Yesus e drai go baka na hemel

Yesus miti nanga den bakaman fu en na Galilea. A gi den wan prenspari wroko fu du. A taki: ’Go na sma fu ala kondre èn meki den tron disipel. Leri den san mi leri unu èn dopu den.’ Dan a pramisi den: ’Mi o de nanga unu ala ten.’

Na ini den 40 dei baka di Yesus kon na libi, a meki hondrohondro disipel fu en na ini Galilea nanga Yerusalem si en. A leri den prenspari tori èn a du furu wondru. Baka dati a miti nanga den apostel fu en fu a lasti leisi na tapu Olèif-bergi. A ben taigi den kaba: ’Un no gowe libi Yerusalem. Un tan wakti a sani di a Tata pramisi.’

Den apostel no ben e frustan fu san a ben e taki. Den aksi en: ’Yu o tron Kownu fu Israel now?’ Yesus taigi den: ’A ten fu Yehovah no doro ete fu poti mi leki Kownu. Heri esi unu o kisi krakti fu a santa yeye èn unu o de mi kotoigi. Un musu preiki na ini Yerusalem, Yudea, Samaria nanga den moro farawe presi fu grontapu.’

Baka dati Yesus opo go na loktu èn wan wolku tapu en so taki den no ben man si en moro. Den disipel ben e tan luku go na loktu, ma a ben gowe.

Den disipel gowe fu Olèif-bergi, dan den go na Yerusalem. Den ben gwenti kon makandra na ini wan sodrokamra fu begi. Den ben e wakti tapu Yesus fu taigi den san den musu du moro fara.