Ondrofenitori fu a Jaarboek 2014
Wan lapelkarta ben de den „paspoort”
Na ini 1987 moro leki 1000 brada nanga sisa go na a ’Frutrow tapu Yehovah’ distrikt kongres na ini Guékédou, na ini Ginea. Fu di a presi pe a kongres ben o hori ben de krosibei fu a kontren pe Ginea e tuka nanga Liberia nanga Sièra Leon, meki furu sma fu den kondre dati bosroiti fu go-kon ibri dei na a kongres. Ma den no ben abi paspoort, noso den papira fu go na wan tra kondre. Dati meki brada di abi frantwortu go taki nanga den skowtu di ben wroko drape. Den skowtu agri taki den sma di ben go na a kongres ben musu sori den wán papira nomo. Dati ben de a lapelkarta fu den. Te den skowtu fu Ginea ben si den sma di ben e go na a kongres nanga den lapelkarta di ben abi wan faya redi kloru, den ben meki den pasa kon wantewante na ini a kondre.
Den ogri-ati srudati no du ogri nanga wi
ANDREW BAUN
A GEBORE NA INI 1961
A DOPO NA INI 1988
A LIBI FU EN: A ben e dini leki gewoon pionier na ini Pendembu, Oost-Provincie, Sièra Leon, di a feti bigin na ini 1991.
◆ Wan bakadina, srudati di ben opo densrefi teige a tirimakti, kon na ini wi foto èn tu yuru langa den ben e sutu go na loktu nanga den gon. Sonwan fu den srudati disi ben de tini di no ben man hori den gon bun srefi. Den skin ben doti, den wiwiri ben fanyafanya èn a ben gersi leki den ben smoko drugs.
A dei baka dati den bigin kiri sma. Den kapu sma den anu noso den futu puru, èn trawan den sutu kiri. Den ben dwengi umasma fu abi seks nanga den. A heri foto ben bruya. Brada Amara Babawo nanga en osofamiri èn fo tra sma di ben wani sabi moro fu Bijbel, kon kibri na mi oso. Wi ben frede srefisrefi.
Syatu baka dati wan komandanti fu den srudati di ben opo densrefi teige a tirimakti, kon na mi oso èn a taigi wi taki tamara mamanten wi ben musu go na a srudati kampu fu leri feti. Wi ben abi a fasti bosroiti fu no teki sei na ini a feti aladi wi ben sabi taki den ben o kiri wi. Pikinmoro a heri neti wi begi. Wi opo fruku mamanten, wi luku a deitekst èn wi wakti den srudati. Den no kon noiti.
Bakaten wan ofsiri fu a legre di ben opo densrefi teige a tirimakti nanga fo fu den man fu en teki wi oso. Den taigi wi fu tan na ini na oso èn dati meki wi tan hori konmakandra èn wi hori a deitekst na wi oso. Wan tu srudati ben taki: „Unu e leisi a deitekst. Un musu fu de Yehovah Kotoigi.” Den no ben wani sabi sani fu Bijbel, ma den ben lespeki wi.
Wan dei, wan hei komandanti kon luku den srudati di ben tan na ini wi oso. A taki brada Babawo odi èn a seki en anu. Ne a bari gi den srudati: „A man disi na mi basi èn un basi. Efu unu meki wán sani pasa nanga en noso nanga wan fu den sma di de nanga en, dan sani o miti unu. Un frustan?” „Iya komandanti!” den srudati piki. Dan a komandanti gi wi wan brifi pe skrifi taki den srudati no musu du wi noti fu di wi na sma di e libi switi nanga trawan.
Wan tu mun baka dati, den difrenti srudati grupu bigin feti nanga makandra èn wi lowe go na Liberia. Drape wi miti wan tra grupu fetiman di ben wani du wi ogri. „Wi na Yehovah Kotoigi”, wi taigi den. „Dan san skrifi na Yohanes 3:16?” wan fu den srudati aksi. Wi taigi en san skrifi drape èn a meki wi gowe.
Baka dati wi miti wan komandanti fu wan tra grupu di taigi mi nanga brada Babawo fu go nanga en. Wi ben frede taki a ben o kiri wi. Ma a man taigi wi taki a ben studeri nanga Yehovah Kotoigi fosi a feti bigin na ini a kondre. A gi wi moni èn a teki wan brifi na wi èn a tyari en gi den brada fu wan gemeente di ben de krosibei. Syatu baka dati tu brada kon nanga nyanyan nanga tra sani èn den tyari wi go na wan presi pe sma no ben man du wi ogri.