Kisi wini fu na ofrandi fu Yesus
Wán tron wan yari Yehovah Kotoigi nanga milyunmilyun sma di den gi wan kari, e kon makandra na heri grontapu fu memre a dede fu Yesus soleki fa a ben taigi wi fu du (Lukas 22:19). Na Avondmaal disi o yepi wi fu frustan o prenspari a de taki Yesus dede gi libisma. A o sori tu fa na ofrandi fu en kan yepi wi na ini a ten disi èn na ini a ten di e kon.—Yohanes 3:16.
Awinsi yu o go na a Memrefesa a yari disi noso yu no o go, yu kan kisi wini fu a dede fu Yesus. Fa so? Yesus leri wi taki wi musu du tu prenspari sani:
1. Kon sabi Gado nanga Yesus. Di Yesus begi en Tata na hemel, a taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes.”—Yohanes 17:3.
2. Du san yu leri. Yesus ben taki dati a prenspari fu du san a leri wi. Fu eksempre, na a kaba fu a konmakandra di a hori na tapu wan bergi, a prèise den sma di e ’yere san a taki èn di e du en tu’ (Lukas 6:46-48). Na wan tra okasi a taki: „Efu unu sabi den sani disi, dan koloku fu unu te unu e du den.”—Yohanes 13:17.
Yu wani sabi moro fu Gado nanga Yesus? Yu wani sabi fa yu kan du san yu leri? Dyaso yu kan si wan tu fasi fa yu kan feni yepi.
Bijbelstudie
Wi e hori Bijbelstudie nanga sma sondro taki den abi fu pai. A Bijbelstudie yepi furu sma fu si san Bijbel e leri èn fa den kan du san den leri.
Go na „Studeri Bijbel nanga Yehovah Kotoigi” tapu jw.org fu kon sabi moro fu a seti disi.
Luku a felem Wi breiti taki yu wani studeri Bijbel. A felem disi e sori fa Yehovah Kotoigi e hori wan Bijbelstudie.
Konmakandra fu Yehovah Kotoigi
Yehovah Kotoigi e kon makandra tu leisi wan wiki. Den e kari a presi pe den e kon makandra fu anbegi Gado, wan Kownukondre zaal. Na den konmakandra disi wi e taki fu Bijbel èn fa wi kan du den sani di Bijbel e leri wi.
Ala sma kan kon na den konmakandra disi. Yu no abi fu de wan Kotoigi fu kon. Yu kan go na wan Kownukondre zaal noso yu kan volg a programa tapu Internet.
Luku a felem San wi e du na ini wan Kownukondre zaal? A felem disi e sori syatu san yu kan fruwakti na den konmakandra disi.
Go tapu jw.org na „Gemeente konmakandra fu Yehovah Kotoigi” fu feni wan Kownukondre zaal na ini yu birti.
Artikel nanga felem tapu Internet
Furu artikel nanga felem tapu a website disi kan yepi yu fu kon sabi moro fu den sani di Yesus leri wi èn fu frustan o prenspari a dede fu en de gi wi.
Fu eksempre, efu yu wani sabi fa a dede fu wán man kan tyari wini kon gi milyunmilyun sma, dan leisi den artikel di nen „Fa Yesus e frulusu libisma?” nanga „Fu san ede Yesus pina èn dede? Noso luku a felem di nen Fu san ede Yesus dede?