Pruberi fu leri nyun sani te yu e studeri

Te wi e sreka wisrefi fu studeri, dan wi ben kan aksi wisrefi: ’San mi denki taki mi o leri tide?’ Ma wi musu hori na prakseri taki awinsi wi e denki taki wi o leri wan spesrutu sani, tòg a kan taki Yehovah wani leri wi nyun sani. Fa wi kan opo wi ati gi den nyun sani di Yehovah wani leri wi?

Begi fu kisi koni. Aksi Yehovah fu yepi yu fu si san a wani taki yu musu kon sabi nownow (Yak. 1:5). No de tevrede nanga den sani di yu sabi kba.​—Odo 3:5, 6.

Meki Gado Wortu abi krakti tapu yu libi. „A wortu fu Gado de na libi” (Hebr. 4:12). Sobun, ibri tron te wi leisi Gado Wortu wi kan leri nyun sani èn den sani disi kan yepi wi na difrenti fasi na ini wi libi. Ma, wi o ondrofeni dati soso te wi e opo wi ati gi den sani di Gado wani leri wi.

De nanga tangi gi ala sani di Yehovah e gebroiki fu gi wi leri. Den sani di Gado e leri wi de leki „a moro bun nyanyan” (Yes. 25:6). No denki taki yu no abi fu leisi sani di no e hari yu. Te yu de nanga tangi gi ala sani di Yehovah wani leri yu, dan Yehovah o man yepi yu fu tron wan moro bun sma èn yu o lobi den sani di yu e leri!