Wan wroko di e gi a moro bigi prisiri
1. Sortu wroko wi e du fu yepi sma na ini a ten disi?
1 Den sma fu a fosi yarihondro di ben si fa wan man ben kon betre, ben de nanga bigi prisiri (Luk. 5:24-26). Na ini a ten disi, wi de nanga bigi prisiri tu fu di wi e du a wroko di e yepi sma fu kon leri sabi Yehovah (Openb. 22:1, 2, 17). A e gi wi prisiri trutru te wi e leisi ondrofenitori di e sori fa Yehovah en Wortu nanga en santa yeye yepi sma fu kenki den libi! Ma a sani di e gi wi moro prisiri na te wi e teki prati na a wroko disi fu di wi e hori Bijbelstudie di e go na fesi.
2. Sortu prisiri sani wi kan ondrofeni te wi e leri wan sma den tru tori fu Bijbel?
2 San na a nen fu Gado? Fu san ede a e gi pasi taki pina de? San a Kownukondre fu Gado o du gi libisma? A e gi wi prisiri fu gi piki tapu den sortu aksi dati, èn sosrefi fu si na a studenti en fesi taki a breiti trutru fu leri den tru tori dati (Odo 15:23; Luk. 24:32). Te wan studenti e go na fesi, dan kande a e bigin gebroiki Yehovah en nen, a e tyari kenki kon na a fasi fa a e weri krosi èn moi ensrefi, a e tapu fu du sani di no bun, èn a e bigin gi kotoigi na trawan. Te a go na fesi teleki a gi en libi abra na Gado èn teki dopu, dan a o tron wan brada noso wan sisa fu wi di e wroko makandra nanga wi. Ibriwan fu den sani disi e gi wi reide fu de nanga prisiri.—1 Tes. 2:19, 20.
3. Sortu sani wi kan du fu bigin wan Bijbelstudie?
3 Yu kan abi wan prati na a wroko? Efu yu wani teki prati na a wroko disi di e gi a moro bigi prisiri, dan aksi Yehovah fu kisi a grani fu hori wan Bijbelstudie, èn du sani di e kruderi nanga san yu aksi Yehovah na ini begi (1 Yoh. 5:14). Preiki na presi pe sma de èn na wan ten te yu kan miti den. Na ibri okasi di fiti yu kan aksi sma efu den wani studeri Bijbel (Preik. 11:6). Te yu feni sma di wani sabi moro, èn yu prani a siri fu den tru tori fu Bijbel, dan go baka fu gi en watra.—1 Kor. 3:6-9.
4. Fu san ede wi no musu draidrai fu aksi sma efu den wani studeri Bijbel?
4 Bun furu sma de ete di e angri gi retidu. Suma o studeri Bijbel nanga den so taki den kisi yepi fu kon leri sabi Yehovah? (Mat. 5:3, 6) Meki wi de klariklari fu yepi fu klari a preikiwroko èn a wroko fu meki disipel fosi a kotiwroko kon na wan kaba.—Yes. 6:8.