’Waka tapu den bergi’
A distrikt Chin, hei sowan 900 te go miti 1800 meter. Son presi hei moro leki 3000 meter. Furu fu den bergi lai nanga busi èn bon soleki teak-bon, conifer-bon, moi redi rowsu di den e kari rododendron nanga orchidee bromki. A kontren bigi, a lai busibusi èn a no makriki fu waka drape. Difrenti kronkron santi pasi e tyari yu go na ini den foto èn te den pasi abi watra, dan a muilek fu waka na tapu. Ma te tokotoko nanga ston e wasi kon fu den bergi, dan den pasi e kon moro takru. Yu abi fu waka fu man doro den dorpu di de fara. Ma den sani disi no ben tapu den futuboi fu Yehovah fu du ala san den man fu preiki a bun nyunsu gi furu sma.
Wan sisa di nen Aye Aye Thit di e dini nanga en masra di de wan kring-opziener na ini a distrikt Chin, e taki: „Mi kweki na wan lagipresi di nen Ayeyarwady èn mi ben lobi den moi Chin-bergi. Mi ben angri trutru fu kren wan bergi a fosi leisi, ma di mi doro tapusei, mi ben weri srefisrefi. Baka di mi kren wan tu bergi, mi ben weri so te taki mi denki taki mi ben o dede. Te fu kaba, mi ben leri fa fu kren den bergi. Mi ben musu teki mi ten so taki mi no ben weri tumusi gaw. Fosi yu denki mi ben man waka 32 kilometer na ini wán dei èn son leisi mi ben de na pasi siksi dei langa.”
Furu yari langa den brada nanga sisa na ini a distrikt Chin ben gebroiki buriki, asi nanga baisigri fu go na presi. Ma now den gebroiki bromfiets, truck nanga four-wheel-drive wagi. Ma moro furu na waka den e waka. Fu eksempre, den spesrutu pionier Kyaw Win nanga David Zama ben musu waka furu kilometer na tapu den bergi fu man doro den dorpu na ini a birti fu Matupi. Fu man go na den kongres na ini Hakha, di de 270 kilometer moro fara, den brada nanga sisa fu a gemeente na ini Matupi ben musu waka siksi te go miti aiti dei go-kon. Te den de na pasi den e singi Kownukondre singi di yu ben kan yere fara na tapu den moi bergi.
Boiti taki a ben muilek gi den brada nanga sisa fu waka na tapu den bergi te a weer ben takru, a ben muilek tu te furu maskita noso tra insekt e kon na yu tapu, spesrutu na ini alen weer. Myint Lwin, wan kring-opziener e taki: „Di mi ben waka na ini a busi, mi si fa woron di e soigi brudu e kren tapu mi futu. Di mi pruberi fu hari den puru, dan ete tu kren tapu mi futu. Mi dyompo tapu wan bon di ben didon na gron, ma furu tra woron bigin kren kon na a bon. Fu di mi ben frede, mi lon go na ini a busi. Di mi doro na a pasi, mi heri skin ben lai woron.”
Ma den sma di ben go na ini a distrikt Chin, no ben miti woron wawan. Mianmar abi busi-agu, beer, tigri, èn soleki fa son sma e fruteri, Mianmar abi moro takru sneki leki iniwan tra kondre na grontapu. Te a distrikt-opziener Gumja Naw nanga en wefi Nan Lu, ben de na pasi fu go na wan tra gemeente, dan den ben poti faya lontu a kampu fu den, so taki ogri meti no e kon na den!
Te nanga now den preikiman dati de wan moi eksempre gi wi. Maurice Raj e taki: „Den dini Yehovah nanga ala den krakti. Srefi baka di den gowe libi a distrikt Chin, den ben de klariklari fu drai kon baka. A tranga muiti fu den e gi Yehovah glori trutru!” Aladi furu sma no e libi na ini a distrikt Chin now, toku yu abi seibi gemeente nanga difrenti grupu di de na farawe kontren.