Ondrofenitori fu a Jaarboek 2013

Den fosi Kayinsma di tron Kotoigi

Na ini 1940, wan pionier di nen Ruby Goff ben e preiki na ini Insein, wan pikin foto di no de krosibei fu Yangon. Fu di furu sma no ben wani arki a dei dati, meki Ruby begi: „Grantangi Yehovah, meki mi feni wán ’skapu’ nomo fosi mi go na oso.” Na a fosi oso baka dati, a miti Hmwe Kyaing, wan Kayinsma di de fu a Baptist Kerki èn wantewante a ben wani yere a Kownukondre boskopu. Syatu baka dati, Hmwe Kyaing nanga den umapikin fu en, Chu May (Daisy) nanga Hnin May (Lily) bigin studeri Bijbel èn den e go na fesi. Aladi Hmwe Kyaing dede syatu baka di den bigin studeri, toku Lily, a moro yongu umapikin fu en, tron a fosi Kayinsma di dopu leki wan Kotoigi fu Yehovah. Daisy dopu tu.

Lily nanga Daisy tron fayafaya pionier èn den libi wan bun eksempre gi wi na baka. Na ini a ten disi furu fu den bakapikin nanga Bijbelstudenti fu den e dini Yehovah na ini Mianmar èn na ini tra kondre.

Yehovah opo a pasi

MAURICE RAJ

A GEBORE NA INI 1933

A DOPU NA INI 1949

A LIBI FU EN: A du a furuten diniwroko na ini Mianmar moro leki 50 yari èn moro furu fu den yari dati a dini leki bijkantoro-opziener. A e dini ete leki wan memre fu a Bijkantoro komte.a

◆ Na ini a yari 1988 dusundusun sma go du ogri na strati fu di den ben wani wan tra tirimakti na ini Yangon. Fu di a heri kondre ben bruya, meki den srudati teki a kondre abra èn den srudati ben abi a moro bigi pisi fu a kondre na ini den makti. Dusundusun sma di ben go na strati ben lasi den libi.

Na ini a srefi mun dati, wi ben musu seni a yari raportu fu a bijkantoro go na a edekantoro na New York. Ma wi no ben man du dati, fu di ala kantoro di e seni brifi go na dorosei kondre ben tapu. Ma mi kon yere taki na Amerkan ambassade ben e seni den brifi fu den nanga helicopter go na dorosei kondre. Fu di mi ben denki taki mi ben o man seni a raportu fu a bijkantoro go nanga den brifi fu na ambassade, meki mi weri a moro bun paki fu mi nanga wan das, dan mi go na a ambassade.

Di mi ben rèi den pasi di lai nanga watra, dan mi ben fruwondru taki a heri foto ben de pî. No langa baka dati sma ben tapu a pasi nanga bigi udu, fu dati ede mi poti a wagi na sei pasi èn mi waka go doro nanga futu.

Di mi doro na a ambassade, mi si hondrohondro sma di ben e meki babari fu go na inisei, ma wan tôf-fesi srudati ben tapu den sma fu go na inisei. Mi tan tanapu èn mi begi Yehovah na ini misrefi. Wan skoro studenti ben si den krosi di mi ben weri, dan a bari taki: „A man disi musu fu e wroko na a ambassade.” Fu dati ede mi pusu pasa a bigi grupu sma. Di mi doro a portu fu na ambassade, dan wan hipsi srudati ben e luku mi neleki a ben wani sabi san mi wani.

A bari taki: „Suma na yu èn san yu wani?”

Mi piki en: „Mi wani si na ambasadoro, fu di mi abi wan tumusi prenspari boskopu fu seni go na Amerkankondre.”

A luku mi langa na ini mi ai. Ne wantronso a hari a portu opo, a hari mi kon na inisei, dan a naki a portu tapu gi den sma di ben e suku fu kon na inisei.

A taigi mi: „Kon nanga mi.”

Di wi ben de na a doro fu na ambassade, dan a tyari mi go na wan wrokoman fu na ambassade di ben weri èn a man disi aksi mi san mi wani.

Mi taigi en: „Mi na fu a Waktitoren Genootschap èn mi abi wan prenspari raportu di mi musu seni a mun disi go na wi edekantoro na New York. Yu kan seni en grantangi nanga den brifi fu na ambassade?” Mi gi a man a prenspari envelop èn mi taigi en: „Sorry ma mi no abi wan stampu fu poti na tapu.”

A ben fruwondru èn a aksi mi wan tu sani. Dan a gi mi a dyaranti taki a o seni a raportu gowe. Bakaten mi kon yere taki a raportu doro biten na a edekantoro.

[Futuwortu]