Jesus libi nanga diniwroko

Den lasti leisi di a sori ensrefi èn a Pinksterfesa foe 33 G.T.

NA WAN seiker momenti Jesus e seti sani gi ala den erfoe apostel foe en foe den miti en na wan bergi na Galilea. So leki fa a sori, dan den e froeteri tra disipel foe a konmakandra, èn ala nanga ala moro leki feifihondro sma e kon a makandra. Fa a konmakandra disi e sori foe de wan switi wan, te Jesus e sori ensrefi na den sma èn e bigin gi den leri!

Wan foe den sani di Jesus e froeteri a bigi ipi sma de, taki Gado gi en ala makti na hemel èn na grontapoe. „Go foe dati ede”, a e gi deki-ati, „èn meki disipel foe sma di komoto foe ala nâsi èn dopoe den ini a nen foe a Tata èn foe a Manpikin èn foe a santa jeje, èn leri den foe doe ala den sani di mi ben komanderi oenoe.”

Prakseri foe disi nomo! Mansma, oemasma èn pikin-nengre, kisi alamala a srefi wroko foe abi prati ini a meki foe disipel. Gensman sa proeberi foe stòp a preiki èn leriwroko foe den, ma Jesus e gi den tranga nanga den wortoe: „Loekoe! Mi de nanga oenoe ala den dei te na a kaba foe a seti foe sani.” Nanga jepi foe a santa jeje Jesus e tan nanga den bakaman foe en foe jepi den, foe doe a diniwroko foe den.

Na wan pisi ten foe 40 dei baka Jesus en opobaka, a e sori ensrefi libilibi na den disipel foe en. Ini a ten disi pe a e sori ensrefi, a e gi den leri foe a kownoekondre foe Gado, èn a e poti krakti tapoe san na den frantiwortoe di den abi, leki disipel foe en. Na wán okasi a e sori ensrefi, srefi na en afoe-brada Jakobus èn e overtoigi a man disi di fosi no ben bribi, taki En de troetroe Krestes.

Ala di den apostel de ete na Galilea, Jesus e taigi den, so leki fa a e sori, foe drai go baka na Jerusalem. Te a e kon makandra nanga den drape, a e taigi den: „No komoto na Jerusalem, ma tan wakti tapoe a sani di a Tata ben pramisi oenoe, a sani di oenoe ben jere foe mi, bika Johanes ben dopoe nanga watra, ma ini wan toe dei oenoe sa kisi dopoe na ini santa jeje.”

Baka ten Jesus e kon makandra baka nanga den apostel foe en, èn a e tjari den go dorosei foe a foto na a kontren foe Betania, di e didon na a owstoe skoinsisei foe na Olijfbergi. A de wan froewondroe sani taki, awansi ala sani di a ben taigi den, taki a sa go na hemel heri-esi, tokoe ete den e bribi taki a kownoekondre foe en sa opo na grontapoe. Foe dati ede den e aksi en: „Masra joe e poti a kownoekondre gi Israèl baka ini a ten disi?”

Na presi foe proeberi baka foe sori den taki den abi wan fowtoe froewakti, Jesus e piki nomo: „A no de wan sani gi oenoe foe kisi sabi foe den ten noso pisi ten di a Tata ben poti ondro en eigi kroetoe bosroiti.” Dan a e poti ete wan tron krakti tapoe a wroko di den moesoe doe, ala di a e taki: „Oen sa kisi krakti te a santa jeje kon na oen tapoe, èn oen sa de kotoigi foe mi na Jerusalem èn na heri Judea èn Samaria èn te leki den moro farawe presi foe grontapoe.”

Jesus e bigin opo go na hemel ala di den e tanapoe e loekoe ete, èn dan wan wolkoe e tapoe en, so taki den no man si en. Baka di a poeroe a skin foe en foe meti, a e go baka na hemel leki wan jeje sma. Te den erfoe disipel e tan loekoe go na loktoe, toe man ini weti krosi e sori densrefi na den. Den engel disi di teki libisma skin e aksi: „Man foe Galilea, foe san ede oenoe e tanapoe e loekoe go na loktoe? A Jesus disi, di den ben teki foe oenoe go na loktoe, sa kon baka na a srefi fasi leki fa oenoe ben si en e go na loktoe.”

A fasi fa Jesus ben gowe libi grontapoe didjonsro, ben de sondro wan lo poebliki pranpran, nanga soso den getrow bakaman foe en di ben tanapoe e loekoe. Foe dati ede a sa drai kon baka, na a srefi fasi — sondro poebliki pranpran, ala di soso den getrow bakaman foe en sa si taki a drai kon baka èn taki a denoja foe en ini Kownoekondre makti bigin.

Now den apostel e saka kon foe na Olijfbergi, den e abra a Lagipresi foe Kidron èn den e go baka na Jerusalem. Den e tan drape, foe di den e gi jesi na a gebod foe Jesus. Tin dei a baka, na a djoe Pinksterfesa foe 33 G.T., ala di so wan 120 disipel kon makandra na wan tapoesodro na Jerusalem, wan babari neleki wan bigi winti di e wai tranga, wantronso e foeroe a heri oso. Sma e si tongo leki di foe faja, èn na tapoe ibriwan sma di de drape wan e go sidon, èn ala den disipel e bigin taki ini difrenti tongo. Disi na a kanti kon na den tapoe foe a santa jeje di Jesus ben pramisi! Mateus 28:16-20; Lukas 24:49-52; 1 Korentesma 15:5-7; Tori foe den Apostel 1:3-15; 2:1-4.

◆ Na soema Jesus e gi bodoi na wan bergi na Galilea bifo a e gowe, èn san na den bodoi disi?

◆ Fa Jesus e gi den disipel foe en krakti, èn na sortoe fasi a sa de nanga den?

◆ O langa baka na opobaka foe Jesus, a e sori ensrefi na den disipel foe en, èn san a e leri den?

◆ Na sortoe sma, di, so leki fa a e sori, no ben de wan disipel foe en bifo a dede, Jesus e sori ensrefi?

◆ Sortoe lasti toe konmakandra Jesus abi nanga den apostel foe en, èn san e pasa na den okasi disi?

◆ Fa Jesus sa drai kon baka na a srefi fasi leki fa a ben gowe?

◆ San e pasa na a Pinksterfesa foe 33 G.T.?