Tan sori bun-ati gi makandra

1-2. Sortu bun reide wi abi fu sori bun-ati gi makandra?

WI ABI bun reide fu sori bun-ati gi makandra. San na wan tu fu den reide dati? Luku sortu piki wi e kisi na ini a Bijbel buku Odo: „Ala ten yu musu sori bun-ati èn du san yu e pramisi. . . . Dan Gado nanga libisma o prisiri nanga yu èn den o si yu leki wan sma di man frustan a dipi fu wan tori.” „Wan man di e sori trawan bun-ati e tyari wini gi ensrefi.” „A sma di e suku fu du san reti èn fu sori bun-ati o feni libi.”​—Odo 3:3, 4; 11:17; 21:21.

² Den Bijbeltekst disi e kari dri reide fu san ede wi musu sori bun-ati. A fosiwan na taki te wi e sori bun-ati dan Gado e prisiri nanga wi. A di fu tu reide na taki wi e kisi wini nownow kaba te wi e sori bun-ati. Fu eksempre, wi o de bun mati fu trawan. A di fu dri reide na taki te wi e sori bun-ati wi o kisi blesi na ini a ten di e kon, soleki têgo libi. Iya, wi abi bun reide fu gi yesi na a rai fu Yehovah: „Sori bun-ati nanga sari-ati gi trawan.”​—Sak. 7:9.

3. Sortu aksi o kisi piki na ini na artikel disi?

³ Na ini na artikel disi wi o piki fo aksi. Gi suma wi musu sori bun-ati? San wi kan leri fu bun-ati na ini a Bijbel buku Rut? Fa wi kan sori bun-ati na ini a ten disi? Sortu wini wi e kisi te wi e sori bun-ati?

GI SUMA WI MUSU SORI BUN-ATI?

4. Fa wi kan sori bun-ati neleki Yehovah? (Mark. 10:29, 30)

⁴ Na ini na artikel na fesi wi leri taki Yehovah e sori bun-ati soso gi den sma di lobi en èn di e dini en. Fu têgo a o tai hori na den fu di a lobi den (Dan. 9:4). Wi wani „teki na eksempre fu Gado leki lobi pikin” (Ef. 5:1). Dati meki wi wani leri fa wi kan tai hori na wi brada nanga sisa fu di wi lobi den.​—Leisi Markus 10:29, 30.

5-6. Sortu eksempre kan yepi wi fu frustan san a wani taki fu tai hori na wan sma noso na wan sani?

⁵ A de krin taki o moro wi e frustan san bun-ati wani taki, o moro wi o sabi fa wi kan sori a fasi disi gi wi brada nanga sisa. Fu frustan moro bun san bun-ati wani taki, wi o luku fu san ede bun-ati wani taki moro leki fu tai hori na wan sma noso wan sani. Luku wan eksempre.

⁶ Kon meki wi taki dati wan man e wroko gi wan bedrijf furu yari kaba. Kande wi ben o taki dati so wan wrokoman tai hori na a bedrijf disi fu di a tan wroko so langa drape. Ma a no e du a wroko fu di a lobi den sma di abi a bedrijf. Kande noiti a no miti den srefi èn kande a no lobi ala den bosroiti di e teki ini a bedrijf. A e tan wroko drape soso fu di a musu du wan wroko fu kan kisi moni. A man o wroko gi a bedrijf teleki a go nanga pensyun noso teleki a feni wan wroko di e pai moro bun.

7-8. (a) San prenspari moro leki fu tai hori na wan sma? (b) Fu san ede wi o taki fu wan tu vers na ini a Bijbel buku Rut?

⁷ Te wan sma e tai hori na wan trawan noso na wan sani, dan dati bun. Ma san moro prenspari na fu san ede a sma wani du dati. Bijbel e sori wi fu san ede futuboi fu Gado ben tai hori na makandra. A no fu di den ben musu du dati, ma fu di den ben wani du dati nanga den heri ati. Luku na eksempre fu David. A ben lobi en mati Yonatan nanga en heri ati, aladi Yonatan en papa ben wani kiri David. Furu yari baka di Yonatan dede a bun-ati fu David meki taki a bigin sorgu gi Mefiboset, a manpikin fu Yonatan.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Wi o leri moro fu bun-ati te wi ondrosuku wan tu vers na ini a Bijbel buku Rut. Sortu moi les den sma na ini a buku disi e leri wi fu bun-ati? Fa wi kan du den sani di wi leri te wi de na ini wi gemeente?b

SAN WI KAN LERI FU BUN-ATI NA INI A BIJBEL BUKU RUT?

9. Fu san ede Naomi ben e denki taki Yehovah ben gowe libi en?

⁹ A Bijbel buku Rut e fruteri a tori fu Naomi, Rut, a frow fu en manpikin, nanga Boas, wan man di ben lobi Gado èn di ben de wan famiri fu Naomi en masra. Di wan angriten ben de na ini Israel, dan Naomi, en masra, nanga den tu manpikin fu den, froisi go tan na Moab. Drape Naomi en masra dede. Den tu boi fu en trow, ma baka wan pisi ten den srefi dede tu (Rut 1:3-5; 2:1). Den sari sani disi di miti Naomi ben meki a lasi-ati moro nanga moro. A ben firi brokosaka so te taki a bigin denki taki Yehovah ben gowe libi en. Luku san a ben taki fu Gado: „Yehovah drai baka gi mi.” „Na Almaktiwan tyari soso sari kon na ini mi libi.” Naomi ben taki tu: „Na Yehovah srefi gi mi syen èn . . . na Almaktiwan srefi meki taki problema miti mi.”​—Rut 1:13, 20, 21.

10. San Yehovah du di Naomi taki fa a ben firi?

¹⁰ San Yehovah du di Naomi taki fa a ben firi? A no drai baka gi Naomi. Na presi fu dati Yehovah sori taki a e firi gi en. Yehovah e frustan taki ’te wan koni sma e pina, dan a kan du law sani’ (Preik. 7:7). Ma Naomi ben abi yepi fanowdu fu frustan taki Yehovah no ben gowe libi en. Fa Gado yepi en? (1 Sam. 2:8) A meki Rut sori bun-ati gi Naomi. Rut ben wani sori lobi gi Naomi, èn na wan switi fasi a yepi en fu kisi ensrefi baka èn fu frustan taki Yehovah ben lobi en ete. San na eksempre fu Rut e leri wi?

11. Fu san ede furu brada nanga sisa di abi switifasi e du muiti fu yepi den wan di e firi sari?

¹¹ Te wi abi bun-ati, wi o du muiti fu yepi den wan di e firi sari. Neleki fa Rut ben tan na Naomi sei, na so furu brada nanga sisa di abi switifasi e tan du muiti fu yepi den wan na ini a gemeente di e sari noso di lasi-ati. Fu di den lobi den brada nanga sisa, meki den wani du ala san den man fu yepi den (Odo 12:25; 24:10). Dati na san na apostel Paulus e taigi wi fu du: „Taki na wan fasi di e trowstu den sma di lasi-ati. Yepi den swakiwan èn abi pasensi nanga ala sma.”​—1 Tes. 5:14.

12. San na a moro bun fasi fu yepi wan brada noso sisa di lasi-ati?

¹² Nofo tron a moro bun fasi fa wi kan yepi wan brada noso sisa di lasi-ati, na fu arki en èn fu gi en a dyaranti taki yu lobi en. Wi Gado e warderi a muiti di yu e du fu yepi wan fu den warti skapu fu en (Ps. 41:1). Odo 19:17 e taki: „A sma di e du bun gi den mofinawan e leni Yehovah èn A o pai a sma dati baka gi den bun di a du.”

13. Fa Rut ben de tra fasi leki Orpa, èn fu san ede wi kan taki dati a bosroiti di Rut ben teki ben sori taki a ben abi bun-ati? (Luku a fowtow na tapu a kafti.)

¹³ Wi kan frustan moro bun san bun-ati wani taki te wi e luku san pasa nanga Naomi, baka di en masra nanga den tu boi fu en dede. Di Naomi yere taki ’Yehovah poti prakseri na en pipel èn taki a ben e meki den feni nyanyan baka’, a bosroiti fu drai go baka na oso (Rut 1:6). Rut nanga Orpa, di ben trow nanga den boi fu en, go makandra nanga en. Di den ben de na pasi, Naomi taigi den tu uma dri leisi fu drai go baka na Moab. San den du? Wi e leisi: „Orpa bosi a mama fu en masra èn a gowe, ma Rut tan nanga Naomi” (Rut 1:7-14). Orpa du san Naomi taigi en fu du, èn a drai go baka na Moab. Ma Rut du moro leki san Naomi taigi en fu du. A ben kan teki a bosroiti fu gowe libi Naomi, ma fu di Rut ben abi bun-ati èn fu di a ben wani yepi Naomi, meki a bosroiti fu tan nanga en (Rut 1:16, 17). Rut no tan nanga Naomi fu di a ben musu du dati, ma fu di a ben wani du dati. Rut sori taki a ben abi bun-ati trutru. Sortu moi les wi kan leri fu a tori disi?

14. (a) Sortu bosroiti furu brada nanga sisa na ini a ten disi e teki? (b) Soleki fa Hebrewsma 13:16 e sori, dan nanga sortu ofrandi Gado e prisiri?

¹⁴ Te wi abi bun-ati, wi o du moro leki san sma e fruwakti fu wi. Soleki fa a ben de na ini owruten, furu brada nanga sisa na ini a ten disi sori bun-ati gi tra Kotoigi, srefi efu den no miti den noiti ete. Fu eksempre, te den brada nanga sisa disi yere taki wan rampu pasa, dan wantewante den wani sabi fa den kan yepi. Efu wan sma ini a gemeente abi moni problema, den no e draidrai fu luku san a sma dati abi fanowdu èn fa den kan yepi en. Neleki den Masedoniasma fu a fosi yarihondro, den e du moro leki san sma e fruwakti fu den. Den e gi den ten nanga den sani di den abi, iya ’moro leki san den man gi’ srefi, soso fu yepi den brada nanga sisa di de na nowtu (2 Kor. 8:3). Wi kan de seiker taki Yehovah e prisiri te a e si fa den e sori bun-ati!​—Leisi Hebrewsma 13:16.

FA WI KAN SORI BUN-ATI NA INI A TEN DISI?

15-16. San e sori wi taki Rut tan meki muiti fu yepi Naomi?

¹⁵ Wi e leri moi les te wi ondrosuku fa Rut yepi Naomi. Kon meki wi taki fu wan tu fu den.

¹⁶ Tan meki muiti fu yepi. Di Rut taigi Naomi taki a ben o go makandra nanga en na Yuda, dan biginbigin Naomi no ben wani. Ma Rut no gi abra. San ben de a bakapisi? „Di Naomi si taki Rut ben de nomonomo fu go nanga en, dan a no taki noti moro.”​—Rut 1:15-18.

17. San o yepi wi fu no gi abra te wi e pruberi fu yepi wan sma?

¹⁷ San disi e leri wi: Wi musu abi pasensi nanga sma di e firi sari, ma wi musu tan pruberi fu yepi den. Biginbigin, wan sisa di abi yepi fanowdu e taki kande dati a no wani wi yepi en.c Ma efu wi abi bun-ati, dan wi o tan pruberi fu yepi en (Gal. 6:2). Wi e howpu taki te fu kaba a sisa o gi wi na okasi fu yepi en èn fu trowstu en.

18. San Naomi du di ben kan hati Rut?

¹⁸ No firi wan fasi efu wan sma taki wan sani di kan hati yu. Di Naomi nanga Rut doro na Betlehem, Naomi miti den sma di a ben sabi kaba. Dan a taigi den: „Di mi gowe, mi ben abi ala sani, ma Yehovah meki mi drai kon baka nanga soso anu” (Rut 1:21). Prakseri fa Rut ben firi di a yere Naomi taki den sani disi! Rut ben du ala san a man fu yepi Naomi. Rut krei makandra nanga en, a trowstu en èn a waka a langa pasi nanga en. Aladi Rut du so furu sani, toku Naomi taki: „Yehovah meki mi drai kon baka nanga soso anu.” Di Rut ben e tanapu leti sei Naomi èn a yere ala den sani di Naomi taki, a ben kan denki taki Naomi no ben warderi a muiti di a meki fu yepi en. Disi ben musu fu hati Rut! Ma toku a tan nanga Naomi.

19. San o yepi wi fu tan yepi wan sma di lasi-ati?

¹⁹ San disi e leri wi: Wan sisa di lasi-ati kan taki wan sani di e hati wi, aladi wi du furu muiti fu yepi en. Ma wi e pruberi fu no mandi nanga a sisa. Wi o tan yepi wi sisa di de na nowtu, èn wi o aksi Yehovah fu gi wi a koni fu man trowstu en.​—Odo 17:17.

20. San gi Rut a krakti di a ben abi fanowdu fu yepi Naomi go doro?

²⁰ Gi sma deki-ati na a yoisti ten. Rut ben sori bun-ati gi Naomi, ma Rut srefi ben abi deki-ati fanowdu tu. Èn Yehovah gebroiki Boas fu gi en deki-ati. Boas ben taigi Rut: „Meki Yehovah pai yu fu den sani di yu du èn meki a de so taki yu kisi bigi blesi fu Yehovah, a Gado fu Israel, a sma pe yu kon suku wan kibripresi.” Den moi wortu disi doro Rut en ati. Dati meki a piki Boas: „Yu trowstu mi. Na wan switi fasi yu taki nanga mi” (Rut 2:12, 13). Den moi wortu di Boas taki na a yoisti ten, gi Rut a krakti di a ben abi fanowdu fu tan go doro.

21. Soleki fa Yesaya 32:1, 2 e sori, dan san lobi-ati owruman o du?

²¹ San disi e leri wi: Son leisi sma di e sori bun-ati gi trawan abi deki-ati fanowdu tu. Neleki fa Boas prèise Rut di a si fa Rut ben yepi Naomi, na so owruman na ini a ten disi e prèise brada nanga sisa na ini a gemeente te den si fa den e yepi trawan na wan switi fasi. A deki-ati di den brada nanga sisa disi e kisi na a yoisti ten o gi den a krakti di den abi fanowdu fu yepi trawan go doro.​—Leisi Yesaya 32:1, 2.

SORTU WINI WI E KISI TE WI E SORI BUN-ATI?

22-23. Fa Naomi ben firi te fu kaba? San yepi en fu kenki? (Psalm 136:23, 26)

²² Baka wan pisi ten Boas gi Rut nanga Naomi bun furu nyanyan (Rut 2:14-18). San Naomi du di Boas gi den so furu sani? A taki: „Meki a man dati kisi blesi fu Yehovah di e tan sori bun-ati gi den libiwan nanga den dedewan” (Rut 2:20a). Now Naomi ben e si sani heri tra fasi! Fosi, a ben taki nanga watra-ai: „Yehovah . . . gi mi syen,” ma now a ben taki nanga prisiri: „Yehovah . . . e tan sori bun-ati.” Fa a du kon taki Naomi no ben firi sari moro?

²³ Naomi si te fu kaba taki noiti Yehovah ben drai baka gi en. Yehovah ben gebroiki Rut fu horibaka gi en di a ben drai kon baka na Yuda (Rut 1:16). Naomi si tu taki Yehovah ben de nanga en di a gebroiki a lobi-ati man Boas fu yepi en nanga Rutd (Rut 2:19, 20b). Kande a ben e denki na ensrefi: ’Now fosi mi e frustan taki noiti Yehovah ben gowe libi mi. A heri pisi ten a ben de nanga mi!’ (Leisi Psalm 136:23, 26.) Naomi ben musu fu de nanga tangi taki Rut nanga Boas no ben tapu fu yepi en! Wi kan de seiker taki den ala dri ben breiti taki Naomi ben kisi ensrefi baka èn taki now a ben dini Yehovah nanga prisiri baka.

24. Fu san ede wi wani tan sori bun-ati gi wi brada nanga sisa?

²⁴ San a Bijbel buku Rut leri wi fu bun-ati? Efu wi abi bun-ati wi no o gi abra te wi e pruberi fu yepi brada nanga sisa di lasi-ati. Bun-ati e meki tu taki wi o du moro leki san sma e fruwakti fu wi, soso fu man yepi den. Na a yoisti ten owruman musu prèise brada nanga sisa di e sori bun-ati gi trawan. Te wi e si fa den wan di ben lasi-ati e kisi krakti baka èn den e prisiri baka fu dini Yehovah, dan wi e prisiri srefisrefi (Tori 20:35). Ma san na a moro prenspari reide fu san ede wi wani tan sori bun-ati? Fu di wi wani de leki Yehovah èn wi wani du san a feni bun, bika Yehovah abi „bun-ati pasa marki”.​—Eks. 34:6; Ps. 33:22.