MWBR19 11 Verwijzing gi Wi Kresten libi nanga a preikiwroko studie-buku
4-10 NOVEMBER
GUDU NA INI GADO WORTU | 1 YOHANES 1-5
„No lobi grontapu nanga den sani fu grontapu”
Diki moro dipi
it-2-O 1105 ¶2
Gi pardon
A fiti taki wi e begi Yehovah fu gi trawan pardon, awinsi wi e begi gi wan heri gemeente. Moses ben du dati gi a pipel fu Israel di a ben taki fu a sondu fu a pipel, èn Yehovah piki a begi fu en (Nu 14:19, 20). Boiti dati, di Salomo ben e gi a tempel abra, dan a begi Yehovah fu gi a pipel pardon te den ben drai baka gi den sondu fu den (1Kow 8:30, 33-40, 46-52). Esra begi Gado na fesi ala sma fu taigi en sortu sondu den Dyu di ben drai go baka ben du. Fu di a ben begi fayafaya, meki a pipel du san ben de fanowdu so taki Yehovah gi den pardon (Esr 9:13–10:4, 10-19, 44). Yakobus e agersi wan Kresten di bribi kon swaki nanga wan sma di siki. A e gi en a rai fu kari den owruman fu a gemeente fu begi gi en, èn „efu a du sondu, dan a o kisi pardon fu dati” (Yak 5:14-16). Ma „wan sondu de di e tyari dede kon” èn dati na te wan sma sondu teige a santa yeye. Wan sma di e sondu na a fasi disi e sondu fu espresi èn a no o kisi pardon. Wan Kresten no musu begi gi sma di e sondu na a fasi disi.—1Yh 5:16; Mt 12:31; Heb 10:26, 27.
11-17 NOVEMBER
GUDU NA INI GADO WORTU | 2 YOHANES 1–YUDAS
„Wi musu feti fu tan na ini a waarheid”
Diki moro dipi
it-2-O 206
Fesa di e sori taki sma lobi makandra
Bijbel no e taki san na den fesa disi noso omeni leisi sma ben e hori den (Yud 12). A no Masra Yesus Krestes noso den apostel fu en ben taigi den Kresten fu hori den fesa disi. Soleki fa a sori, den no ben de fruplekti fu hori den èn den no ben abi fu du dati fu ala ten. Sma e taki dati son leisi gudu Kresten ben e hori nyanyan fesa èn den ben e kari pôti Kresten kon tu. Na den fesa dati pikin di no ben abi papa, uma di masra ben dede kaba, gudusma, nanga pôtiwan ben e nyan nanga makandra leki brada nanga sisa.
it-2-O 755
Bigi ston
Soleki fa a sori, a wortu spilas na wan tra Griki wortu di abi fu du nanga wan bigi ston di kibri na ondro watra. Yudas e gebroiki a wortu disi fu taki fu son man di ben boro kon na ini a Kresten gemeente nanga takru prakseri. Neleki fa bigi ston di kibri na ondro watra kan sungu sipi, na so den man disi ben kan tyari problema kon gi sma na ini a gemeente. Yudas e taki fu den man disi: „Te den sma disi e kon na den fesa di unu e hori fu sori taki unu lobi makandra, den de leki bigi ston di kibri na ondro watra.”—Yud 12.
25 NOVEMBER–1 DECEMBER
GUDU NA INI GADO WORTU | OPENBARING 4-6
„Den fo man tapu den asi”
Diki moro dipi
re-O 76-77 ¶8
Yehovah en kefalek moi kownusturu na hemel
Yohanes ben sabi taki Gado ben poti priester fu dini na ini a tabernakel na ini owruten. Dati meki a ben musu fu fruwondru di a si a sani di a e taki now: „Lontu a kownusturu, tutenti na fo kownusturu ben de èn mi ben si tutenti na fo owru man e sidon na tapu den kownusturu disi. Den ben weri weti krosi èn na tapu den ede den ben weri gowtu kownu-ati” (Openbaring 4:4). Iya, na presi fu priester, 24 owru man ben e sidon na tapu kownusturu èn den ben weri kownu-ati. Suma na den owru man disi? Den na den salfuwan fu a Kresten gemeente di kisi wan opobaka èn di e tiri na hemel soleki fa Yehovah ben pramisi den. Fa wi du sabi dati?