A lasti bun kownu fu Israel

YOSIA abi aiti yari nomo te a e tron kownu fu den tu lo fu Israel na zuidsei. Wan sma nanga a yari disi de tumusi yongu fu de kownu. Dati meki na ini a bigin wan tu owru sma e yepi en fu tiri a nâsi.

Yosia e bigin suku Yehovah, te a de seibi yari kownu. A e waka baka na eksempre fu bun kownu leki David, Yosafat nanga Heskia. Dan, bifo Yosia tapu 20 yari, a e du wan deki-ati wroko.

Moro furu fu den Israelsma de tumusi ogri fu wan langa pisi ten kaba. Den e anbegi falsi gado. Den e boigi na fesi popki fu kruktugado. Dati meki Yosia nanga den man fu en e hari gowe èn e bigin puru a falsi anbegi na a kondre. Disi na wan bigi wroko, bika someni sma e anbegi falsi gado. Yu e si dya fa Yosia nanga den man fu en e naki den popki fu den kruktugado broko.

Baka dati, dan Yosia e gi dri man a frantwortu fu sreka a tempel fu Yehovah kon nyun baka. Sma e piki moni na a pipel èn e gi dati na den man disi fu pai fu a wroko di musu du. Aladi den sma e wroko na a tempel, dan a granpriester Helkia e feni wan tumusi prenspari sani drape. A de a wetbuku di Yehovah ben meki Moses skrifi bun langa pasa kaba. Bun furu yari a no ben de fu feni.

Den e tyari a buku go na Yosia èn a e aksi fu den leisi dati gi en. Aladi a e arki, dan a e frustan taki a pipel no hori ensrefi na a wet fu Yehovah. A e sari tumusi fu dati. Dati meki a e priti en krosi, soleki fa yu e si dya. A e taki: ’Yehovah ati e bron nanga wi, fu di den tata fu wi no ben hori den wet di skrifi na ini a buku disi.’

Yosia e komanderi a granpriester Helkia fu kon sabi san Yehovah o du nanga den. Helkia e go na a uma Hulda, di de wan umaprofeiti èn a e aksi en fu a tori disi. Hulda e gi en a boskopu disi fu Yehovah fu tyari go gi Yosia: ’Yerusalem nanga a heri pipel sa kisi strafu, fu di den ben anbegi falsi gado, èn fu di a kondre kon furu nanga ogridu. Ma fu di yu, Yosia, ben du san bun, meki a strafu disi sa kon, baka te yu dede.’