Wi abi moro okasi fu prèise Yehovah
1. Sortu nyun seti o yepi wi fu „prèise Yehovah ala ten baka”?
1 A mun maart di pasa, wi bigin nanga wan nyun seti di e gi den preikiman na okasi fu wroko 30 yuru leki yepipionier na ini maart nanga april èn na ini a mun te a kring-opziener e fisiti a gemeente. Efu a wiki fu a kringfisiti e bigin na ini wan mun èn a e kaba na ini a tra mun, dan a yepipionier kan bosroiti na ini sortuwan fu den tu mun dati a o wroko 30 yuru. Ala yepipionier mag go na a heri konmakandra di a abi nanga den gewoon pionier nanga spesrutu pionier. Disi wani taki dati efu wi no man doro den 50 yuru, dan toku wi kan „prèise Yehovah ala ten baka” leki yepipionier fo leisi wan yari èn wi kan wroko 30 yuru!—Ps. 109:30; 119:171.
2. Fa den yepipionier o man nyan bun fu a fisiti fu a kring-opziener?
2 Te a kring-opziener e fisiti a gemeente: Now moro furu preikiman o man wroko leki yepipionier te a kring-opziener e fisiti den gemeente èn den kan gi makandra deki-ati te den e wroko nanga en na ini a preikiwroko (Rom. 1:11, 12). Kande furu fu wi kan teki wan dei fri fu wroko na mindriwiki, so taki wi kan wroko nanga en. Den wan di abi wan grontapuwroko mindriwiki, kan aksi a kring-opziener fu wroko nanga en na tapu satra noso sonde. A o gi den yepipionier furu deki-ati tu fu de na a pionier konmakandra makandra nanga den gewoon pionier nanga spesrutu pionier!
3. Fu san ede a ten fu a Memrefesa na wan bun ten fu du a yepi-pionierwroko?
3 Na ini maart nanga april: Den wan di ben man de kaba na ini a yepi-pionierwroko na a ten fu a Memrefesa èn di ben wroko 30 yuru, kan „prèise Gado” moro now nanga a nyun seti disi! (Heb. 13:15) Den mun maart nanga april na bun mun fu du moro na ini a diniwroko leki yepipionier. Ibri yari na ini den mun dati, wi e du a moi wroko fu gi sma wan kari fu kon na a Memrefesa. Sosrefi, fu di furu fu wi o du moro na ini a preikiwroko na a ten fu a Memrefesa, meki wi o man wroko nanga furu tra preikiman. Baka a Memrefesa, wi wani go baka na den sma di ben kon èn di wani sabi moro, so taki wi kan gi den deki-ati fu kon arki a spesrutu publikitaki. Yu ati o naki yu fu gebroiki den okasi disi di yu abi fu du a yepi-pionierwroko moro leisi na ini wan yari?—Luk. 6:45.