Gi den wan switikon!
1. Sortu moi okasi wi abi fu gi kotoigi, èn fu san ede?
1 A Memrefesa di e hori ibri yari, na wan heri moi okasi fu gi kotoigi. A yari disi wi e fruwakti moro leki 10 milyun sma na a Memrefesa fu yere den tu moro moi fasi fa Yehovah nanga Yesus sori taki den lobi wi nanga yepi fu a lusu-paiman (Yoh. 3:16; 15:13). Den o leri fa a sani disi di Yehovah gi den, o tyari blesi gi den (Yes. 65:21-23). Ma a no a takiman wawan o gi kotoigi na a okasi disi. Wi alamala di de drape o abi na okasi fu gi kotoigi te den o gi den fisitiman wan switikon.—Rom. 15:7.
2. Fa wi kan gi den fisitiman wan switikon?
2 Na presi fu sidon pî e wakti a programa fu bigin, wi kan sori switifasi gi den fisitiman èn aksi den fa den nen. A kan taki den sma di kon e senwe-senwe èn den no sabi san o pasa. Te wi e lafu nanga den èn e gi den odi, dan den o firi switi. Efu yu wani sabi efu a sma kon fu di a kisi wan kari, dan yu kan aksi en efu disi na a fosi leisi taki a kon na den konmakandra fu wi noso efu a sabi wan sma na ini a gemeente. Kande yu kan aksi en fu sidon na yu sei èn meki a gebroiki yu Bijbel nanga yu singibuku. Efu a Memrefesa e hori na ini wan Kownukondre zaal, dan yu kan sori en fa a presi tan. Baka a lezing yu kan taigi a sma taki efu a abi aksi, dan yu wani piki den. Efu yu gemeente musu gowe esi-esi fu di wan tra gemeente musu bigin, dan yu kan taigi a sma: „Fa yu ben feni a programa? Fa mi kan miti yu?” Dan yu kan seti sani fu go baka na a sma wan tra dei. Spesrutu den owruman wani de na ai fu gi deki-ati na preikiman di no e preiki moro èn di ben kon na a Memrefesa.
3. Fu san ede a de prenspari fu meki muiti fu gi fisitiman wan switikon na a Memrefesa?
3 Gi furu fu den fisitiman, disi o de a fosi leisi taki den e si fa a pipel fu Yehovah abi prisiri, e libi na ini freide èn wánfasi, èn den o si den blesi di Yehovah en pipel abi nownow kaba (Ps. 29:11; Yes. 11:6-9; 65:13, 14). San den fisitiman o memre te den gowe? Na den sani di wi e du fu gi den wan switikon.