Ondrofenitori fu a Jaarboek 2015
Fu san ede a bun fu abi lespeki gi sma
Na tapu 30 maart 2014, Vasilii di e dini furu yari kaba na a Betel fu Rosiakondre, ben e preiki nanga a wagi pe wi e poti buku na tapu. A ben e tanapu krosibei fu a bijkantoro di wan skowtu-wagi rèi kon drape. Wan skowtu komoto na ini a wagi èn a aksi Vasilii na wan lespeki fasi fu no preiki drape moro, fu di wan tu sma na ini a birti no ben lobi dati. Di a skowtu ben e taki nanga en, dan wan tra skowtu ben e teki a takimakandra tapu en kamera. Vasilii du san a skowtu taigi en èn a no haritaki nanga en. Na a ten dati wan lo sma ben e tanapu e luku san ben e pasa. Vasilii gowe, ma baka tu dei a aksi efu a mag taki nanga a komandanti fu den skowtu. Di a ben e taki nanga a komandanti, dan Vasilii taigi en tangi gi a prenspari wroko di den e du na ini a birti èn taki den skowtu ben taki na wan lespeki fasi nanga en, tu dei pasa. A komandanti drai luku wan tra skowtu di ben de drape èn a taigi en: „Na 32 yari kaba mi na skowtu, èn noiti ete mi yere wan sma taki wi tangi gi a wroko di wi e du!” Te fu kaba a komandanti kon frustan taki lanti no tapu a preikiwroko fu wi. A komandanti aksi Vasilii fu san ede a no taki noti di a skowtu taigi en fu no preiki drape, aladi Vasilii sabi taki a abi a reti fu preiki. Vasilii taki: „Mi abi lespeki gi skowtu. A ben o fruferi efu mi ben taigi a skowtu leti na fesi ala den sma drape taki a no sabi den wet fu lanti.” A komandanti nanga a tra skowtu ben lobi a fasi fa Vasilii ben taki nanga den, èn den taigi en taki a no ben o kisi problema moro te a ben o preiki nanga a wagi.
’Yesus na a ede’
San ben o pasa nanga den brada nanga sisa now di den zendeling gowe? Den no ben o abi wan „edeman” moro, soleki fa Komandanti Colón ben taki? Nôno. Yesus „de na ede fu a skin. Dati na a gemeente” (Kol. 1:18). Sobun a no ben de so taki a pipel fu Yehovah na ini Dominikan Republiek no ben abi wan edeman. Ma Yehovah nanga en organisâsi ben tan sorgu gi den.
Baka di lanti meki den zendeling komoto na ini a kondre, dan Donald Nowills kisi a frantwortu fu luku a wroko fu a bijkantoro. A brada disi ben abi 20 yari nomo èn a ben dopu fo yari nomo. Aladi a ben de kring-opziener wan tu mun, toku a wroko fu a bijkantoro di a ben musu du ben de wan nyun sani gi en. Brada Nowills ben libi na Gualey, wan kefalek ogri birti na ini Ciudad Trujillo. A ben tan na ini wan udu-oso di ben abi wan daki fu sinki èn a gron ben de fu santi. Na oso ben abi wan pikin kantoro pe en nanga Félix Marte ben e meki kopi fu A Waktitoren gi a heri kondre.
Na a ten dati Mary Glass en masra, Enrique, ben de na strafu èn Mary ben e yepi Brada Nowills fu meki kopi. Mary e fruteri: „Mi ben e komoto na wroko feifi yuru bakadina èn mi ben e go na Brada Nowills en oso fu skrifi A Waktitoren nanga wan typ-masyin. Dan Brada Nowills ben meki kopi nanga wan kopi-masyin. Baka dati wan sisa fu Santiago di wi ben kari ’engel’, ben poti den kopi fu den tijdschrift na ondrosei fu wan leigi oli blik di ben kan teki 20 liter oli. A ben tapu den tijdschrift nanga wan krosi èn a ben poti kasaba, patata nanga wan sortu taya na en tapu. Dan a ben poti wan seiri saka na tapu den sani dati. Baka dati a ben teki wan bus go na noordsei fu a kondre èn a ben gi ibri gemeente wán tijdschrift. Ibri leisi wan tra osofamiri fu a gemeente ben e leni a tijdschrift dati so taki den ben man studeri en makandra.”
Mary e taki moro fara: „Wi ben musu luku bun, fu di furu skowtu ben de na strati èn den ben wani sabi pe wi ben e druk A Waktitoren. Ma noiti den kisi wi. Yehovah kibri wi ala ten.”
Luku bun leki sneki, ma de leki doifi di no e du ogri
Di lanti ben tapu a wroko, a ben de prenspari taki den futuboi fu Yehovah tan kisi buku nanga tijdschrift. Ma a ben de wan muilek ten gi den. Na ini den yari dati den ben grabu furu brada èn poti den na strafu.
Juanita Borges e fruteri: „Di mi kon sabi a tru anbegi na ini 1953, mi ben sabi heri bun taki sma ben kan sroto mi fu di mi na wan Kotoigi fu Yehovah. Èn na dati pasa tu. Na ini november 1958 di mi ben go luku Sisa Eneida Suárez, dan skowtu kon drape èn den taki dati wi ben e hori wan konmakandra. Wi ben koti dri mun strafu èn ibriwan fu wi ben musu pai wan butu fu sowan 100 Amerikan dala.”
Lanti ben du ala san den man fu tapu den Kotoigi fu kon makandra, ma den brada no ben meki a sani dati tapu den. Toku den ben musu ’luku bun leki sneki, ma de leki doifi di no e du ogri’ (Mat. 10:16). Andrea Almánzar e fruteri: „Te wi ben go na konmakandra, wi no ben doro drape na a srefi ten. Baka a konmakandra wi ben gowe bun lati neti èn wi no ben komoto drape na ini wán grupu soso fu no meki sma denki taki wi ben hori konmakandra.”
Jeremías Glass tron wan preikiman na ini 1957 di a ben abi seibi yari. Di a gebore, en papa di nen León ben de na strafu. Jeremías sabi ete taki den ben hori konmakandra kibrikibri na ini en oso èn a sabi ete san den ben du fu no meki sma kisi den. A e fruteri: „Ibri sma di ben de na a konmakandra ben kisi wan pikin pisi karton nanga wan nomru na tapu fu sori o ten den ben musu gowe. Baka a konmakandra mi papa ben poti mi fu tanapu na a doro fu luku den nomru tapu den pisi karton fu sorgu taki ibri leisi tu sma nomo ben gowe. Te tu sma ben waka gowe na a wan sei, dan mi ben musu taigi den tu trawan taki den ben musu waka go na a tra sei.”
Wan tra sani di den brada ben du, na fu hori konmakandra na wan ten te sma no ben o fruwakti dati. Mercedes García kon sabi a tru anbegi fu en omu, Pablo González. Di Mercedes ben de wan meisje fu seibi yari nomo, en mama dede aladi en papa ben de na strafu. Sobun, en nanga en neigi brada nanga sisa ben tan den wawan. Mercedes teki dopu na ini 1959 di a ben abi neigi yari. Fu di den no ben wani taki skowtu kisi den, meki den brada hori a dopu-lezing gi en 3.30 mamanten. Den hori a lezing na wan brada en oso èn den dopu Mercedes na ini Ozama-liba, di e lon na mindri a mamafoto. Mercedes e taki: „Wi ben drai go baka na oso 5.30 mamanten, di den tra birtisma ben e bigin wiki.”