Yosia ben lobi a Wet fu Gado

Yosia tron kownu fu Yuda di a ben abi aiti yari. Na ini a ten dati den sma ben e bonu èn den ben e anbegi falsi gado. Di Yosia ben abi 16 yari a ben wani kon sabi fa fu anbegi Yehovah na a yoisti fasi. Di a ben abi 20 yari a bigin broko ala den falsi gado nanga den altari na ini a kondre. Èn di a ben abi 26 yari a seti sani fu meki a tempel fu Yehovah kon bun baka.

A granpriester Helkia feni wan bukulolo fu a Wet fu Yehovah na ini a tempel. Kande na a buku di Moses srefi ben skrifi. Safan, a sekretarsi fu Kownu Yosia, tyari a buku gi en. Safan bigin leisi a Wet nanga wan tranga sten. Di Yosia ben e arki, a frustan taki a pipel ben e trangayesi Yehovah furu yari kaba. Kownu Yosia taigi Helkia: ’Yehovah ati e bron nanga wi. Go begi en. Yehovah o taigi wi san wi musu du.’ Yehovah piki den nanga yepi fu na umaprofeiti Hulda. A taki: ’A pipel fu Yuda gowe libi mi. Mi o strafu den, ma mi o du dati baka te Yosia dede, fu di a ben abi sakafasi.’

Di Kownu Yosia yere a boskopu, a go na a tempel, dan a kari a pipel fu Yuda kon na wán. A leisi a Wet fu Yehovah nanga wan tranga sten so taki a heri pipel ben kan yere dati. Yosia nanga a pipel pramisi taki den o gi yesi na Yehovah nanga den heri ati.

Furu yari langa a pipel fu Yuda no ben hori a Paskafesa. Ma di Yosia leisi na ini a Wet taki den musu hori a Paskafesa ala yari, a taigi a pipel: ’Wi o hori wan Paskafesa gi Yehovah.’ Yosia sreka sani fu tyari furu ofrandi gi Yehovah èn fu meki wan grupu singiman singi na a tempel. A pipel hori a Paskafesa èn baka dati den hori a fesa fu brede sondro srudeki seibi dei langa. Sensi a ten fu Samuel den no ben hori so wan bigi Paskafesa moro. Yosia ben lobi a Wet fu Yehovah trutru. Yu lobi fu leri sani fu Yehovah?