Ondrofenitori fu a Jaarboek 2015
A bun eksempre fu wan papa
Jemima di e libi na ini Spanyorokondre, ben leri den tru tori fu Bijbel sensi di a ben de wan pikin meisje. Ma di a ben abi seibi yari en heri libi kenki. En mama no ben wani de wan Kotoigi fu Yehovah moro èn a broko trow nanga Jemima en papa. Di Jemima ben abi 13 yari a no ben go na den konmakandra moro èn a no ben wani meki en papa leri en sani fu Bijbel.
Di Jemima kon bigi a go na ini politiek organisâsi nanga tra organisâsi fu yepi pôtisma. Bakaten di a no ben abi wroko, en papa di nen Domingo, aksi en fu du ferfi wroko nanga en.
Di den ben e wroko makandra wan dei, Domingo aksi Jemima efu a wani studeri Bijbel. Jemima no ben wani. Ma a taigi en papa taki efu wan dei a ben o wani sabi moro fu Bijbel, dan a ben o aksi en. Te Domingo ben e ferfi a ben e arki Bijbel nanga tijdschrift tapu mp3, ma Jemima ben arki poku nanga en headphone.
Na ini november 2012, Domingo, di ben trow baka, kisi wan kari fu go na a Bijbelskoro gi Kresten trowpaar. Jemima ben feni en wan kefalek sani taki en papa ben o go na wan Bijbelskoro tu mun langa èn taki a ben o libi ala sani na baka fu go awinsi pe den seni en go. Now fosi Jemima ben kon frustan o tranga a bribi fu en papa ben de èn a ben wani sabi fu san ede dati de so.
Jemima no ben arki poku moro te den ben e wroko, ma a ben arki den mp3 di en papa ben e prei. A bigin poti aksi tu. Wan dei di Domingo ben tanapu na tapu wan trapu e ferfi, Jemima taki: „Yu sabi ete taki mi ben o taigi yu efu mi wani studeri Bijbel? We, now a ten doro.”
Domingo ben breiti srefisrefi fu yere dati. Na ini yanuari 2013 den bigin studeri tu leisi wan wiki. A skoro gi trowpaar bigin na ini april, ma Domingo studeri go doro nanga Jemima nanga yepi fu Skype. Jemima go na a programa di ben hori gi den studenti di ben klari a skoro èn a ben lobi san a ben yere. Jemima teki dopu tapu 14 december 2013.
Jemima e taki: „Yehovah ben abi furu pasensi nanga mi èn mi sabi taki noiti a si mi leki wan sma di no man kenki. A gi mi wan sani di mi no ben feni na ini grontapu. Dati na trutru mati. Now mi abi Kresten brada nanga sisa na heri grontapu èn dati e meki taki mi abi moro warderi gi a bigi lobi fu Yehovah.”
Den yongu tumusi fu preiki?
Teariki na wan boi fu seibi yari di e libi na a èilanti Tarawa di de wan pisi fu Kiribati. Wan dei di a ben e preiki nanga en papa di nen Tueti, den go na ini wan oso pe den miti wan grupu fu tin man nanga uma di ben abi sowan 20 yari. Di Tueti fruteri den sma a Kownukondre boskopu, wan fu den taigi en: „Wi si taki unu alamala e tyari den yongu pikin fu unu go preiki. Fu san ede unu e tyari den? Den yongu tumusi fu preiki.”
Tueti piki: „Unu wani si efu mi boi sabi preiki? Mi o go tanapu na dorosei, dan unu kan arki san a abi fu taki.” A heri grupu piki: „Iya, wi wani yere san a abi fu taki.”
Baka di Tueti go na dorosei, dan Teariki aksi den sma: „Unu sabi fa Gado nen?”
„Iya, a nen Yesus!”, wan fu den taki. Wan trawan taki: „Na Gado.” Ete wan trawan taki: „Masra.”
Teariki taki: „Meki wi luku san Bijbel e taki. Efu wi luku Yesaya 42:5, dan wi kan leisi en makandra.” Baka di den leisi a tekst, Teariki aksi den: „Fu suma a tekst disi e taki?”
Wan fu den sma piki: „Fu Gado.” Dan Teariki taki: „Iya, a e taki fu a tru Gado. Efu wi leisi go doro na ini vers aiti, dan san a tru Gado e taigi wi? ’Mi na Yehovah. Dati na mi nen. Mi no o meki wan tra sma kisi a glori di mi musu kisi.’ Unu si fa Gado nen?”
Den sma piki: „Na Yehovah.”
Now di den alamala ben e arki, Teariki aksi den: „Fu san ede a bun fu gebroiki Gado nen, Yehovah? Wi kan leisi Tori fu den apostel 2:21 fu sabi a piki. Drape skrifi: ’Ibri sma di e kari a nen fu Yehovah o kisi frulusu.’ Sobun, fu san ede a bun fu gebroiki Gado nen?”
Wan fu den sma na ini a grupu taki: „Dati o meki wi kisi frulusu.”
Na a momenti dati Teariki en papa kon na inisei baka. Dan a aksi den sma: „San unu e prakseri? Den pikin fu wi sabi preiki? A bun taki wi e tyari den fu preiki nanga wi?” Ala den sma ben feni taki den pikin sabi preiki èn taki a bun taki den du a wroko disi. Tueti taigi den: „Efu unu leri san skrifi na ini Bijbel, dan unu srefi kan fruteri sma den tru tori dati neleki Teariki.”