Yu ben sabi a sani disi?
Fa den ston di sma feni na ini owruten Babilon èn a fasi fa den ston ben meki e sori taki Bijbel no e lei?
NA INI owruten Babilon, sabiman feni bun furu baka ston di sma ben gebroiki fu bow a foto. Sabiman Robert Koldewey e taki dati sma ben e baka den ston disi na ini onfu di ben de „dorosei fu a foto pe bun kleidoti nanga furu udu ben de fu meki faya”.
Owruten buku e sori taki den heiheiman fu Babilon ben e gebroiki den onfu tu fu du ogri-ati sani. Professor Paul-Alain Beaulieu di e ondrosuku a historia nanga a tongo fu owruten Asiria na a Universiteit fu Toronto, e taki: „Difrenti sani di sma fu Babilon ben skrifi e sori taki a kownu ben e gi komando fu trowe sma go na ini onfu fu bron den kiri te den ben trangayesi en èn te den no ben sori lespeki gi santa sani.” Fu eksempre, wan sani di sma ben skrifi na a ten fu Kownu Nebukadnesar, e taki: „Kiri den, bron den, losi den na ini na onfu fu a boriman, meki a smoko fu den opo go na loktu èn meki den dede na ini a faya.”
A sani disi e meki sma di e leisi Bijbel prakseri san skrifi na ini Danièl kapitel 3. Drape wi e leisi taki Kownu Nebukadnesar ben meki wan bun bigi gowtu popki tapu a Dura-lagipresi di ben de dorosei fu a foto Babilon. Di Sadrak, meisak, nanga Abedneikow, dri Hebrew yonguman, weigri fu boigi gi a popki, dan Nebukadnesar kisi bigi atibron. A meki sma faya na onfu „seibi tron moro leki fa sma ben gwenti du” èn a taigi den fu „trowe den [dri man disi] go na ini a faya onfu”. Wan tranga engel kon frulusu den so taki den no dede.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Wan baka ston di abi a nen fu Nebukadnesar na tapu
Den ston di sma feni na ini Babilon e sori tu taki Bijbel no e lei. Furu fu den ston disi abi wortu na tapu di e prèise a kownu. Tapu wan fu den ston skrifi: „Nebukadnesar, Kownu fu Babilon. A kownu-oso, di mi, a makti Kownu, bow. Meki den bakapikin fu mi tiri na ini fu ala ten.” Den wortu disi gersi a sani di skrifi na Danièl 4:30, pe Nebukadnesar ben e meki bigi: „A no disi na Babilon a Bigiwan di misrefi bow, a foto di de gi na oso fu Kownu? Na a foto disi mi bow nanga mi eigi krakti. A musu gi mi glori nanga bigi grani.”