Tu sensi di no ben warti furu

Wan prenspari fasi fa wi e horibaka gi Kownukondre afersi, na te wi e gi moni fu man du a preikiwroko na heri grontapu. Ma fa a de te wi no abi furu moni?

Wan leisi Yesus ben si taki wan pôti uma di en masra dede kaba, ben poti tu sensi di no ben warti furu na ini a monikisi fu a tempel. „Aladi na uma disi ben pôti, toku a poti ala san a ben abi” (Mark. 12:41-44). Na fu di na uma ben lobi Yehovah meki a du dati. Wi sabi taki a moni di na uma ben gi, ben warti gi Gado fu di Yesus ben taki fu en. Den Kresten fu a fosi yarihondro ben si en leki wan grani tu fu gi moni. Den gudu Kresten nanga den pôtiwan ben gi san den man. Na apostel Paulus ben taki fu na eksempre fu den Masedoniasma di ’begi en tangitangi efu den ben kan kisi a grani fu gi sani’ aladi den ben „pôti srefisrefi”.​—2 Kor. 8:1-4.

Fu dati ede, awansi wi man gi ’tu sensi di no warti furu’, toku wi musu hori na prakseri taki te furu sma e gi pikinso moni, dan te fu kaba dati e tron wan bigi moni. Te wi e gi nanga wi heri ati, dan wi hemel Tata di e gi sani bogobogo sa prisiri, fu di „Gado lobi a sma di e gi sani nanga prisiri”.​—2 Kor. 9:7.