’Waka nanga bribi, no nanga san ai e si’

Syatu fosi den legre lontu Yerusalem èn pori en te fu kaba, na apostel Paulus skrifi den Kresten. A taigi den taki leki srudati fu Krestes den musu sabi taki den o nyan pina. A skrifi tu taki den no musu de nomonomo fu abi wan switi libi èn fu meki prisiri (2 Tim. 2:3, 4). Fu di na ogri grontapu disi o kisi pori heri esi, meki wi musu abi wan tranga bribi so taki wi kan tan poti prakseri na a matifasi di wi abi nanga Yehovah (2 Kor. 4:18; 5:7). Luku a felem ’Waka nanga bribi, no nanga san ai e si’. (Go na jw.org/srn èn luku BUKU NANGA TRA SANI > FELEM.) Luku fa Naham nanga Abital ben lobi grontapu gudu tumusi èn fa dati meki den lasi den libi te fu kaba. Baka dati yu kan piki den aksi disi.

(1) San ben de ’a tegu sani di e tyari pori kon, èn di ben e tanapu na wan santa presi’ na ini a fosi yarihondro? Sortu prenspari sani den Kresten na ini Yerusalem ben musu du? (Mat. 24:15, 16) (2) Fu san ede den sma ben musu abi bribi fu man lowe komoto na ini a foto? (3) San sma ben musu libi na baka di den gowe libi Yerusalem? (4) Fu san ede Naham nanga Abital ben e draidrai fu gowe? (Mat. 24:17, 18) (5) Sortu tra tesi miti Rakel di a ben e gowe fu Yerusalem? (Mat. 10:34-37; Mark. 10:29, 30) (6) Fa Etan sori taki a ben abi wan tranga bribi èn taki a ben frutrow tapu Yehovah? (7) Na ini sortu muilek situwâsi den Kresten ben de na ini Pela? (8) San meki taki a bribi fu Naham nanga Abital kon swaki moro nanga moro? (9) Fa Yehovah sorgu gi den Kresten di ben e libi na ini Pela? (Mat. 6:33; 1 Tim. 6:6-8) (10) Fa wi kan teki na eksempre fu Abraham nanga Sara now di a grontapu disi o kon na wan kaba? (Hebr. 11:8-10) (11) Fu san ede Naham nanga Abital ben feni taki a bun fu drai go baka na Yerusalem, èn fu san ede den no ben si sani na wan bun fasi? (Luk. 21:21) (12) Fa a libi ben de trutru na ini Yerusalem di Naham nanga Abital drai go baka? (13) Fu san ede wi musu tranga wi bribi now, fosi a grontapu disi kon na wan kaba?​—Luk. 17:31, 32; 21:34-36.

Te wi wani waka nanga bribi, dan (1) wi musu poti wi frutrow tapu den sani di Yehovah e taigi wi (2) wi musu du san Yehovah e taigi wi èn (3) wi musu sori taki a matifasi di wi abi nanga Yehovah prenspari moro grontapu gudu. Meki wi abi a fasti bosroiti fu waka nanga bribi fu di wi sabi taki „grontapu e pasa gowe nanga den lostu fu en, ma a sma di e du a wani fu Gado o tan fu têgo”.​—1 Yoh. 2:17.