MWBR19 03 Verwijzing gi Wi Kresten libi nanga a preikiwroko studie-buku

4-10 MAART

GUDU NA INI GADO WORTU | ROMESMA 12-14

„San a wani taki fu sori lobi leki Kresten?”

it-1-O 785

Lobi

Ala sma na ini a Kresten gemeente musu abi lobi (Grikitongo, filadelfia) gi den brada nanga sisa fu den (Ro 12:10; Heb 13:1; luku sosrefi 1Pe 3:8). Sobun, den sma na ini a gemeente musu libi nanga makandra leki memre fu wan osofamiri di lobi makandra. Aladi den sma na ini a gemeente e sori lobi kaba gi makandra, toku den e kisi a rai fu lobi makandra moro.​—1Tes 4:9, 10.

A Griki wortu filostorgos di wani taki „abi tranga lobi gi wan trawan”, abi fu du nanga a lobi di bun mati abi gi makandra. Wan pisi fu a wortu filostorgos komoto fu a wortu stergo. Nofo tron stergo abi fu du nanga a lobi di famiriman abi gi makandra. Na apostel Paulus ben gi Kresten a rai fu kon abi a lobi disi (Ro 12:10). Paulus ben e sori tu taki na ini den lasti dei, sma „no o lobi trawan” (Grikitongo, astorgoi) èn taki den sortu sma dati musu dede.​—2Ti 3:3; Ro 1:31, 32.

11-17 MAART

GUDU NA INI GADO WORTU | ROMESMA 15, 16

Diki moro dipi

w89-O 1/12 24 ¶3

„Mi wani si efu unu abi trutru lobi”

A no de fu taki dati den brada fu den di no ben de Dyu ben musu frustan taki den ben musu du wan sani fu yepi den. Te yu luku en bun, dan den ben abi wan „paiman” na den Kresten na ini Yerusalem fu di na drape a bun nyunsu di den sma fu tra kondre ben kon yere, ben komoto. Paulus ben taki: „Efu den santawan na ini Yerusalem prati den sani fu Gado nanga den pipel [noso, den sma di no ben de Dyu], dan den musu yepi den tu nanga den sani di den abi fanowdu.”​—Romesma 15:27.

it-2-O 1192 ¶1

Sabi na fesi, bosroiti na fesi

A Mesias, noso Krestes ben o de a pramisi pikin di ben o meki taki ala reti-ati sma kisi blesi (Ga 3:8, 14). A fosi leisi di Bijbel e taki fu a „pikin” dati, na baka di den fosi tu sma ben opo densrefi teige Gado na ini Eden. Ma dati ben de fosi Abel gebore (Ge 3:15). Disi ben de sowan 4000 yari fosi a kon na krin taki a „pikin” dati ben o de a Mesias. A sani disi e sori krin taki a tori disi ben „kibri fu wan heri pisi ten”.​—Ro 16:25-27; Ef 1:8-10; 3:4-11.

18-24 MAART

GUDU NA INI GADO WORTU | 1 KORENTESMA 1-3

Diki moro dipi

it-2-O 1280 ¶1

Koni

A koni fu grontapu e meki taki sma e si den sani di Yehovah seti nanga yepi fu Krestes, leki don sani. Aladi a kan taki den tiriman fu a grontapu disi ben abi a koni fu krutu sani bun, toku den „spikri Masra na a postu” (1Kor 1:18; 2:7, 8). Ma now Gado ben e sori taki a koni fu den grontapusma kon tron wan don sani. A meki den koniwan fu grontapu kisi syen fu di a gebroiki a sani di den ben si leki „wan don sani fu Gado” fu meki a wani fu en kon tru. A gebroiki sosrefi den sma di den ben si leki donsma, swakiwan, nanga sma di no prenspari (1Kor 1:19-28). Paulus ben warskow den Kresten na ini Korente taki „a koni fu a grontapu disi” nanga „a di fu den tiriman fu a grontapu” ben o tron noti. Dati meki na apostel no ben e preiki fu a koni fu a grontapu disi (1Kor 2:6, 13). Paulus ben warskow den Kresten na ini Kolose taki den ben musu luku bun nanga „a koni fu grontapu [filosofias, noso a lobi gi koni] èn nanga soso takitaki di e bedrigi sma”, fu di den sani disi abi fu du nanga „den gwenti fu libisma”.​—Kol 2:8; luku vers 20-23.

25-31 MAART

GUDU NA INI GADO WORTU | 1 KORENTESMA 4-6

it-2-O 1389

Srudeki

Na apostel Paulus ben gebroiki a srefi agersitori disi di a taigi a Kresten gemeente na ini Korente fu puru wan man na ini a gemeente fu di a ben du hurudu. Paulus ben taki: „Unu no sabi taki na pikinso srudeki nomo e meki ala blon sweri? Puru na owru srudeki, so taki unu kan tron nyun blon sondro srudeki. Fu taki en leti, unu de sondro srudeki fu di Krestes, a Paska-ofrandi fu wi, dede leki srakti-ofrandi.” Ne Paulus sori krin san a ben wani taki nanga a wortu „srudeki”: „Fu dati ede, meki wi hori a fesa, ma no gebroiki owru srudeki èn srudeki di e agersi ogridu nanga takrudu. Ma gebroiki brede sondro srudeki di e agersi sani di bun èn di tru” (1Kor 5:6-8). Dyaso Paulus ben e gebroiki a Dyu fesa fu brede sondro srudeki na wan agersi fasi fu sori den wan sani. Sma ben e hori a fesa disi syatu baka a Paskafesa. Neleki fa wan pikinso srudeki nomo kan meki ala blon sweri, na so a heri gemeente no ben o de krin moro gi Yehovah, efu den no ben o puru a man di ben kan pori a gemeente. Neleki fa den Israelsma no ben musu abi srudreki na ini den oso na a ten fu a fesa, na so den Kresten ben musu puru na agersi srudeki na den mindri.

it-2-O 811, 812

Satan

San den wortu disi wani taki: „Libi so wan man gi Satan so taki a sondu libi fu en no o abi krakti tapu trawan na ini a gemeente”?

Baka di na apostel Paulus ben taigi a gemeente na ini Korente fu puru a man na den mindri di ben e libi nanga a wefi fu en papa, dan a skrifi: „Un musu libi so wan man gi Satan so taki a sondu libi fu en no o abi krakti tapu trawan na ini a gemeente” (1Kor 5:5). Fu taki en leti a ben taigi a gemeente fu no bumui srefisrefi moro nanga a man disi (1Kor 5:13). Te den ben puru en fu a gemeente, den ben o libi en gi Satan. Na so a ben o tron wan pisi fu a grontapu pe Satan de leki gado nanga tiriman. Neleki fa „wan pikinso srudeki” e meki „ala blon” sweri, na so a man disi ben e prenki a „sondu” di ben e pasa na ini a gemeente. A gemeente ben o sori taki den abi a yeye fu Gado te den ben o puru a „sondu” na den mindri. Dati wani taki dati den ben o puru a man disi fu a gemeente (1Kor 5:6, 7). Na so Paulus ben libi Himeneyus nanga Aleksander gi Satan, fu di den ben drai baka gi na anbegi èn den ben lasi a bun konsensi fu den. A bribi fu den kon lasi, neleki wan sipi di sungu.​—1Ti 1:20.

Diki moro dipi

it-2-O 1255

Wet

Wet gi engel. Engel, di hei moro libisma, musu hori densrefi na den wet nanga den komando fu Gado tu (Heb 1:7, 14; Ps 104:4). Yehovah ben taigi srefi en feanti Satan san a musu du èn san a no ben musu du (Yob 1:12; 2:6). A gran engel Mikael, ben e si Yehovah leki a Moro Hei Krutuman èn a ben abi lespeki gi en. Dati meki di a no ben agri nanga Didibri, a taigi en: „Meki Yehovah strafu yu” (Yud 9; luku Sak 3:2). Yehovah Gado meki ala den engel saka densrefi na ondro Yesus Krestes di kisi glori (Heb 1:6; 1Pe 3:22; Mt 13:41; 25:31; Fil 2:9-11). Na fu dati ede Yesus ben man seni wan engel fu tyari wan boskopu gi Yohanes (Opb 1:1). Toku na ini 1 Korentesma 6:3 na apostel Paulus e taki dati den brada fu Krestes o kisi a frantwortu fu krutu engel. Wi kan bribi disi fu di den o yepi tu fu krutu ogri yeye.