Verwijzing gi „Wi Kresten libi nanga a preikiwroko studie-buku”

Verwijzing gi Wi Kresten libi nanga a preikiwroko studie-buku

8-14 MEI

GUDU NA INI GADO WORTU | 2 KRONIKI 20-21

’Frutrow tapu Yehovah un Gado’

Diki moro dipi

it-1-O 1334 ¶6-7

Yoram

Wan reide fu san ede Yoram no ben e arki Yehovah, na fu di a ben meki den takru fasi fu en wefi Atalia abi krakti na en tapu. A no teki na eksempre fu en papa Yosafat (2Kw 8:18). Boiti taki Yoram kiri den siksi brada fu en nanga wan tu granman fu Yuda, a ben meki a pipel fu Yuda drai baka gi Yehovah èn go anbegi falsi gado (2Kr 21:1-6, 11-14). A heri pisi ten di Yoram ben e tiri leki kownu, den ben abi problema na ini a kondre èn den trakondre sma ben e kon feti nanga den. Den Edomsma opo densrefi teige Yuda èn baka dati de sma fu Libna du dati tu (2Kw 8:20-22). A profeiti Elia warskow Yoram na ini wan brifi. A taigi en: „Fu dati ede Yehovah o meki taki bigi ogri miti a pipel fu yu, den manpikin fu yu, nanga den wefi fu yu.” Boiti dati, yu Kownu Yoram „o lasi ala den gudu fu yu tu. Yu o kisi ala sortu siki. Yu o siki na yu bere. Dei fu dei a siki disi o kon moro ogri. A o kon so hebi taki yu inibere o komoto kon na doro.”—2Kr 21:12-15.

A pasa soleki fa Elia ben taki. Yehovah gi pasi taki den Filisteasma nanga den Arabiri ben broko kon ini a kondre èn den teki den wefi fu Yoram nanga den manpikin fu en. Gado ben meki Yoahas (di nen Ahasia tu) lowe gwe fu man tan na libi. A ben du disi soso fu di a ben meki wan Kownukondre frubontu nanga David. „Baka dati Yehovah meki Yoram kisi wan takru siki na en bere. A siki disi no ben man dresi.” Tu yari baka dati „en inibere komoto kon na doro” èn safrisafri a dede. Na so a libi fu na ogri-ati man disi kon na wan kaba èn „nowan sma ben e sari taki a dede”. Den beri en na ini a foto fu David „ma den no beri en na a beripe fu den kownu”. En manpikin Ahasia ben tron kownu ini en presi.—2Kr 21:7, 16-20; 22:1; 1Kr 3:10, 11.

15-21 MEI

GUDU NA INI GADO WORTU | 2 KRONIKI 22-24

„Yehovah e blesi den wan di abi deki-ati”

it-1-O 265 ¶8

Beri, Beripe

A Granpriester Yoyada, di ben de wan reti-ati man ben kisi a grani fu beri na ini „a Foto fu David na a beripe pe den ben gwenti beri den kownu”. En na a wan-enkri sma di no ben de fu a famiri fu kownu di ben kisi a grani disi.—2 Kr 24:15, 16.

22-28 MEI

GUDU NA INI GADO WORTU | 2 KRONIKI 25-27

„Yehovah man gi yu moro leki dati srefi”

it-1-O 1302 ¶4

Yoas

Yoas ben yuru 100.000 srudati fu en sosrefi gi a kownu fu Yuda fu feti nanga den Edomsma. Ma di a „man fu a tru Gado” gi en rai, dan a bosroiti fu seni den go na oso, aladi a ben pai den 3.420 kilo solfru ($660,600) kaba. Den srudati ati ben bron srefisrefi di kownu seni den gwe, kande fu di den ben e denki taki den no ben o kisi a moni dati moro. Dati meki di den drai baka, den fufuru den gudu na ini den foto fu a zuidsei kownukondre fu Samaria (pe den ben seti kampu kande) te go miti Bet-Horon.—2Kr 25:6-10, 13.

5-11 YUNI

GUDU NA INI GADO WORTU | 2 KRONIKI 30-31

„Wi o kisi wini te wi e go na den konmakandra”

it-1-O 1059 ¶1

Heskia

Fu di a pipel no ben sreka densrefi fu kon santa, meki den no ben man hori a Paskafesa na a ten di a ben musu hori. Dati meki Heskia gebroiki a wet di ben e gi pasi taki den wan di no ben de santa ben man hori a Paskafesa wàn mun baka dati. Nanga yepi fu boskopuman a seni brifi gi Yuda nanga Israel, gi ala Israelsma fu Berseiba te go miti Dan. Furu fu den sma disi ben e spotu den boskopuman. Ma sonwan fu den sma, spesrutu fu a lo fu Aser, Manase nanga Seibulon ben abi sakafasi èn den go na Yerusalem. Wan tu sma fu Efrayim nanga Isaskar go tu nanga den. Boiti dati, furu anbegiman fu Yehovah di no ben de Israelsma ben drape. A no ben makriki gi den sma fu a noordsei kownukondre di ben e horibaka gi a tru anbegi fu go na a Paskafesa. Neleki den boskopuman, sma ben o gens den èn spotu den tu. Disi ben o pasa fu di den sma fu a tin-lo kownukondre ben go na baka na yeye fasi èn ben e anbegi falsi gado. Wan tra sani na taki den Asiriasma ben kon feti ibri leisi baka nanga a tin-lo kownukondre.—2Kr 30:1-20; Nu 9:10-13.

it-1-O 1059 ¶2-3

Heskia

Baka di den tyari a Paska-ofrandi, den hori a fesa fu brede sondro srudeki seibi dei langa nanga bigi prisiri. A pipel ben prisiri so te taki den bosroiti fu hori a fesa ete seibi dei. Srefi na ini a muilek pisi ten dati, a blesi fu Yehovah ben de krin fu si èn „bigi prisiri ben de na ini Yerusalem. Sensi a ten fu Salomo, a manpikin fu Kownu David fu Israel, sma no ben meki so furu prisiri na ini Yerusalem leki na a ten dati.”—2Kr 30:21-27.

A fesa disi no ben de wan fesa pe sma ben e sori nomo taki den e sari fu di den abi berow, ma a ben de wan konmakandra pe a tru anbegi ben seti kon bun baka trutru. Den sani di e kon now e sori dati krin. Fosi den Israelsma drai go baka na oso, den broko den santa pilari na pisipisi, den koti den santa postu trowe, den broko den hei presi nanga den altari puru pe sma ben e anbegi falsi gado na ini Yuda, Benyamin èn srefi na ini Efrayim nanga Manase (2Kr 31:1). Heskia ben gi wan moi eksempre, fu di a broko a kopro sneki di Moses ben meki na pisipisi. A du dati fu di den Israelsma ben teki a kopro sneki leki wan gado èn den ben e tyari smoko-ofrandi gi en (2Kw 18:4). Di den kaba hori a fesa, Heskia sorgu taki a tru anbegi tan. A orga a priester wroko baka na a tempel èn a prati den priester nanga den Leifisma na ini den difrenti grupu fu den. A seti sani tu fu horibaka gi a wroko di ben du na a tempel. Boiti dati, Heskia taigi a pipel fu gi yesi na a wet di e taki dati den ben musu gi den Leifisma nanga den priester a di fu tin pisi fu den sani di den ben abi nanga den fosi nyanyan fu den. Èn a pipel ben agri fu du dati nanga den heri ati.—2Kr 31:2-12.

12-18 YUNI

GUDU NA INI GADO WORTU | 2 KRONIKI 32-33

„Gi yu brada nanga sisa deki-ati na ini muilek ten”

it-1-O 188 ¶1

Asiria

Sanherib. Sanherib, a manpikin fu Sargon II, go feti nanga a kownukondre Yuda na ini a di fu 14 yari di Heskia ben e tiri (732 Fosi Krestes) (2Kw 18:13; Yes 36:1). Den sani di Akas, a papa fu Heskia ben du meki taki den ben kon de ondro a kownu fu Asiria. Ma bakaten Heskia opo ensrefi teige a kownu fu Asiria (2Kw 18:7). Dati meki Sanherib hari go feti nanga Yuda èn a teki 46 foto abra (luku sosrefi Yes 36:1, 2). Baka dati, di a ben de na en legrekampu na Lakis, a seni taigi Heskia taki a musu pai en belasting-moni fu 30 gowtu talenti (sowan $11.560.000) nanga 300 solfru talenti (sowan $1.982.000) (2Kw 18:14-16; 2Kr 32:1; luku sosrefi Yes 8:5-8). Aladi den pai a moni, toku Sanherib seni en takiman go taigi den sma fu Yerusalem taki den alamala ben musu gi densrefi abra na en (2Kw18:17–19:34; 2Kr 32:2-20). Baka di Yehovah kiri 185.000 srudati fu a legre fu en na ini wan neti, dan na Asiria man disi di ben e meki bigi, ben musu drai go baka na Ninefei (2Kw 19:35, 36). Bakaten, tu manpikin fu en kiri en drape èn Esar-Hadon, wan tra manpikin fu en, tron kownu (2Kw 19:37; 2Kr 32:21, 22; Yes 37:36-38). A tori disi skrifi na tapu wan pisi kleidoti fu owruten di e taki fu Sanherib èn tapu wan trawan di e taki fu Esar-Hadon. Ma den no e taki fa a legre fu a Asiria kisi pori.—FOWTOW, Vol. 1, blz. 957.