Ondrofenitori fu a Jaarboek 2013

En wawan ben preiki na wan foto di de farawe

David ben e libi na wan foto farawe fu en oso na ini Kenia. Drape a bigin studeri Bijbel nanga Yehovah Kotoigi. Syatu baka dati, a drai go baka na en eigi dorpu Lokichar, di de fara na noord-westsei na ini Kenia. A moro krosibei gemeente di de na ini a foto Lodwar ben fara sowan 165 kilometer. Fo yari langa David no ben miti nowan Kotoigi, ma a ben preiki gi den birtisma nanga den famiri fu en. A ben fruteri den san a ben leri na ini a syatu pisi ten di a ben studeri Bijbel. Sonwan fu den ben arki èn no langa na baka, a ben studeri Bijbel nanga wan tu sma. Na ini 2007 a meki kontakti nanga den brada na ini Lodwar èn a bigin studeri Bijbel baka. Tu leisi wan mun a ben go na den brada nanga bromfiets di e rèi leki taxi èn a ben e go nanga pikin bus.

O moro David ben kon leri sabi Bijbel, o moro a ben lobi a diniwroko. Aladi a no ben dopu ete, a ben bow wan „Kownukondre zaal” krosibei fu en oso fu klèidoti èn a daki ben de fu bambu. Drape a ben hori konmakandra nanga sma di ben wani sabi moro. Ma a no ala sma na ini a dorpu ben lobi taki a ben e preiki. Tu yari langa den kosi en èn den fon en. Wan leisi wan tu sma fu a dorpu fon en teleki a flaw, fu di den ben feni taki a ben e meki sma fu a dorpu „anbegi Didibri”. Ma baka di David ben suku yepi na wan lantiman, den no du ogri moro nanga en èn David tan preiki. David taki: „A tru anbegi na a moro prenspari sani na ini mi libi. Nowan sma di e gens mi man tapu mi.”

Na ini 2009, David dopu èn now a e dini leki wan dinari ini a diniwroko èn leki gewoon pionier. David nanga a boi fu en di abi 15 yari na den wan-enkri preikiman na ini a kontren dati. Ma na ini april 2012, sowan 60 sma fu a dorpu ben kon na a Memrefesa di ben hori na ini a zaal di David ben meki sei en oso.