Lès 5
San na a prakseri di Gado abi nanga grontapoe?
Foe san ede Jehovah ben meki grontapoe? (1, 2)
Foe san ede grontapoe no de wan paradijs now? (3)
San o pasa nanga ogri sma? (4)
San Jesus o doe na ini a ten di e kon gi den sikiwan? den owroewan? den dedewan? (5, 6)
San joe moesoe doe foe abi wan prati na ini den blesi foe a ten di e kon? (7)
1. Jehovah ben meki a grontapoe disi na so wan fasi taki libisma ben kan njan boen foe a libi na tapoe foe têgo. A ben wani taki regtfardiki, kolokoe sma moesoe libi na grontapoe ala ten (Psalm 115:16; Jesaja 45:18). Noiti grontapoe sa kisi pori; a sa tan foe têgo. — Psalm 104:5; Preikiman 1:4.
2. Bifo Gado ben meki libisma, a ben teki wan pikin pisi foe grontapoe èn ben meki dati kon tron wan moi paradijs. A ben kari en a djari foe Eden. Na djaso a ben poti a fosi man nanga oema, Adam nanga Eva. Gado ben abi na prakseri foe den kisi pikin èn foeroe a heri grontapoe. Safrisafri den ben sa meki a heri grontapoe kon tron wan paradijs. — Genesis 1:28; 2:8, 15.
3. Adam nanga Eva ben sondoe, foe di foe espresi den ben pasa a wet foe Gado. Foe dati ede Jehovah ben poti den dorosei foe a djari foe Eden. A paradijs ben lasi gowe (Genesis 3:1-6, 23). Ma Jehovah no frigiti a prakseri foe en di a ben abi nanga a grontapoe disi. A e pramisi foe meki a tron wan paradijs, pe libisma sa libi foe têgo. Fa a sa doe disi? — Psalm 37:29.
4. Bifo a grontapoe disi kan tron wan paradijs, dan ogri sma moesoe wai poeroe (Psalm 37:38). Disi sa pasa na Armagedon, di de a feti foe Gado foe tjari wan kaba kon na ogridoe. Baka dati, den sa sroto Satan 1000 jari langa. Disi wani taki dati no wan ogri sma sa tan abra foe pori grontapoe. Soso a pipel foe Gado sa tan na libi. — Openbaring 16:14, 16; 20:1-3.
5. Baka dati, Jesus Krestes sa tiri a grontapoe disi leki Kownoe 1000 jari langa (Openbaring 20:6). Safrisafri a sa poeroe sondoe foe wi froestan nanga skin. Wi sa tron volmaakti libisma neleki fa Adam nanga Eva ben de bifo den ben sondoe. Dan siki, owroe dei nanga dede no sa de moro. Siki sma sa kon betre èn owroe sma sa kon jongoe baka. — Job 33:25; Jesaja 33:24; Openbaring 21:3, 4.
6. Na ini a Doesoen Jari Tiri foe Jesus, getrow libisma sa wroko foe kenki a heri grontapoe kon tron wan paradijs (Lukas 23:43). So srefi miljoenmiljoen dede sma sa kisi wan opobaka foe kisi libisma libi na grontapoe (Tori foe den Apostel 24:15). Efoe den e doe san Gado e aksi foe den, dan den sa tan libi na grontapoe foe têgo. Efoe den no e doe dati, dan den sa kisi pori foe têgo. — Johanes 5:28, 29; Openbaring 20:11-15.
7. Na so fasi a prakseri di Gado ben abi nanga grontapoe biginbigin, sa kon troe. Joe ben sa wani abi wan prati na ini den blesi disi foe a ten di e kon? Efoe dati de so, dan joe moesoe tan leri sabi Jehovah èn gi jesi na den sani di a e aksi foe joe. Te joe e go na den konmakandra na a Kownoekondre zaal foe Jehovah Kotoigi na ini joe birti, dan disi sa jepi joe foe doe dati. — Jesaja 11:9; Hebrewsma 10:24, 25.
[Prenki na tapoe bladzijde 10]
A paradijs di ben lasi gowe
[Prenki na tapoe bladzijde 11]
Baka Armagedon, grontapoe sa meki kon tron wan paradijs