A bun ala ten fu du san wisrefi feni bun?
Fa furu sma e teki besroiti
Bijna ala sma e agri taki a de krin dati son sani bun èn son sani ogri srefsrefi. Fu eksempre, furu sma e si en leki wan bigi ogri te sma e kiri trawan, te sma e verkracht trawan, èn te sma abi seks nanga pkin-nengre. Ma na a tra sei den e feni en bun te sma de eerlijk, te sma e du bun gi trawan, èn te sma e firi gi trawan. Ma fa a de nanga tra besroiti na ini a libi, soleki nanga suma den mag abi seks, efu den musu taki san tru ala ten, noso fa den musu kweki den pkin? Furu sma feni taki wan bun fasi noso wan fowtu fasi no de fu du dati. Den feni taki a no abi trobi sortu besroiti wan sma e teki na ini den tori disi. Nofo tron te sma musu teki besroiti, dan den e luku san densrefi feni bun èn fa tra sma e denki fu a tori. Ma dati na wan koni fasi fu teki besroiti?
SAN WISREFI FENI BUN
Nofo tron te wi musu teki wan besroiti, dan wi e luku fa wi e denki fu a tori noso san wi konsensi e piki wi fu san bun noso ogri (Romesma 2:14, 15). Srefi yongu pkin kan ferstan kba san bun èn san no bun, èn den kan kisi konsensi fonfon te den du wan sani di no bun. Ma te wi e kon moro bigi, dan wi e leri fu wi famiri, speri, leriman, birtisma, kerki nanga kulturu san bun noso ogri. Na so wi konsensi e bigin wroko soleki fa wi leri. Te wi e teki besroiti, dan wi konsensi e piki wi efu a besroiti di wi teki de soleki fa wi leri.
Efu wi sabi san bun èn san ogri, dan dati kan yepi wi fu firi gi tra sma, fu de nanga tangi, fu de eerlijk èn fu abi sar’ati gi sma. A kan tapu wi tu fu du sani di kan hati den sma di wi lobi, noso di kan gi wi syen nanga konsensi fonfon.
A bun ala ten fu du san wisrefi feni bun? Di Garrick ben yongu, a ben taki dati a ben wani wan libi pe a ben kan du san a wani. Ma a kon si taki sani no ben go bun te a ben e du san ensrefi feni bun. A ferteri taki bakaten en libi ben kon de leki wan dungru pasi. A no ben firi koloku srefsrefi fu di a ben abi seks nanga difrenti sma, a ben gebroiki drugs, a ben kon drungu èn a ben du sma ogri.
SAN TRA SMA E DENKI
Boiti taki wi e fertrow tapu san wisrefi feni bun, nofo tron wi e luku tu fa tra sma o denki fu den besroiti fu wi. Disi kan yepi wi fu leri wan sani fu na ondrofeni nanga a koni fu den. Wi famiri, mati nanga birtisma kan kisi lespeki gi wi te wi e du san den feni bun.
A bun ala ten fu du san tra sma e denki? Di Priscila ben de wan yongu uma, a ben e du san tra yonguwan ben lobi du. A ben gwenti abi seks nanga difrenti sma. Ma a kon si taki aladi a ben e du san trawan ben feni bun, tòg dati no ben meki a firi koloku. A taki: „Mi no ben firi bun te mi ben e du san ala tra sma ben e du. A sani disi ben meki mi du don sani èn mi ben e poti misrefi na ini kefar.”
WAN MORO BUN FASI DE FU TEKI KONI BESROITI?
Te wi musu besroiti san bun noso san no bun, dan a kan de wan yepi fu luku fa wi e denki fu wan tori èn fa tra sma e denki. Ma a no dati w’wan o yepi wi fu teki koni besroiti di abi bun bakapisi. Fu di wi no man si ala ten sortu bakapisi den besroiti fu wi o abi, meki wi no man si sortu takru bakapisi den o abi gi wisrefi noso tra sma (Odo 14:12). Èn srefi efu wi nanga tra sma e denki taki wan sani bun, tòg dati kan abi takru bakapisi èn den denki dati kan kenki bakaten. Boiti dati, son sani di sma ben si leki ogri sani fosi kon tron sani di furu sma feni bun na ini a ten disi, èn sani di sma ben si leki bun sani fosi, den e si now leki sani di no bun.
A bun ala ten fu du san tra sma e denki?
Wan moro bun fasi de fu sabi san bun èn san ogri? Wan sani de di kan yepi wi fu teki bun besroiti èn di no o meki wi firi sari furu yari langa?
Wi breiti taki wan sani de di kan yepi wi fu sabi ala ten san bun èn san ogri. A sani disi kan yepi ala sma, awinsi pe den de. A tra artikel o taki pe wi kan feni a yepi disi di wi kan fertrow èn di o yepi wi fu sabi san bun èn san ogri.