Gi den wan switikon

Tapu 23 maart, wi e fruwakti taki sowan 12 milyun noso moro sma o kon na a Memrefesa. Den o yere tumusi moi sani di o naki den ati. A takiman o taki fu a lusu-paiman di de wan presenti fu Yehovah èn a o taki fu wan tu fu den blesi di libisma o kisi na ini a ten di e kon (Yes 11:6-9; 35:5, 6; 65:21-23; Yoh 3:16). Ma a no a takiman wawan o taki nanga den na a spesrutu konmakandra disi. Wi alamala kan yepi te wi e gi den wan switikon (Ro 15:7). Luku wan tu sani di yu kan du.

• Na presi fu go sidon èn wakti teleki a Memrefesa bigin, yu kan go taki den fisitiman odi na wan switi fasi èn sosrefi den preikiman di no ben e kon moro na den konmakandra

• Te yu e taki nanga den sma di yusrefi ben gi wan kari, no frigiti fu taki nanga den tra sma di kisi wan kari tu. Aksi wan sma di kon fu a fosi leisi fu sidon na yu sei. Meki a luku makandra nanga yu na ini yu Bijbel èn yu singibuku

• Sorgu taki yu de klariklari fu piki den aksi di sma abi na a kaba fu a programa. Efu yu gemeente musu gowe esi-esi fu di wan tra gemeente musu bigin, dan yu kan seti sani fu go baka na a sma baka wan tu dei. Efu yu no sabi pe a sma e tan noso yu no sabi en telefon nomru, dan yu kan taigi en: „Mi wani sabi fa yu ben feni a programa. Fa mi kan miti yu baka?”