Ondrofenitori fu a Jaarboek 2015

Dominikan Republiek—Fa a wroko bigin

Na tapu sonde 1 april 1945, Lennart nanga Virginia Johnson di ben klari a Gileadskoro, doro na ini Ciudad Trujillo (now a nen Santo Domingo), a mamafoto fu Dominikan Republiek. A trowpaar disi ben de den fosi tu Kotoigi na ini a kondre disi pe furu feti nanga dyugudyugu ben de fosi.a „Disi na wan bun presi fu pionier èn den zendeling disi ben musu bigin nanga ala sani”, na so a Yaribuku fu 1946 ben taki. Denki a sani disi: Nowan bijkantoro ben de, nowan Kownukondre zaal ben de èn nowan gemeente ben de. Den zendeling no ben sabi nowan sma na ini a kondre èn den ben taki pikinso Spanyorotongo nomo. Den no ben abi oso èn nowan ososani. Fa den ben o du?

Lennart e fruteri: „Wi go na Victoria Hotel èn wi yuru wan kamra gi feifi dala wan dei. Wi ben kisi nyanyan tu. A srefi bakadina dati wi bigin wi fosi Bijbelstudie. Disi na fa a go: Di wi ben de na ini Brooklyn, wi ben studeri Bijbel nanga tu uma fu Dominikan Republiek. Den uma disi ben gi wi den nen fu famiriman nanga mati fu den. Wan fu den sma dati ben de Datra Green. Di wi go na en, wi miti Moses Rollins tu di ben libi na ini a srefi birti. Di den yere fa wi kon sabi fa den nen èn pe den e tan, den arki a Kownukondre boskopu bun èn den ben wani studeri Bijbel. Heri esi Moses tron a fosi Kownukondre preikiman fu drape.”

„Wan dei wi o feni den”

Na a ten fu 1935, na ini a Cibao Valley, Pablo González bigin leisi Bijbel. Fu wan syatu pisi ten a ben de na ini wan kerkigrupu fu Protestantsma. Ma di a si taki a fasi fa den sma ben e tyari densrefi no ben kruderi nanga san a ben leisi na ini Bijbel, dan a gowe libi a grupu. Toku a tan studeri Gado Wortu en wawan èn a bigin fruteri trawan den sani di a ben leri. A fruteri den famiriman nanga den birtisma fu en fosi èn baka dati a go na tra sma na ini a kontren. A seri a gron fu en nanga den meti di a ben kweki èn a gebroiki a moni dati fu go preiki na difrenti presi.

Na a ten fu 1942, Pablo ben go na sowan 200 famiri na ini a kontren èn a ben hori konmakandra, aladi a no ben miti Yehovah Kotoigi ete. A ben gi sma deki-ati fu studeri Bijbel èn fu du san den leri. Furu sma ben arki en èn den no ben gebroiki tabaka moro èn den ben tapu nanga a gwenti fu abi moro leki wán frow.

Wan fu den sma di ben arki a Bijbel boskopu di Pablo ben preiki, ben de Celeste Rosario. Na uma disi e fruteri: „Di mi ben abi 17 yari, mi mama en neef, Negro Jiménez, ben de na ini wan fu den grupu fu Pablo González. Negro Jiménez kon na mi famiri èn a leisi wan tu tekst fu Bijbel. A sani disi ben nofo fu meki mi gowe libi a Lomsu Kerki. Te sma ben leisi Bijbel na ini a kerki, dan den ben du dati na ini Latijntongo èn wi no ben frustan dati. Syatu baka dati, Pablo González kon na wi èn a gi wi deki-ati. A ben taki: ’Wi no de fu wan fu den omeni kerki di de dyaso, ma wi abi brada nanga sisa na heri grontapu. Wi no sabi ete suma na den noso fa den nen, ma wan dei wi o feni den.’”