Den e wakti na Yerusalem

DEN sma dya na bakaman fu Yesus. Den gi yesi na en èn ben tan na Yerusalem. Èn aladi den alamala e wakti drape makandra, dan wan tranga babari e furu a heri oso. A de leki a babari fu wan tranga winti. Dan tongo fu faya e bigin de fu si na tapu den ede fu den disipel. Yu e si a faya na tapu den ede fu ibriwan fu den? San ala disi wani taki?

A de wan wondru! Yesus de baka na en Tata na hemel èn a e kanti a santa yeye fu Gado kon na tapu en bakaman. Yu sabi san a yeye disi e meki den du? Den alamala e bigin fu taki na ini difrenti tongo.

Furu sma na Yerusalem e yere a babari di de leki wan tranga winti èn den e kon luku san e pasa. Sonwan fu den na sma fu tra nâsi di kon dya na a Pinksterfesa fu den Israelsma. Fa den sma disi e fruwondru te den e yere na ini den eigi tongo fa den disipel e taki fu den wondru sani di Gado du.

’Ala den sma disi na Galileasma’, den fisitiman disi e taki. ’Fa a du kon dan, taki den man taki na ini ala den difrenti tongo disi fu den kondre pe wi komoto?’

Petrus e opo tanapu now fu tyari disi kon na krin gi den. Nanga tranga sten a e fruteri den fa sma ben kiri Yesus èn taki Yehovah ben opo en baka na dede: ’Now Yesus de na hemel na a reti-anusei fu Gado’, Petrus e taki. ’Èn a kanti a santa yeye kon di a ben pramisi. Dati meki unu e si èn e yere den wondru disi.’

We, te Petrus taki disi, dan furu fu den sma e firi sari fu san den ben du nanga Yesus. ’San wi musu du?’, den e aksi. Petrus e taigi den: ’Un musu kenki un libi èn teki dopu.’ Na a srefi dei dati ete, 3000 sma e teki dopu èn e tron bakaman fu Yesus.