Gado e pramisi wan paradijs

DISI na wan prenki fu wan paradijs soleki san Yehovah kande ben sori en profeiti Yesaya. Yesaya ben libi syatu baka Yona.

A wortu paradijs wani taki „dyari” noso „wan moi presi”. A e memre yu na wan sani di wi si kaba na ini a buku disi? A gersi a moi dyari di Yehovah ben meki gi Adam nanga Eva, a no so? Ma oiti heri grontapu o tron wan paradijs?

Yehovah ben taigi en profeiti Yesaya fu skrifi fu a nyun paradijs di o kon gi a pipel fu Gado. A ben taki: ’Wolfu nanga skapu sa libi makandra na ini vrede. Yongu kaw nanga yongu lew sa nyan nanga makandra èn pikin-nengre sa luku den. Srefi noti sa pasa nanga wan beibi efu a e prei krosibei na wan ogri sneki.’

’Dati no o man pasa noiti’, furu sma sa taki. ’Ala ten problema ben de na grontapu èn disi sa tan so ala ten.’ Ma prakseri disi pikinso: Sortu tanpresi Gado ben gi Adam nanga Eva?

Gado ben poti Adam nanga Eva na ini wan paradijs. Ma fu di den ben trangayesi Gado, meki den ben lasi den moi tanpresi, den ben kon grani èn ben dede. Gado e pramisi taki a sa gi sma di lobi en den srefi sani san Adam nanga Eva ben lasi.

Na ini a paradijs di e kon, nowan sma no sa du ogri noso pori sani. Volmaakti vrede sa de. Ala sma sa de gosontu èn koloku. A sa de soleki fa Gado ben wani en na a bigin. Ma wi sa leri bakaten fa Gado sa meki ala den sani disi kon.