Den kon fri fu dungru-oso

LUKU na engel dya fa a e hori a doro fu a dungru-oso opo. Den man di a e meki kon fri na Yesus apostel. Meki wi go luku san meki den poti den na dungru-oso.

Na soso wan syatu ten ben pasa fu sensi a santa yeye ben kanti kon na tapu den disipel fu Yesus. Èn disi na san e pasa: wan bakadina, Petrus nanga Yohanes e go na a tempel na Yerusalem. Drape, krosibei na a doro, wan man sidon di malengri en heri libi langa. Ibri dei sma e tyari en kon dya, so taki a kan begi moni na den sma di e kon na a tempel. Te a si Petrus nanga Yohanes, a e begi den fu gi en wan sani. San den apostel sa du?

Den e tan tanapu èn e luku a pôti man. ’Mi no abi moni’, Petrus e taki, ’ma mi sa gi yu san mi abi. Na ini a nen fu Yesus, opo tanapu èn waka!’ Dan Petrus e hori a man na en reti-anu èn wantewante a man e dyompo opo èn e bigin waka. Te den sma e si disi, dan den e fruwondru èn a wondru disi e meki den de nanga bigi prisiri.

’A de nanga a krakti fu Gado, di ben opo Yesus na dede, taki wi ben du a wondru disi’, Petrus e taki. Aladi en nanga Yohanes e taki ete, dan wan tu kerki fesiman e waka kon. Den ati e bron, fu di Petrus nanga Yohanes e fruteri den sma taki Yesus opo baka na dede. Dati meki den e grabu den èn e poti den na dungru-oso.

A tamara fu en den kerki fesiman abi wan bigi konmakandra. Den e tyari Petrus nanga Yohanes nanga a man, di ben kon gosontu, go na inisei. ’Nanga sortu krakti unu ben du a wondru disi?’, den kerki fesiman e aksi.

Petrus e taigi den, taki den ben du disi nanga a krakti fu Gado di ben wiki Yesus opo na dede. Den priester no sabi san den musu du, bika den no kan taki dati a wondru disi no pasa trutru. Fu dati ede den e warskow den apostel fu no taki moro fu Yesus èn dan den e meki den go.

Ma den apostel e tan preiki fu Yesus èn den e dresi sikisma tu. A nyunsu fu den wondru disi e panya, so taki srefi furu sma fu den foto lontu Yerusalem e tyari sikisma kon fu den apostel dresi den. Disi e meki den kerki fesiman dyarusu. Dati meki den e grabu den apostel èn e poti den na dungru-oso. Ma den no e tan langa drape.

A neti dati na engel fu Gado e opo a dungru-oso doro, soleki fa yu e si dya. Na engel e taki: ’Go tanapu na a tempel èn tan taki nanga den sma.’ A tamara mamanten den kerki fesiman e seni man go na a dungru-oso fu go teki den apostel. Ma den no de drape moro. Bakaten den man e feni den na a tempel e leri sma èn den e teki den tyari go na a Sanhedrin zaal.

’Wi ben warskow unu tranga fu no leri sma moro fu Yesus’, den kerki fesiman e taki. ’Ma unu furu Yerusalem nanga a leri fu unu.’ Dan den apostel e piki: ’Wi musu gi yesi na Gado leki tiriman moro leki na libisma.’ Fu dati ede den e tan leri sma a ’bun nyunsu’. Disi a no wan moi eksempre gi wi fu waka na en baka?