Ondrofenitori fu a Jaarboek 2015
A domri e arki now
„Noiti mi o misi a Memrefesa moro.” Na so wan domri fu wan prenspari Protestant kerki fu Zuid-Afrika taki. San meki taki a domri disi go na a Memrefesa na ini april 2014? A tori disi bigin di tu brada fu difrenti ras ben e preiki makandra èn den naki na en doro. Den ben sabi kaba taki a domri no ben o wani taki nanga den. Wan fu den brada di nen Adaine, e fruteri san pasa: „Wi ben skreki di a domri opo a doro gi wi èn a kari wi kon na inisei. Wi ben abi wan langa takimakandra. A ben fruwondru fu si taki wan weti man ben e preiki na ini wan birti pe soso blaka sma e libi èn taki a ben taki nanga en na ini en eigi tongo. Disi meki taki a domri bigin studeri Bijbel ala wiki.”
Adaine e taki moro fara: „A man disi ben de wan domri 40 yari kaba èn a kerki fu en ben seni en go na difrenti presi. Ma now fosi di a ben abi 80 yari, a kisi piki tapu ala den aksi fu en. A lobi a buku Teki na eksempre fu sma di ben abi bribi. Te wi e studeri nanga en, dan a e hori son tori na ede èn a e gebroiki den te a e preiki na ini en kerki. A sori den sma fu en kerki a buku San Bijbel e leri wi trutru? èn a taigi den: ’Te Yehovah Kotoigi kon na un oso nanga a buku disi, dan un musu arki san den e taki bika a buku disi e leri sma moi sani fu Bijbel.’”
A domri taigi Adaine taki den fesiman fu en kerki piri-ai gi en èn taki den warskow en fu no taki fu Yehovah Kotoigi te a e preiki na ini en kerki. A domri no ben sabi san fu du. Adaine ben memre wan ondrofenitori fu wan Lomsu priester na ini Mianmar, di ben skrifi na ini a Jaarboek 2013. Di Adaine leisi a tori disi gi a domri, a domri taki: „Na a srefi sani disi e miti mi now! Mi musu teki wan tumusi prenspari bosroiti èn mi no kan wakti moro langa.”
A domri go fu a fosi leisi na a Memrefesa tapu 14 april 2014 èn a taki dati a no o misi a konmakandra disi noiti moro. A taki tu dati a o gowe libi a falsi kerki.
Moro Kownukondre zaal e bow
Fu di so furu nyun disipel e kon na ini a tru anbegi, meki moro Kownukondre zaal de fanowdu. Dati meki na ini november 2000, den brada na ini Dominikan Republiek bigin bow Kownukondre zaal nanga yepi fu a seti fu bow zaal na ini kondre di no abi so furu moni. Disi e meki taki wan gemeente kan bow wan moi èn bun Kownukondre zaal na ini sowan aiti wiki. Na a ten fu september 2011, tu bow-grupu ben bow noso seti son owru zaal. Ala nanga ala dati ben de sowan 145 Kownukondre zaal.
Den moi zaal disi èn den brada nanga sisa di kon yepi fu bow ben meki taki furu sma kon si suma na Kotoigi trutru. Fu eksempre, na ini wan pikin foto na noordwest-sei fu a kondre, den brada ben feni wan pisi gron di ben o bun fu bow wan nyun Kownukondre zaal na tapu. Wan brada di de wan spesrutu pionier aksi a man di abi a gron efu a wani seri en. A man piki en: „No lasi yu ten. Mi no o seri a gron gi unu fu di mi sabi taki unu o bow wan kerki drape.”
Syatu baka dati, a man disi go na Puerto Plata fu go luku en bigi brada di de wan Kotoigi fu Yehovah. Di a man doro drape, a kon sabi taki wan osofamiri di de Kotoigi tu ben teki en brada na ini den oso fu di a ben siki èn den sorgu gi en. Den ben e tyari en go na datra, den ben e tyari en go na konmakandra èn na ini a preikiwroko. A man aksi en brada omeni a ben musu pai den sma gi ala den sani di den du gi en. A brada taki: „Mi no pai noti. Den sma disi na mi brada nanga sisa.”
A switifasi di den Kotoigi sori, ben naki na ati fu a man disi so te taki a bel a spesrutu pionier di ben wani bai a gron fu en. A taigi a pionier taki a kenki prakseri èn taki a wani seri a gron gi den. Den brada bai a pisi gron èn den bigin bow a zaal. A wefi fu a man no ben lobi Yehovah Kotoigi. Ma now di a si fa den brada nanga sisa e wroko makandra, a taki: „Noiti ete mi si wan grupu sma e wroko so bun nanga makandra èn e sori so furu switifasi gi makandra.”