Fa fu leri nyunwan fu preiki
1. Fa yu ben feni en di yu go preiki fu a fosi leisi?
1 Yu e memre a fosi leisi di yu ben teki prati na a oso-fu-oso preikiwroko? A no de fu taki dati yu ben e senwe. Efu yu ben e wroko nanga a sma di studeri Bijbel nanga yu, noso wan tra preikiman, dan a no de fu taki dati yu ben breiti taki a ben yepi yu. Now di yu kon abi ondrofeni leki wan preikiman, yu man yepi nyunwan fu preiki.
2. San nyun preikiman musu leri?
2 Nyun preikiman musu leri fa fu bigin wan takimakandra nanga wan ososma, fa fu gebroiki Bijbel na ini a preikiwroko, fa fu tyari gobaka, èn fa fu hori Bijbelstudie. Den musu leri tu fa fu preiki na difrenti fasi, soleki fu du stratiwroko, èn fu wroko na ini bisnis kontren. Yu kan yepi den fu du dati moro bun, te yu e gi den wan bun eksempre èn te yu e gi den rai.
3. Fa wi kan yepi trawan nanga na eksempre di wi e gi?
3 Gi den wan bun eksempre: Yesus ben sori den disipel fu en fa fu preiki (Luk. 8:1; 1 Petr. 2:21). Te yu o wroko nanga wan nyun preikiman, dan sreka yusrefi fu hori wan pristeri di makriki, so taki a kan teki na eksempre fu yu. Kande yu kan gebroiki wan fu den pristeri di skrifi na ini wan fu den publikâsi fu wi. Dan yu kan taki na den fosi tu oso, so taki a preikiman kan yere san yu e taki. Te yu e waka fu a wan oso go na a trawan, dan yu kan aksi en fu taki san a ben feni moi fu a pristeri fu yu. Disi o yepi en fu si taki a de prenspari fu wroko makandra nanga trawan na ini a preikiwroko. Dati o meki en makriki gi en tu fu teki iniwan rai di yu o gi en baka te a hori a pristeri fu en.
4. Fa wi kan yepi wan nyun preikiman, baka te wi arki fa a hori a pristeri fu en?
4 Sori en wan tu sani di a kan du: Yesus ben taigi den disipel fu en tu fa fu preiki (Mat. 10:5-14). Yu kan yepi wan nyun preikiman na a srefi fasi. Arki bun te a e taki. Dan baka te unu e komoto fu na oso dati, prèise en gi spesrutu sani di a du bun, srefi efu yu si taki a musu du son sani moro bun. Fosi yu taigi en san a kan du moro bun, yu kan wakti fu luku efu a go na fesi ini a pisi tori dati. A kan de so taki a ben e senwe. Boiti dati, hori na prakseri taki a no ala preikiman abi a srefi fasi fu du sani, èn nofo tron tra fasi de tu fu du wan sani bun.—1 Kor. 12:4-7.
5. San wi kan taki te wi o sori wan preikiman fa a kan du wan tu sani moro bun?
5 Son leisi wan nyun preikiman o aksi yu fa a musu du wan tu sani. Ma efu a no du dati, dan yu kan sori en fa fu du wan tu sani moro bun. Fa yu kan du dati sondro fu hati den firi fu en? Son preikiman di abi ondrofeni, e aksi: ’Mi kan sori yu wan sani di yu kan du moro bun?’, noso ’Fa yu feni taki a pristeri fu yu go?’ Wan tra sani di yu kan taki na: ’Di mi ben de wan nyun preikiman mi ben feni en muilek fu . . . , ma a sani disi yepi mi . . . ’ Son leisi a bun fu luku a Takimakandra-brochure nanga a preikiman. Fu di yu no wani taigi en tumusi furu sani, meki a ben o bun fu taki fu wán sani nomo di a kan du moro bun.
6. Te a abi fu du nanga a preikiwroko, dan fa ’isri e srapu isri’?
6 Isri e srapu isri: Timoteyus, di ben de wan evangelie preikiman di ben abi ondrofeni, ben kisi a deki-ati fu Paulus fu tan meki muiti fu gi moro bun leri, èn fu go na fesi (1 Tim. 4:13, 15). Aladi a kan de so taki yu bigin du a preikiwroko furu yari pasa kaba, toku yu musu tan du muiti fu du en moro bun. Leri fu den preikiman nanga suma yu e wroko, srefi efu den no abi so furu ondrofeni na ini a preikiwroko. Boiti dati, luku fa yu kan yepi trawan na wan switi fasi, spesrutu den nyunwan. Na so den kan kon tron bun preikiman fu a bun nyunsu.—Odo 27:17.