San Gado abi na prakseri gi grontapu?

1. Fu san ede Gado meki grontapu?

Yehovah meki grontapu gi libisma. Na dyaso wi musu tan. Sobun, Gado no ben meki Adam nanga Eva, a fosi man nanga uma, fu meki pikin di ben o libi na hemel. Gado ben meki engel kaba fu libi na hemel (Yob 38:4, 7). Ma Gado poti a fosi man na ini a moi paradijs di ben nen a dyari fu Eden (Genesis 2:15-17). Yehovah gi Adam nanga den bakapikin fu en di ben musu gebore ete, a howpu fu libi fu têgo na grontapu.​—Leisi Psalm 37:29; 115:16.

Na a bigin, soso a dyari fu Eden ben de wan paradijs. A fosi man nanga uma ben musu meki grontapu kon furu nanga den bakapikin fu den. Bakaten, den ben musu basi ala sani na grontapu fu meki a tron wan paradijs (Genesis 1:28). Grontapu noiti no o kisi pori. A o de a tanpresi fu libisma fu ala ten.​—Leisi Psalm 104:5.

Luku a felem Fu san ede Gado meki grontapu?

2. Fu san ede grontapu no de wan paradijs now?

Fu di Adam nanga Eva ben trangayesi Gado, meki Yehovah puru den na ini a dyari. A Paradijs ben lasi gowe èn nowan libisma ben man seti en baka. Bijbel e taki: „A libi grontapu na ini na anu fu den ogri sma.”​—Yob 9:24.​—Leisi Genesis 3:23, 24.

Ma a de so taki Yehovah frigiti san a ben abi na prakseri gi libisma na a bigin? Nôno! En na a Almaktiwan. Ala ten a e du san a abi na prakseri (Yesaya 45:18). A o meki libisma kon de baka soleki fa a ben wani.​—Leisi Psalm 37:11, 34.

3. Fa Gado o seti a Paradijs baka?

Te Yesus o tiri leki a kownu di Gado poti, grontapu o tron wan Paradijs baka. Na ini a feti di Bijbel e kari Armagedon, Yesus o tiri den engel fu Gado fu pori ala sma di e opo densrefi teige Gado. Baka dati, a o poti Satan na strafu 1000 yari langa. A pipel fu Gado o pasa a feti libilibi, fu di Yesus o tiri den èn o kibri den. Den o libi fu têgo na ini Paradijs na grontapu.​—Leisi Openbaring 20:1-3; 21:3, 4.

4. O ten wan kaba o kon na a pina di sma e pina?

O ten Gado o tyari wan kaba kon na a ogridu di de na grontapu? Yesus ben taki fu wan „marki” di ben o sori taki a kaba de krosibei. Den sani di e pasa na grontapu now kan meki taki wan kaba kon na a libi fu ala sma. Den sani disi e sori taki „a kaba fu a grontapu disi de krosibei”.​—Leisi Mateyus 24:3, 7-14, 21, 22.

Na ini den 1000 yari te Yesus o tiri grontapu komoto fu hemel, a o puru ala pina (Yesaya 9:6, 7; 11:9). Boiti taki Yesus o dini leki Kownu, a o dini leki Granpriester èn a o puru den sondu fu den sma di lobi Gado. Sobun, nanga yepi fu Yesus, Gado o tyari wan kaba kon na siki, na a owru di sma e kon owru, èn na dede.​—Leisi Yesaya 25:8; 33:24.

5. Suma o libi na ini a Paradijs di o kon?

Den sma di e gi yesi na Gado, o libi na ini Paradijs (1 Yohanes 2:17). Yesus seni den bakaman fu en fu go suku reti-ati sma èn fu leri den fa den kan tron sma di Gado feni bun. Na ini a ten disi, Yehovah e sreka milyunmilyun sma fu libi na ini a Paradijs di o kon (Sefanya 2:3). Na den Kownukondre zaal fu Yehovah Kotoigi, sma kan leri fa fu tron moro bun masra nanga papa, èn fa fu tron moro bun wefi nanga mama. Papa, mama, nanga den pikin fu den e anbegi Gado makandra èn den e leri fa den kan kisi wini fu a bun nyunsu.​—Leisi Mika 4:1-4.