11 Lobi fu wroko

SAN A WANI TAKI

Sma di lobi wroko no e kibri skin. Den e wroko fu sorgu gi densrefi èn fu yepi tra sma​​—awinsi sma no e warderi a wroko di den e du.

FU SAN EDE A PRENSPARI

A libi lai nanga frantwortu, awinsi wi no lobi tyari den. Furu sma no lobi wroko tranga, ma na soso wini yu o kisi te yu e du dati.​—Preikiman 3:​13.

„Mi kon si taki te yu e wroko tranga, dan dati e gi yu prisiri, a e meki yu firi bun. A sani disi meki taki mi kon moro lobi fu wroko tranga, en disi e meki taki yu abi wan bun nen tu.”​—Reyon.

BIJBELTEKST: „Ala tranga wroko e tyari wini kon.”​—Odo 14:23.

SAN YU KAN DU

Yu kan si wroko na yoisti fasi te yu e du den sani di e kon now.

Abi a gwenti fu du sani bun. Awinsi sortu wroko yu e du, efu na oso wroko, skoro wroko noso yu wroko srefi, du en nanga yu heri ati. Awansi yu sabi du wan sani bun kaba, suku fa yu kan du en moro bun​—noso moro esi srefi. Dan yu o de nanga moro prisiri.

BIJBELTEKST: „Yu si wan man di sabi du en wroko bun? Na fesi kownu a o tanapu. A no o tanapu na fesi sma di no de prenspari.”​—Odo 22:29.

Luku sortu wini a o tyari. Te yu e tyari yu frantwortu bun, dan nofo tron trawan e kisi wini fu dati. Fu eksempre, te yu e du oso wroko dan na so yu e yepi den trawan na ini yu osofamiri.

BIJBELTEKST: „Wan sma sa de moro koloku te a e gi sani, leki te a e kisi sani.”​—Tori 20:35.

De klariklari fu du moro. No du nomo san yu denki de fanowdu, ma meki muiti fu du moro leki dati. Na so yu no o du sani nomo fu di sma dwengi yu fu du dati​—ma fu di yusrefi wani.​—Mateyus 5:​41.

BIJBELTEKST: „Den bun di yu e du, no o de fu di sma dwengi yu, ma fu di yu srefi wani.”​—Fileimon 14.

De redelijk. Sma di lobi wroko no lesi, ma den no e si wroko leki a moro prenspari sani ini den libi tu. Den abi a yoisti denki fu wroko. Den e prisiri fu wroko, ma den e prisiri tu fu rostu pikinso.

BIJBELTEKST: „Pikinso rostu betre moro furu tranga wroko. A betre moro leki te wan sma ben o feti fu fanga a winti.”​—Preikiman 4:6.