No de leki den sma fu a grontapu disi di e denki densrefi nomo

YU NO si taki furu sma na ini a ten disi feni taki den musu kisi spesrutu grani, taki den abi a reti fu du son sani, èn taki sma musu du san den e ferwakti fu den? Awansi san sma e du gi den, tòg den wani moro. Den sortu sma disi e denki densrefi nomo èn den no de nanga tangi gi den sani di den abi. Bijbel e taki dati furu sma ben o de so na ini den lasti dei.​—2 Tim. 3:2.

A no de fu taki dati a gwenti di sma abi fu denki densrefi nomo, a no wan sani fu tide. Adam nanga Eva ben wani besroiti gi densrefi san bun èn san ogri èn a sani dati tyari takru bakapisi kon gi ala libisma. Hondrohondro yari baka dati, Kownu Usia fu Yuda ben feni taki a ben abi a reti go na ini a tempel fu bron switismeri leki ofrandi, ma a sani dati no ben mag kwetkweti (2 Kron. 26:18, 19). Den Fariseiman nanga den Saduseiman ben de tu nanga a denki taki Gado ben musu du moro gi den leki san a ben e du gi tra sma, soso fu di den ben de bakapkin fu Abraham.​—Mat. 3:9.

Wi e libi na mindri sma di e denki densrefi nomo èn a denki fu den kan abi krakti na wi tapu (Gal. 5:26). Kande wi e bigin feni taki wi musu kisi wan spesrutu grani noso taki sma musu sori moro lespeki gi wi. San kan yepi wi fu no kon abi a denki disi? Wi musu ferstan fa Yehovah e denki fu a tori. Tu Bijbel gronprakseri o yepi wi.

Na Yehovah e besroiti san wi musu kisi. Luku wan tu eksempre.

• Yehovah wani taki wan masra musu firi taki a wefi fu en e lespeki en, èn wan wefi musu firi taki en masra lobi en (Ef. 5:33). Trowpatna musu sori lobifiri gi makandra w’wan èn gi nowan tra sma (1 Kor. 7:3). Boiti dati, p’pa nanga m’ma abi a reti fu ferwakti taki den pkin fu den e gi yesi na den, èn pkin mag ferwakti taki den p’pa nanga m’ma lobi den èn e sorgu gi den.​—2 Kor. 12:14; Ef. 6:2.

• Yehovah e taki dati wi musu lespeki den owruman di e wroko tranga na ini a gemeente (1 Tes. 5:12). Ma den owruman no abi a reti fu prei basi gi den brada nanga sisa.​—1 Petr. 5:2, 3.

• Gado gi den tiriman fu grontapu a reti fu meki sma pai belasting-moni èn fu ferwakti taki sma saka densrefi na den ondro.​—Rom. 13:1, 6, 7.

Fu di Yehovah lobi wi, meki a e gi wi moro leki san wi e ferdini. Fu di wi abi sondu, meki a wan-enkri sani di wi e ferdini, na dede (Rom. 6:23). Tòg Yehovah e gi wi furu blesi fu di a lobi wi trutru (Ps. 103:10, 11). A no e gi wi den blesi disi fu di wi e ferdini den, ma fu di a lobi wi so te èn fu di a abi swit’fasi psa marki.​—Rom. 12:6-8; Ef. 2:8.

SAN KAN YEPI WI FU NO DENKI WISREFI NOMO?

Luku bun nanga a denki fu a grontapu disi. Sondro fu wi sabi, wi kan bigin denki taki wi prenspari moro trawan èn taki wi musu kisi moro leki den. Yesus ben sori fa a sani disi kan psa. A ben gebroiki na agersitori fu den wrokoman di ben kisi wán solfru moni leki pai. Sonwan fu den wrokoman ben bigin wroko fruku m’manten èn den wroko heri dei na ini a faya son. Tra wrokoman ben wroko wán yuru nomo. A fosi grupu ben feni taki den ben musu kisi moro moni fu di den ben wroko moro langa (Mat. 20:1-16). Yesus gebroiki na agersitori disi fu sori den bakaman fu en taki den musu de tevrede nanga san Gado besroiti fu gi den.

De nanga tangi èn no ferwakti fu kisi sani fu sma (1 Tes. 5:18). De leki na apostel Paulus di no ben aksi den brada na ini Korente fu gi en san a ben abi fanowdu, aladi a ben abi a reti fu du dati (1 Kor. 9:11-14). Wi musu de nanga tangi gi ala sani di sma e gi wi èn wi no musu ferwakti taki sma gi wi sani.

Abi sakafasi. Te wan sma e denki tumsi furu fu ensrefi, dan nofo tron a feni taki a musu kisi moro leki san a abi. Efu wi abi sakafasi, dan wi no o kon abi a fowtu denki disi.

Wi kan leri furu fu a profeiti Danièl di ben abi sakafasi. A ben de fu wan prenspari famiri, a ben moi, a ben koni, èn a ben man du furu sani. Den sani disi ben kan meki a denki taki sma ben musu sori moro lespeki gi en èn taki a ben musu kisi spesrutu grani (Dan. 1:3, 4, 19, 20). Ma Danièl tan sori sakafasi èn dati meki Yehovah ben lobi en.​—Dan. 2:30; 10:11, 12.

Meki wi no de leki den sma na ini a grontapu disi di e denki densrefi nomo. Na presi fu dati, meki wi tan warderi ibri blesi di Yehovah e gi wi, aladi wi no e ferdini dati.