LES 6
Leri den bun maniri nanga gwenti
SAN A WANI TAKI?
Sma di abi bun maniri nanga gwenti sabi krin san bun èn san no bun. Den no e meki den firi fu den basi den. Den sabi san bun èn den e tyari densrefi na a fasi dati, awinsi tra sma no e si san den e du.
FU SAN EDE A PRENSPARI?
Pikin e yere omeni sortu sani te a abi fu du nanga san bun èn san no bun. Den e yere den sani disi na skoro, ini poku, ini felem nanga TV programa. Den sani disi kan meki taki den bigin tweifri na den bun sani di den leri na oso.
A sani disi na wan problema gi yonguwan. A buku Beyond the Big Talk, e taki: „Yonguwan musu kon frustan taki sma o wani dwengi den fu tyari densrefi na wan spesrutu fasi so taki tra sma kan lobi den. Den o abi fu leri fu du san densrefi sabi taki bun, awinsi den mati fu den no lobi dati.” A de krin taki papa nanga mama musu leri den pikin den sani disi yonguyongu kaba.
YEPI YU PIKIN FU KISI BUN MANIRI NANGA GWENTI
Leri den krin san bun èn san no bun
BIJBELTEKST: ’Lepi sma leri fa fu gebroiki den frustan fu man si sani krin so taki den kan sabi san bun èn san no bun.’—Hebrewsma 5:14.
Gebroiki wortu di e sori krin san bun èn san no bun. Sori go na sani di e pasa ibri dei, èn sori a difrenti fu san bun èn san no bun. Bijvoorbeeld: „Disi eerlijk, dati no eerlijk; disi bun, ma dati no bun.” Te fu kaba, yu pikin o man si sortu sani bun èn sortu sani no bun fu du.
Sori yu pikin fu san ede wan sani bun, noso fu san ede a no bun. Fu eksempre, poti den sortu aksi disi: Fu san ede a moro bun fu de eerlijk? Fa lei kan meki taki sma no de bun mati moro? Fu san ede fufuru no bun? Yepi yu pikin fu denki bun fu den sani disi èn fu kisi wan bun konsensi.
Sori den sortu wini den o kisi te den e tyari densrefi bun. Yu kan taki: „Efu yu de eerlijk, tra sma o frutrow yu” noso „Efu yu abi switifasi, tra sma o wani moksi nanga yu.”
Sorgu taki a heri osofamiri e hori densrefi na den bun maniri nanga gwenti di yu poti.
BIJBELTEKST: „Tan buweisi sortu sma unu de.”—2 Korentesma 13:5.
Den bun maniri nanga gwenti fu unu musu de krin fu si ini na osofamiri. Te dati de so dan yu o man taki:
„Ini a oso disi wi no e lei.”
„Wi no e naki èn wi no e bari trawan tu.”
„Wi no e taki grofu èn wi no e wisiwasi trawan.”
Na so fasi yu pikin o frustan taki bun maniri nanga gwenti no de leki wet nomo, ma taki den de fasi di e sori krin fa na osofamiri fu unu de.
Abi a gwenti fu taki nanga yu pikin fu den bun maniri nanga gwenti na ini yu osofamiri. Gebroiki sani di e pasa ibri dei fu leri yu pikin. Yu kan teki den sani di yu e leri en gersi nanga den sani di a e si na skoro nanga tra presi. Poti aksi soleki: „San yu ben o du? Fa wi osofamiri ben o du a sani dati?”
Yepi yu pikin fu abi wan bun konsensi.
BIJBELTEKST: „Tan abi wan bun konsensi.”—1 Petrus 3:16.
Prèise yu pikin te a e tyari ensrefi bun. Efu yu pikin du muiti fu tyari ensrefi bun, dan prèise en èn taigi en fu san ede yu du dati. Fu eksempre, yu kan taigi en: „Mi breiti taki yu ben de eerlijk.” Efu yu pikin du wan sani di no bun èn a kon taigi yu dati, dan prèise en fosi. Baka dati yu kan gi en piri-ai.
Piri-ai gi en te a no tyari ensrefi bun. Leri yu pikin fu tyari den bakapisi fu san a e du. Pikin musu sabi o ten den du wan sani di no bun èn taki a sani di a du no e sori taki a abi bun maniri nanga gwenti. Son papa nanga mama no e wani du disi, fu di den no e wani taki a pikin firi sari. Ma te yu e taki nanga yu pikin fu na ogri di a du, dan dati o yepi en fu abi wan moro bun konsensi èn fu sabi o ten wan sani bun èn o ten a no bun.