Ondrofenitori fu a Jaarboek 2013
„A Gado di yu e dini, tranga”
Caro e libi na ini Uganda. Wan mun baka di a studeri Bijbel, a masra fu en, Martin, di ben du bonuwroko, ben bigin gens en hebi. A ben taigi en: „Den buku di yu e studeri e tapu den afo fu kon na ini na oso.” Martin no ben libi bun nanga Caro, èn a ben taigi en taki a ben o kiri en efu a no ben o tapu fu studeri Bijbel. Martin no ben wani sorgu tu gi na osofamiri. Caro no ben bruya, ma a ben prani sani fu sorgu gi en osofamiri, èn a ben tan studeri Bijbel. Bakaten di Caro kon si taki a ben kan lasi en libi, dan a lowe gowe. A ben hebi fu sorgu gi ensrefi. Ma di a ben yere taki den pikin fu en kon siki, dan a bai dresi nanga a pikinso moni di a ben wroko.
Baka wan pisi ten, a masra fu Caro bèl en. A taki: „Mi wani taki yu kon na oso.” Mi si taki a Gado di yu e dini, tranga èn a e horibaka gi yu. Mi wani taki yu taigi den sma di e gi yu leri, fu kon studeri nanga mi tu. Mi wani kenki mi libi trutru. Martin ben de seryusu. Now a heri osofamiri e libi makandra èn den de koloku. Na a kongres fu augustus 2012, Martin nanga Caro teki dopu.
’A gi mi en brede nanga en pèt’
Na a distrikt kongres fu 2010 na ini Chili, wan boi di nen Marcelo èn di ben abi tin yari, ben si taki na owru man di ben sidon sei en, no ben abi nowan buku.
A taigi en mama safri: „A man no abi wan Bijbel.”
A mama taigi en: „Meki a luku nanga yu.” Fu dati ede Marcelo sidon moro krosibei fu a man di nen Victor èn a sori en ala den Bijbeltekst. Na ini a pauze, Marcelo taigi en mama: „A man no abi nyan.” A mama taigi en fu prati a brede fu en nanga a man. Sobun Marcelo gi en wan brede èn wan kan faya te. Marcelo ben sori Victor ala den tekst di a sabi, aladi Victor ben e nyan en brede.
Bakadina, a son ben faya. Marcelo taigi en mama baka: „A man no abi wan pèt.”
En mama taigi en: „Gi en a pèt fu yu.” Dan a du dati. Baka a programa, Marcelo taigi Victor odi èn a gowe.
A tra yari na a distrikt kongres, Marcelo ben e luku efu a ben o si Victor baka. A ben breiti di a si en èn disi leisi a ben weri wan das! Di Victor si Marcelo, a taigi ala sma: „Na a boi disi meki mi kon dya tide. A yari di pasa, mi kisi wan kari fu kon na a kongres èn mi kon. A boi disi sori mi den Bijbeltekst, a gi mi en brede nanga en pèt. Now mi e studeri Bijbel!” Victor tron wan preikiman di no dopu ete.