Verwijzing gi „Kresten libi nanga preikiwroko Studie-buku”

Verwijzing gi Wi Kresten libi nanga a preikiwroko studie-buku

25 SEPTEMBER–1 OKTOBER

GUDU NA INI GADO WORTU | ESTER 9-10

„A gebroiki a makti fu en fu yepi en pipel”

it-2-O 365 ¶2

Mordekai

Now Mordekai di tron a fosi minister na presi fu Haman, kisi a linga fu kownu fu man poti stampu na tapu papira. Ne Ester poti Mordekai leki edeman fu na oso fu Haman, fu di kownu ben gi en na oso dati. Baka dati Mordekai meki den skrifi wan brifi ini a nen fu kownu èn a stampu en nanga a linga fu kownu. A brifi ben abi wan wet na ini. A wet disi ben o yepi den Dyu fu man feti gi den libi. Den Dyu ben e firi leki wan hebi komoto na den tapu. Den ben breiti srefisrefi èn den ben e bari fu prisiri. Furu fu den Persiasma ben e horibaka gi den Dyu. Èn tapu 13 Adar den Dyu ben de klariklari fu go feti. Fu di Mordekai ben abi furu makti meki heihei sma ben e horibaka gi en tu. Tapu 14 Adar, den ben feti go doro na ini a foto Susan. Den Dyu kiri moro leki 75.000 fu den feyanti fu den ini Persia. Den kiri den tin manpikin fu Haman sosrefi (Est 8:1–9:18). Mordekai nanga Ester ben skrifi wan brifi taki den Dyu ben musu hori wan fesa ibri yari, tapu 14 nanga 15 Adar. Den ben e kari en a „Purimfesa” fu di den ben e prisiri, den ben e nyan, den ben e gi makandra sani èn den ben e seni kado gi den pôtiwan. Ala den Dyu, den bakapikin fu den nanga den sma di ben e libi na den mindri ben musu memre a dei disi. Leki a moro prenspari man baka Kownu Ahasferos, a pipel fu Gado ben e lespeki Mordekai èn a ben e du bun gi a pipel.—Est 9:19-22, 27-32; 10:2, 3.

it-2-O 620 ¶4

Purim

A marki fu en. Son sabiman e taki dati a Purimfesa di den Dyu e hori ini a ten disi, no abi noti fu du nanga kerki èn son leisi den e du orgi tu. Ma dati no ben de so di a fesa ben seti. Mordekai nanga Ester ben de anbegiman fu Yehovah Gado, èn den ben seti a fesa disi fu gi Yehovah grani. Fu di Mordekai ben wani dini Yehovah wawan meki den ben wan kiri den Dyu. Ma Yehovah frulusu den na ten dati èn na en ben musu kisi a grani. A kan taki Haman ben de wan Amalèksma, wan pipel di Yehovah ben taki dati ben musu kisi pori. Mordekai ben e lespeki a kommando fu Gado èn a ben e weigri fu boigi gi Haman (Est 3:2, 5; Eks 17:14-16). Mordekai ben seni taigi Ester taki, efu en no ben o du wan sani dan den Dyu ben o kisi frulusu na wan tra fasi (Est 4:14). Dati meki Ester faste fosi a go na kownu. Disi e sori taki Ester ben begi Gadu fu yepi den. A gi kownu wan kari fu kon nyan na en oso, pe a taigi kownu san a ben kan du gi en.—Est 4:16.

16-22 OKTOBER

GUDU NA INI GADO WORTU | YOB 6-7

„Te a gersi leki a libi hebi tumusi”

g-O 1/12 16-17

Te yu e firi leki yu wani gi abra na ini a libi

Awansi a situwâsi fu yu hebi so te taki a e meki yu lasi-ati, hori na prakseri taki yu no de yu wawan. A sari taki pikin moro ala sma na ini a ten disi abi wan problema. Bijbel e taki: „Ala den sani di Gado meki, e geme doronomo èn den alamala abi pen te now ete” (Romesma 8:22). Tapu a momenti disi a kan gersi leki den problema fu yu no man lusu, ma nofo tron wan kenki kan kon na ini a situwâsi fu yu baka wan pisiten. Ma san kan yepi wi na ini a pisiten dati?

Fruteri wan lepi mati di yu e frutrow fa yu e firi. Bijbel e taki: „Wan trutru mati e sori lobi ala ten. En na wan brada di gebore fu te nowtu de” (Odo 17:17). A reti-ati man Yob di kari na ini Bijbel, ben taki krin fa a ben e firi na a ten di a ben abi furu problema. Di a ben firi leki a ben e ’tegu trutru gi a libi fu en’, a taki: „Meki mi taki fu den broko-ede fu mi. Sani e moro mi. Meki mi taki!” (Yob 10:1) Te yu e fruteri trawan fa yu e firi, dan dati kan yepi yu fu firi moro bun èn fu si den problema fu yu na a yoisti fasi.

Fruteri Yehovah ala san de tapu yu ati. Son sma e denki taki begi na wan sani di e meki sma firi bun nomo. Ma Bijbel e taki wan tra sani. Psalm 65:2 e kari Yehovah Gado a „sma di e arki begi,” èn 1 Petrus 5:7 e taki: „a e broko en ede nanga unu.” Bijbel e sori wi ibri tron baka o prenspari a de fu frutrow tapu Gado, fu eksempre:

„Frutrow na tapu Yehovah nanga yu heri ati. No frutrow na tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti.”—ODO 3:5, 6.

„San den wan di abi lespeki gi [Yehovah] e angri fu kisi, na dati a o gi den.Te den e bari suku yepi na en, a o yere den èn a o frulusu den.”—PSALM 145:19.

„Wi sabi taki awansi san wi e aksi en, a e yere wi, solanga a e kruderi nanga a wani fu en.”—1 YOHANES 5:14.

„Yehovah de fara fu den ogriwan, ma a e yere den begi fu den reti-ati sma.”—ODO 15:29.

Efu yu fruteri Yehovah den problema di yu abi, a o yepi yu. Bijbel abi wan bun reide fu san ede a e gi yu deki-ati fu ’frutrow tapu Gado ala ten. . . Fruteri en ala san de na tapu yu ati.’—Psalm 62:8.

30 OKTOBER–5 NOVEMBER

GUDU NA INI GADO WORTU | YOB 11-12

„Dri fasi fa wi kan feni koni èn kisi wini fu dati”

it-2-O 1276 ¶5

Koni

A koni fu Gado. Bijbel e kari Yehovah Gado, a Gado di „abi ala koni” fu di nowan sma de di koni leki en (Ro 16:27; Opb 7:12). Koni abi fu du nanga buweisi. Fu di Yehovah na a Mekiman èn a Gado di de „ala ten kaba” (Ps 90:1, 2), meki a sabi ala sani fu hemel nanga grontapu. A sabi fa hemel nanga grontapu meki, den sani di de na ini èn fa sani waka fu a bigin teleki now. Te wi luku den sani di Gado meki, soleki a watra nanga a winti di no e kon na wan kaba, dan den sani disi na sani di sabiman e gebroiki te den e ondrosuku èn meki sani. Den e frutrow tapu den sani di Gado meki, fu di sondro den sani disi den no ben o man du noti (Yob 38:34-38; Ps 104:24; Odo 3:19; Yer 10:12, 13). Fu taki en leti, a fasi fa Gado wani taki wi musu tyari wisrefi moro prenspari, fu di a e yepi wi fu teki bun bosroiti na ini wi libi èn fu si sani na a yoisti fasi. Den sani disi e tyari bun bakapisi gi libisma (De 32:4-6; Luku YEHOVAH [Een God met morele normen en maatstaven]). Noti no de di Gado no man frustan (Yes 40:13, 14). Aladi a e gi pasi taki sani e pasa di no e kruderi nanga a wani fu en, èn taki den sani disi e kon moro furu dei fu dei, toku na ini a ten di e kon sani o pasa soleki fa en wani. Den sani di a taki „musu fu abi bun bakapisi.”—Yes 55:8-11; 46:9-11.