gi demsrefi abra na hem en dem e dini Jehovah troe troe „leki srafoe” te dem e gi hem dem getrouwfasi en gi jesi na hem (Rom. 12:11). Joe ben teki wan vaste bosroiti en joe ben poti joesrefi na mindri dem aanbegiman foe Jehovah? Joe e waka ini Gado nen?
GADO EEGIFASI NANGA DOE
10. Fa na waarderi foe wi gi Jehovah ben kon moro bigi?
10 A kande dati a ben foeroe wi nanga prisiri di wi ben kon sabi foe na fosi tron, dati na Almakti Gado habi wan nen. Kande dem ben breeti, di wi ben si foe na fosi tron, dati na gado-nen Jehovah de ini na bijbel. En fa a ben gi wi bigi prisiri foe sabi dati Gado nen e kon doesoen doesoen tron ini na bijbel! Ma foe waka ini na nen foe Jehovah, ben de wan heri tra sani. Dati no ben de foe na wan dee tapoe na tra dee. Na waarderi foe wi ben kon moro bigi te safri safri wi ben leri sabi moro boen na Soema di ben tjari na nen Jehovah.
11. San dem ben verteri Mozes foe dem eegifasi foe Jehovah?
11 Nanga na pasa foe na tem, wi ben leri sabi Jehovah eegi fasi, moro betre. Na sani disi wi ben verstan krin di wi ben gi prakseri tapoe san skrifi foe Gado ini Exodus 34:6, 7:
„Now Jehovah ben waka psa fesi Mozes en a ben bari: ’Jehovah, Jehovah, wan Gado nanga sari-ati en boen-ati-fasi, di no e kisi esi atibron en di habi pasa marki lobi boenfasi nanga waarheid, di e kibri lobi boenfasi gi doesoen doesoen soema, di e gi pardon na fowtoe nanga na pasa foe wet nanga sondoe, ma a no sa gi fri kwet-kweti foe strafoe.’”
12. Fa Mozes ben skrifi foe Jehovah ini wan brifi?
12 Foeroe jari na baka disi, Mozes ben meki wan singi nanga na jepi foe Gado santa jeje:
„Mi sa kari na nem foe Jehovah. Gi bigi grani na a nen foe Gado! Na klipston, di de volmaakti ini hem wroko, bikasi ala hem pasi de retifasi. Wan Gado foe getrouwfasi, di kroektoedoe no de na hem; reti en opregti a de.” — Deut. 32:3, 4.
13. Soortoe fasi, di wi tjari kon miti nanga na nem foe Gado, e beweegi wi foe lobi hem en vertrouw hem?
13 Dem soema di e waka ini na nen foe Jehovah, ben leri ooktoe, dati lobi, prisiri, vreede, pasensi, switifasi, boenfasi, bribi, safri-fasi nanga dwengi joesrefi de froktoe foe Gado santa jeje (Gal. 5:22, 23). Disi de foe datede eegifasi, di e feni dem bigin na Jehovah. Now wi kan tjari dem kon makandra nanga na santa nen en dem e beweegi wi foe libi en vertrouw na Gado, ini soema nen wi e waka.
14. (a) Fa dem soema di e waka ini Gado nen, kan de seker, dati Jehovah habi na makti foe meki hem prakseri kon troe en dati hem nen poti reti? (b) Verteri fa Jehovah moro hee leki dem gado foe Egypte en fa disi ben meki bekenti na mindri dem naatsi, soleki ini Jozua 2:10, 11 nanga 1 Samuel 4:8 e verteri?
14 Boiti dati, troe kristen soema ben kon sabi, dati a de na prakseri foe Jehovah foe hori hem universele soevereiniteit hee en foe meki hem nen kon reti nanga jepi foe na hemel koonoekondre ini anoe foe Jezus Kristus (Luk. 11:2; Openb. 11:16-18). Ooktoe dem soema di habi frede foe Gado e verstan, dati Jehovah habi makti foe meki hem prakseri kon troe en foe meki hem santa nen kon reti. Foe sainde? Foedi Jehovah ben bow wan bericht foe makti wroko. A no de so leki dem soso gado foe dem naatsi, di no kan doe no wan boen sani gi dem soema di e waka ini dem nen (Ps. 115:1-8). Loekoe fa dem skrifi foe Jehovah ini wan singi, baka di a ben fri na pipel Israël tapoe wan wondroe fasi na a Redi Se:
„Soema mindri dem gado de leki joe, o Jehovah? Soema de leki joe, di e sori hemsrefi nanga makti ini santa fasi? Di joe moe frede en singi en prijse hem, di e doe wondroe. Joe ben langa joe reti-anoe, en na grontapoe ben swari dem. Di Farao asi ben hari go ini na se nanga fetiwagi en soema di e tjari asi, Jehovah ben meki dem watra foe na se drai kon tapoe dem, aladi dem pikin foe Israël ben waka tapoe dree gron na a mindri foe na se.” — Ex. 15:11, 12, 19.
15. Fa a doe kon dati dem soema di e waka ini Jehovah nen, ben kon sabi hem leki na Gado foe troe profeeti-tori?
15 Dem soema di e waka ini na nem foe Jehovah, e erken hem toe leki na Gado foe getrouw profeeti-tori. Dem sani di Jehovah ben taki ben sa pasa ini na tem di e kon, ben skrifi ini hem eegi nem. A gersi leki a ben poti hem nen na ondro dem leki wan djaranti dati dem de troe. Wi kan poti wi bribi tapoe dem profeeti-tori disi. So Jehovah ben gi foe eksempel na profeeti pramisi, dati a ben sa fri dem Israël soema foe na katibo foe Egypte en a ben sa gi dem wan bepaalde kondre. Disi ben pasa toe (Ex. 3:6-17; 14:19-31). Foeroe jari na baka Salomo, na koonoe foe Israël, ben kan taki: „Blesi moe de foe Jehovah, di ben gi hem pipel Israël wan rostoepresi akroederi ala sani di a ben pramisi. No wan enkri woortoe foe ala hem boen pramisi di a ben gi nanga jepi foe hem knegti Mozes, no ben kon troe.” — 1 Kon. 8:56; loekoe toe Jozua 21:45.
16. San dem soema di e waka ini Jehovah nem ben kon sabi foe Gado lobi gi libisoema?
16 Boiti dati, dem soema di e waka ini na nem foe Jehovah, ben kon sabi, dati a de Gado prakseri foe krin na heri libisoema famiri foe sondoe nanga jepi foe na verzoen krakti foe na ofrandi foe hem lobi Manpikin, Jezus Kristus, soleki retifasi de aksi. Dem breeti foe si dati Gado nem habi foe doe nanga retifasi, en ooktoe nanga lobi gi libisoema. „Gado ben lobi na grontapoe sote”, Jezus ben taki, „dati a ben gi hem wan enkri gebore Manpikin, sodati ibri soema di e poti bribi ini hem, no moe go pori, ma ben sa habi teego libi.” — Joh. 3:16; 1 Kor. 15:22; 1 Joh. 4:10.
RESPEKI GI GADO NEM
17. Fa Jehovah ben sori dati ai respeki hemsrefi?
17 Na nem foe so wan lobi Gado verdini wi belangstelling nanga respeki. Jehovah srefi habi toemsi belanstelling ini hem nem, ma no tapoe wan gridi-fasi. A de respeki hemsrefi en a no doe nooiti ete wan sani, di broko saka ofoe meki hem santa nem kisi sjen. Dem doe foe hem de alatem na so wan fasi, dati joe kan tjari hem nem kon akroederi nanga waarheid, retifasi nanga retidoe. Dem doe foe Gado ben moi hem nem nanga grani, glori, moifasi nanga waartifasi. Nanga reti na owroe David ben kan blesi Jehovah en taki: „Foe Joe, o Jehovah, de na grani nanga na makti nanga glori nanga na toemsi boenfasi nanga na waarti-fasi” (1 Kron. 29:11). O prenspari a de foe datede, dati dem soema di e gi dem srefi now abra na Jehovah, sori na joisti respeki gi Gado nem!
18. Fa wi kan sori dati wi e waka ini na nem foe Jehovah te wi e loekoe hem wet, hem morele wet nanga hem seti foe redding?
18 Dem soema di e waka ini Jehovah nem, e erken hem leki na Soema di e gi wet a dem, leki dem Kroetoe-bakra nanga leki dem Koonoe (Jes. 33:22). Foedi Jehovah Gado de na universele Soeverein, a habi seker na reti foe gi wet en wroko nanga dem wet, poti moreel wet en seti sani foe na teego boen foe ala hem mekisani di habi verstan. En loekoe disi now: Te joe e respeki Jehovah wet, en joe e hori Gado moreel wet na prakseri, en joe e sori waarderi gi dem seti di a poti foe na tanboen foe wi en foe wi teego redding — nanga ala disi wi e sori dati wi e waka ini Jehovah nem.
19. (a) San Jehovah pramisi foe doe en foe sainde? (b) Foe datede, na a kon troe foe soortoe begi wi e loekoe?
19 Dem soema di e waka troe ini Jehovah nem, e loekoe seker nanga foeroe verwakti na a tem, dati Gado sa doe wan sani foe na boen foe ala soema di lobi retidoe en a sa kon ini beweegi tegen dem soema di e soso hem nem (Ezech. 20:9; 39:7). Ja, dem wan di lobi Jehovah, loekoe na kon troe foe na Model-begi, di Jezus Kristus ben leri wi: „Wi Tata na hemel, joe nem moe kon santa. Joe koonoekondre moe kon. Joe wani moe pasa, soleki ini hemel, so toe na grontapoe” (Matt. 6:9, 10). Moro fara dem soema di e waka ini Jehovah nem, e loekoe ooktoe na a dee, dati ala sani di e libi, sa respeki Gado moro santa nem.
WAN SPESROETOE GRANI
20. Fa na pipel foe Jehovah e „waka ini hem nem”, kontrari dem kerkiman (. . .)?
20 Wan hebi frantwoortoe de tapoe dem soema di e waka ini na nem foe Jehovah. Foe kan waka ini hem nem, wani taki dati wi moe gi wisrefi na hem abra sondro foe hori wan sani na baka. A de aksi foe wi dati wi libi akroederi nanga na nem foe Gado, dati nanga na fasi fa wi e waka en libi wi kan poti wan boen leti tapoe ala sani di habi foe doe nanga na nem foe Jehovah. Ja, a wani taki dati tapoe wan joisti fasi wi moe teki presi foe na nem foe Gado na fesi foe heri grontapoe. A de krin foe si, dati efoe wi e waka ini na nem foe Jehovah, wi no kan veragti na nem dati, wi no kan feti nanga hem, wi no kan poeroe hem komoto foe bijbel-vertaling en no kan proberi foe kibri na nem dati, soleki dem kerkiman foe na kristenheid ben doe ofoe ben proberi foe doe. Joisti tra fasi, waka ini na nem foe wi Gado, wani taki gi grani na a nem Jehovah, feti gi hem na jeje fasi, gi na gado nem na joisti presi ini na santa Bijbel en meki sondro frede bekenti na santa nem. — Ps. 9:1, 2.
21, 22. (. . .)?
21 Jehovah Gado ben habi ini na fosi eeuw foe wi gewoon teri wan pipel foe hem nem ede. Dem salfoe discipel dati foe Jezus Kristus ben hori na nem nanga soevereiniteit foe Jehovah hee. Tapoe na concilie, di dem apostel nanga owroeman ini Jeruzalem ben hori ini na jari 49 foe wi teri, na discipel Jakobus ben verklari: „(Man) brada, jere mi. Simeon (na apostel Petrus) ben verteri fini fini fa Gado foe na fosi tron ben poti hem prakseri tapoe dem naatsi foe teki komoto foe dem mindri wan pipel foe hem nem” (Tori foe dem Apostel 15:13, 14). Na so toe Gado habi ini na tem disi wan pipel tapoe soema hem nem de rostoe. Dem no de foe dem religie foe na kristenheid, ma dem de wan fika pisi foe Jezus salfoe foetoeboi. Wan „bigi ipi”, di habi na hoopoe foe kisi libi tapoe grontapoe, go moksi demsrefi nanga na fika pisi disi (Joh. 10:14-16; Openb. 7:4-9). Mindri ala dem kerki groepoe di de now tapoe grontapoe, soso dem kotoigi disi foe Jehovah e teki presi foe na nem foe Gado.
22 Dem habi wan spesroetoe grani nanga wan spesroetoe presi na fesi foe na heri grontapoe foe libisoema. Ini na di foe aiti eeuw bifo wi teri nanga na mofo foe na profeeti Jesaja Jehovah Gado ben tjalansi ala gado foe dem naatsi foe tjari dem kotoigi foe dem kon na fesi, foe dem kan gi kotoigi foe na gadofasi foe dem gado dati. Ala dem falsi gado dati no ben kan tjari kotoigi kon na fesi. Ma loekoe now san na troe gado e taki now foe hem nem-pipel: „Oenoe de mi kotoigi”, so Jehovah e taki, „ja, mi knegti di mi ben verkisi” (Jes. 43:8-10). Jehovah kotoigi nanga prisiri now e tjari na nem foe Gado. Dem e feni hem wan bigi grani foe teki presi gi na universele Soeverein en meki hem bekenti na libisoema te dem e gi kotoigi foe na troe Gado disi nanga hem prakseri. Te joe loekoe na moifasi foe na grani disi, dan ala tra sani di de prenspari e lasi waarde.
GI KOTOIGI SONDRO FREDE
23. Fa Henoch ben waka nanga Gado, en soortoe blesi a ben kisi?
23 Disi e aksi foeroe tron bigi dekati foe waka ini na nem foe Jehovah foe doe wroko leki hem kotoigi, ma a de tjari foeroe blesi kon. Henoch foe eksempel „ben tan waka nanga na troe Gado”, di nanga dekati a ben meki wan krakti boskopoe bekenti (Gen. 5:24). „Loekoe!” Henoch ben taki, „Jehovah ben kon nanga hem santa myriaden foe tjari kroetoe kon tapoe ala soema en foe feni dem ogri soema fowtoe foe ala dem ogri doe, di dem ben doe tapoe wan ogri fasi en foe ala dem ogri di ogri sondari ben taki tegen hem” (Judas 14, 15). Jehovah ben teki na dekati kotoigi dati en foedi Jehovah ben sjatoe hem libi, Gado ben sorgoe dati hem feejanti no ben kiri hem. A ben „tjari go abra”, sodati a no ben si dem sari foe dede. — Hebr. 11:5; Loekoe Johannes 3:13.
24. Fa en foe sainde Gado ben pai na getrouwfasi foe Noach?
24 Ooktoe Noach „ben waka nanga na troe Gado”. Na getrouw man disi ben gi kotoigi foe na prakseri foe Gado foe kiri dem ogri soema ini wan grontapoe froedoe. Gado ben pai na getrouwfasi foe Noach, bikasi hem nanga seebi trawan ben tjari pasa na grontapoe froedoe boen. — Gen. 6:9; 7:6, 7; 8:16; 2 Petr. 2:5.
25. Soortoe boskopoe Jehovah kotoigi e meki now bekenti?
25 Dem man disi ben de dem fositem kotoigi foe Jehovah (Hebr. 11:4-7; 12:1). Dem no ben frede foe gi grani na a nem foe Gado en meki hem bekenti na ala see. Jehovah kristen kotoigi e sori na srefi fasi ini disi tem. Sondro foe frede dem e meki na kroetoeboskopoe foe Gado bekenti. Ma dem e preeki ooktoe dati wan retidoe njoen seti de foe kon. Dem e lostoe foe si dati ala Jehovah pramisi kon troe, dati a sa tjari „njoen hemel nanga wan njoen grontapoe”, pe retidoe sa de (2 Petr. 3:8-13). Fa ala presi prisiri sa de! Dan no wan soema sa waka moro ini na nem foe wan tra Gado, ma na heri mekisani di habi verstan foe teego sa waka ini na nem foe Jehovah Gado.