Teki a bun eksempre fu den profeiti—Amos
1. Fa na eksempre fu Amos kan gi wi deki-ati?
1 A de so taki yu e kisi a firi taki yu no man du a preikiwroko, fu di kande yu no kisi furu skoroleri noso fu di yu gro kon bigi na ini wan pôti osofamiri? Efu dati de so, dan na eksempre fu Amos kan gi yu deki-ati. Aladi a ben de wan skapuman di ben wroko wan tu mun nomo na ini a yari, toku Yehovah gebroiki en fu fruteri sma wan prenspari boskopu (Amos 1:1; 7:14, 15). Na so a de tu na ini a ten disi taki Yehovah e gebroiki den sma di no kisi furu skoroleri (1 Kor. 1:27-29). Sortu tra sani wi kan leri fu a profeiti Amos di wi kan gebroiki na ini wi diniwroko?
2. Fu san ede wi kan du a wani fu Gado, aladi sma e gens a diniwroko fu wi?
2 Tan du a wani fu Gado, aladi yu e kisi gens: Amasia ben de wan priester na ini a tin-lo kownukondre Israel na noordsei, èn a ben e anbegi pikin kaw. Di a yere a profeititori fu Amos, a ati bron èn a ben de leki a taigi Amos: ’Gowe fu dya! Libi wi! Wi abi wi eigi kerki!’ (Amos 7:12, 13) Amasia ben fruteri Kownu Yerobeyam wan heri tra sani fu a boskopu fu en, soso fu meki a kownu tapu a wroko fu Amos (Amos 7:7-11). Ma Amos no ben frede. Na ini a ten disi den kerki fesiman e suku yepi na den tiriman fu meki den frufolgu a pipel fu Yehovah. Ma Yehovah e gi wi a dyaranti taki nowan fetisani di den e gebroiki fu feti nanga wi, o abi bun bakapisi.—Yes. 54:17.
3. Sortu tu boskopu wi e prati na ini a ten disi?
3 Fruteri sma a krutuboskopu fu Gado nanga den blesi di o kon: Aladi Amos ben fruteri a tin-lo kownukondre Israel a krutuboskopu fu Gado, toku na a kaba fu a Bijbel buku Amos a skrifi taki Yehovah pramisi fu meki sani kon bun baka èn fu blesi a pipel bogobogo (Amos 9:13-15). Wisrefi e fruteri sma taki ’a dei doro taki Gado o krutu den ogri sma’, ma disi na wan pisi nomo fu a ’bun nyunsu fu a Kownukondre’ di wi musu preiki (2 Petr. 3:7; Mat. 24:14). Baka te Yehovah pori den ogri sma na Armagedon, dan a o meki grontapu tron wan paradijs.—Ps. 37:34.
4. Fu san ede wi kan de seiker taki wi kan du a wani fu Yehovah?
4 Te wi e preiki a Kownukondre boskopu na grontapu di lai nanga sma di e gens wi, dan disi e gi wi na okasi fu sori efu trutru wi gi wisrefi abra na Yehovah èn efu trutru wi wani du a wani fu en (Yoh. 15:19). Ma wi sabi seiker taki Yehovah o tan yepi wi so taki wi kan du a wani fu en neleki fa a yepi Amos.—2 Kor. 3:5.