Yu kan teki prati na a preikiwroko tapu sonde?
1. San wi kan leri fu den sani di Paulus nanga den mati fu en ben du na ini Filipi?
1 A Sabatdei ben de wan dei te moro furu fu den Dyu na ini Filipi ben e rostu. Paulus nanga den mati fu en ben go na a foto dati di den ben de na wan fu den preikiwaka fu den. Efu den ben o rostu tapu a dei dati tu, dan nowan sma ben o krutu den. Ma den ben sabi taki den Dyu ben kon makandra dorosei fu a foto fu begi. Fu dati ede den teki na okasi disi fu preiki gi den. A musu de so taki Paulus nanga den mati fu en ben breiti di Lidia nanga en osofamiri ben arki a boskopu fu den èn den teki dopu! (Tori. 16:13-15) Fu di furu sma na ini a ten disi e rostu tapu sonde, meki a ben o bun fu gebroiki wan pisi fu a dei disi fu preiki gi den, a no so?
2. Sortu problema a pipel fu Yehovah ben musu pasa fu man preiki tapu sonde sondro taki sma gens den?
2 Den kisi gens fu di den ben preiki tapu sonde: Na a ten fu 1927, a pipel fu Yehovah ben kisi a deki-ati fu gebroiki wan pisi fu ibri sonde fu preiki. Disi meki taki sma bigin gens den wantewante. Na ini Amerkankondre, skowtu ben grabu furu fu den fu di den ben feni taki den pasa a Sabat wet tapu sonde. Boiti dati, den ben feni taki a pipel fu Gado ben e fruferi sma te den ben e rostu, èn taki den ben seri sani sondro fu abi primisi gi dati. Ma a pipel fu Yehovah no tapu nanga a preikiwroko. Na ini den yari baka 1930, den ben orga pikin grupu fu preikiman fu gemeente di de na ini wan birti, èn na so den ben e wroko wan kontren. Son leisi te skowtu ben grabu den preikiman, dan so furu fu den preikiman ben de taki skowtu no ben man du noti fu tapu den. Yu abi trutru warderi gi a tranga muiti di den brada disi du so taki wi kan preiki tapu sonde sondro taki sma e gens wi?
3. Fu san ede sonde na wan bun dei fu teki prati na a preikiwroko?
3 Wan bun dei fu preiki: Furu sma de na oso tapu sonde fu di den no e wroko tapu a dei dati. Nofo tron den no abi so furu fu du. Son sma di e go na kerki kande o wani taki fu Gado tapu a dei disi. Efu wi abi konmakandra tapu sonde, dan wi weri krosi kaba di fiti gi a preikiwroko. Fu san ede wi no e sreka sani fu go na ini a preikiwroko fosi wi go na a konmakandra noso baka dati? Efu a de fanowdu, dan sreka wan pikin sani fu nyan èn tyari dati nanga yu.
4. Sortu prisiri sani wi kan ondrofeni te wi e gebroiki wan pisi fu a sonde fu go na ini a preikiwroko?
4 Te wi e gebroiki wan pisi fu a sonde fu go na ini a preikiwroko, dan wi o abi ten ete fu kisi a rostu di wi abi fanowdu. Boiti taki wi o rostu, wi o prisiri tu fu di wi ben teki prati na a santa diniwroko (Odo 19:23). Kande wi o abi a prisiri tu fu miti wan sma di de leki Lidia!