„Lobi ala brada”
Den wortu disi di komoto fu Bijbel ben skrifi sowan tu dusun yari pasa (1 Petr. 2:17). Ma now a de tumusi prenspari fu lobi ala brada nanga sisa! Fa wi kan lobi ala den brada nanga sisa na heri grontapu? Fa wi kan sorgu taki a lobi fu wi no kon kowru, aladi sma na ini a grontapu disi no abi lobi gi makandra? (Mat. 24:12) Luku efu yu kan piki den aksi di e kon now, aladi yu e luku a video Onze gehele gemeenschap van broeders (A bradafasi fu wi na heri grontapu).
(1) O ten wi tron wan memre fu a grupu fu brada nanga sisa na heri grontapu? (2) San na den dri srefi sani di brada nanga sisa na heri grontapu e du? (3) Fa den brada nanga sisa fu wi e sori taki noti no e tapu den fu preiki (a) na ini den kontren fu Alaska, (b) na ini den bigi lanpresi fu Europa, èn (c) na ini den bigi busi fu Peru? (4) Fu san ede wi no musu prakseri noiti taki a preikiwroko de leki iniwan tra wroko di wi e du? (5) Gi wan tu eksempre di e sori fa Yehovah Kotoigi ben trowstu makandra èn ben yepi makandra (a) baka wan gronseki, (b) baka wan bigi winti di e pori sani èn (c) na ini ten fu borgufeti. (6) San wi alamala kan du fu sori taki wi na Kresten brada nanga sisa? (Yoh. 13:35) (7) Sortu wini wi e kisi te wi e wroko makandra fu bow wi eigi Kownukondre zaal? (8) Fa den brada nanga sisa fu wi na ini Owstu-Europa èn na ini Rosiakondre ben man horidoro aladi den tirimakti ben tapu a preikiwroko? (9) Sortu tranga muiti furu Kotoigi e meki fu go na den kongres, èn fu san ede den e du dati? (10) Fa a video disi gi yu deki-ati fu tan (a) anbegi Yehovah na ini wánfasi na den gemeente konmakandra? (b) yepi trawan te den de na ini nowtu èn (c) preiki na ibri momenti èn na difrenti fasi? (11) Fa wi kan gebroiki a video disi na ini a diniwroko èn o ten wi kan du dati?
A moro prenspari sani fu san ede wi de brada nanga sisa fu makandra, na fu di wi lobi Yehovah. Wi lobi leri sani fu Yehovah èn wi lobi leri trawan fu kon sabi en. Wi lobi den sma tu di Yehovah lobi. Te wi e yepi den te den de na nowtu, dan wi no e fruwakti fu Gado taki a o taigi wi tangi. Na presi fu dati, wi e taigi Gado tangi fu di wi e si den Kresten brada nanga sisa fu wi leki wan kado di wi kisi fu en. Fu di a kaba fu a grontapu disi pe lobi no de, de so krosibei, meki wi musu tan sori lobi gi ala den brada nanga sisa fu wi!