Sori „sari-ati” gi trawan
1. San sma abi tranga fanowdu na ini a ten disi?
1 Noiti ete na ini a historia a ben de so tranga fanowdu taki wi sori sari-ati gi so furu sma di musu kisi yepi. Fu di a situwâsi na grontapu e kon moro ogri dei fu dei, meki na ala sei sma no de koloku, den e firi brokosaka, èn den no abi nowan howpu. Milyunmilyun sma abi yepi fanowdu, èn wi leki Kresten abi na okasi fu sori taki wi e broko wi ede nanga den trutru (Mat. 22:39; Gal. 6:10). Fa wi kan sori taki wi e broko wi ede nanga den?
2. San na a moro bun fasi fa wi kan sori sari-ati?
2 Wan wroko di e du nanga sari-ati: Gado na a wan-enkri sma di kan trowstu wi trutru (2 Kor. 1:3, 4). Fu di Yehovah abi sari-ati, meki a e gi wi a deki-ati fu sori „sari-ati” gi trawan tu. Boiti dati, a gi wi a komando fu go na sma fu fruteri den a bun nyunsu fu a Kownukondre (1 Petr. 3:8). Te wi e du ala san wi man na ini a wroko disi, dan dati na a moro bun fasi fa wi kan trowstu „den wan di e firi brokosaka”. Disi de so, fu di Gado Kownukondre na a wan-enkri tru howpu gi libisma di e nyan pina (Yes. 61:1). Fu di Yehovah abi sari-ati gi en pipel, meki heri esi a o puru ala ogridu èn a o seti wan nyun grontapu pe retidu sa de.—2 Petr. 3:13.
3. Fa wi kan si sma soleki fa Yesus ben e si den?
3 Si sma soleki fa Yesus ben e si den: Awansi Yesus ben e preiki gi bigi grupu sma, toku a no ben e si den leki wan grupu nomo. A ben prakseri ibriwan fu den, èn a ben si taki den abi yepi fanowdu fu kon abi wan bun matifasi nanga Gado. Den sma ben de leki skapu sondro skapuman fu tiri den. Den sani di Yesus ben si, ben naki en ati. Dati meki a ben abi pasensi nanga den te a ben e gi den leri (Mark. 6:34). Te wi e si sma soleki fa Yesus ben e si den, dan dati o gi wi deki-ati fu sori trutru sari-ati gi ibriwan fu den. Disi o de fu si na a fasi fa wi e taki nanga den sma èn fa wi e poti wi fesi. A moro prenspari sani gi wi na fu preiki, èn wi o fiti den sani di wi e taki na san ibriwan fu den sma abi fanowdu.—1 Kor. 9:19-23.
4. Fu san ede wi musu weri sari-ati leki wan krosi na wi skin?
4 Wan bigi ipi sma fu ala kondre e gi yesi na a Kownukondre boskopu èn den e firi bun fu di wi e sori trutru sari-ati gi den. Meki wi tan weri sari-ati leki wan krosi na wi skin, fu di na so wi o gi grani na Yehovah èn wi o plisi wi Gado, di abi sari-ati trutru.—Kol. 3:12.