Yehovah na wi Tiriman!
„Wi musu gi yesi na Gado leki tiriman moro leki libisma.” — TORI FU DEN APOSTRU 5:29.
1, 2. Sortu bosroyti leki di fu den apostru Yehovah Kotoygi e teki te libisma e aksi sani kontrari na wani fu Gado?
YEHOVAH GADO ben gi pasi taki den ben tyari 12 man kon na fesi wan hey krutu. A ben de na yari 33 G.T., èn na krutu ben de na dyu Sanhedrin. Den apostru fu Yeyses ben de na fesi krutu. Arki! ‘Wi ben gi unu na komando fu no gi leri na tapu na gron fu na nen disi,’ na hey pristri e taki, ‘ma unu furu Yerusalem nanga unu leri.’ Tapu dati, Petrus nanga den tra apostru e fruklari: “Wi musu gi yesi na Gado leki tiriman moro leki libisma” (Tori fu den Apostru 5:27-29). Fu taki en leti, den ben taki: ‘Yehovah na wi Tiriman!’
2 Iya, Yehovah de na Tiriman fu den tru bakaman fu Yeyses. Disi e tyari kon na krin na ini na beybribuku Tori fu den Apostru di „na lobi datra Lukas” ben skrifi na ini Rome na wan ten fu 61 G.T. (Kolose sma 4:14). Neleki den apostru, na so Yehovah pipri na ini na ten disi, e gi yesi na a heymel Tiriman fu den te san libisma e aksi de kontrari na wani fu en. Ma san wi kan leri moro fara fu Tori fu den Apostru? (Te yu e du persoonlijk studi, wi e gi yu na ray fu leysi den pisi fu na beybribuku di druk na ini fatu letter.)
Yeyses e gi ordru na Kotoygi
3. Di den bakaman fu Yeyses ben “teki dopu na ini santa yeye, dan san ben de na moro prenspari broko-ede fu den”?
3 Den apostru ben kan teki wan fasti bosroyti na a sey fu Gado, fu di den ben kisi tranga na yeye sey. Krestes ben dede na wan pinapostu, ma den ben sabi taki a ben opobaka (1:1-5). Yeyses „ben sori . . . taki a ben de a libi” èn fu 40 dey langa a ben gi leri fu Kownukondre waarheid na ini libisma skin di a ben teki. A ben taygi en disipri tu fu wakti na ini Yerusalem fu kisi dopu „ini santa yeye.” Na preykiwroko ben sa de dan a moro prenspari broko-ede fu den, neleki fa a de gi Yehovah Kotoygi na ini na ten disi.—Lukas 24:27, 49; Yohanes 20:19–21:24.
4. San ben sa psa te na santa yeye ben sa kon na tapu den bakaman fu Yeyses?
4 Fu di den apostru no ben dopu ete ini santa yeye, meki den ben abi na fowtu prakseri taki wan grontapu tiri ben sa meki wan kba kon na a tiri nanga makti fu Rome, di den ben aksi: „Masra, yu e meki na kownukondre gi Israèl kon baka na ini na ten disi?” (1:6-8) Te yu e luku en bun, dan Yeyses ben piki nôno, bika ‘a no ben de fu den fu kisi sabi fu den ten nanga pisiten.’ ‘Te na santa yeye ben kon na den tapu,’ a ben sa gi den krakti fu gi kotoygi fu Gado heymel Kownukondre èn no fu wan Kownukondre na tapu na grontapu disi. Den ben sa preyki na ini Yerusalem, Yudeya nanga Samariya, „èn te na den moro farawe kontren fu grontapu.” Na ini den kriboy dey disi Yehovah Kotoygi e du na sortu wroko disi nanga yepi fu na santa yeye, na a heri grontapu.
5. Fa Yeyses ben sa kon na a srefi fasi leki fa a ben gwe?
5 Syatu baka di Yeyses ben gi na ordru fu na grontapu preykiwroko, a ben bigin opo go na heymel. Na opo go na heymel dati ben bigin nanga wan buweygi fu Yeyses go na loktu, komoto gwe fu en disipri, èn bakaten a ben go na inisey pe en heymel Tiriman de èn ben bigin wroko na ini na yeye kondre (1:9-11). Bakadi wan wolku ben tapu na fesi fu den apostru fu si Yeyses, a ben puru na libisma skin di a ben teki. Tu engel ben kon èn ben taki, taki a ’ben sa kon na a srefi fasi.’ Èn so a psa tu. Den disipri fu Yeyses wwan ben si en di a e gwe, neleki fa Yehovah Kotoygi wwan e kon sabi na kon-baka fu en di libisma ay no man si.
Yehovah e teki wan sma
6. Fa den ben teki wan trawan na a presi fu Yudas Iskariyòt?
6 Heri esi den apostru ben de baka na ini Yerusalem (1:12-26). Na ini wan tapusey kamra (kande na ini na oso fu na mma fu Markus, Mariya), den 11 kotrow apostru ben hori doro na ini begi nanga den afubrada fu Yeyses, den tra disipri fu en, nanga en mma, Mariya. (Markus 6:3; Yakobus 1:1) Ma suma ben sa kisi Yudas „wroko fu hori ay tapu sani”? (Psalm 109:8) So wan 120 disipri ben de drape di Gado ben teki wan man fu teki a presi fu na toriman, Yudas, èn poti na nomru fu den apostru kon baka na 12. A sma di den ben o teki ben musu de wan sma di ben de wan disipri ini a ten fu Yeyses diniwroko èn wan kotoygi fu na opobaka fu en. A no de fu taki, taki na man ben musu erken so srefi Yehovah leki en Tiriman. Fu Matiyas nanga Yosef Barsabas den ben iti na lot baka di den begi. Gado ben meki na lot fadon na tapu Matiyas.—Odo 16:33.
7. (a) Fa yu ben kan taki taki Yudas “ben bay wan gron nanga na payman fu onregtfardiki fasi”? (b) Fa Yudas ben dede?
7 Yudas Iskariyot seyker no ben erken Yehovah leki en Tiriman. Ay boy, fu 30 solfru moni a ben tori na Manpikin fu Gado! Yudas ben gi na moni dati baka na den gran pristri, ma Petrus ben taki, taki na toriman „ben bay wan gron nanga na payman fu onregtfardiki fasi.” Fa so? We, en ben sorgu gi na moni nanga na reyde fu bay wan „Gron fu Brudu”, so leki den ben kari en. Den ben kon sabi en leki wan plata pisi gron na a zuidsey fu na Lagipresi fu Hinnom. Fu di en matifasi nanga na heymel Tiriman ben pori krinkrin, meki Yudas „ben anga en srefi” (Mateyus 27:3-10). Ma kande na ttey ofu na bontaki ben broko, so taki ‘nanga en ede beni go na fesi, nanga furu bbari a ben fadon priti-opo a mindri’ di a ben fadon tapu den klipston nanga srapu penti. No meki no wan fu unu de wan falsi brada!
Furu nanga santa yeye!
8. Oten den disipri fu Yeyses ben dopu na ini santa yeye, èn nanga sortu bakapisi?
8 Ma fa a ben de nanga na pramisi dopu na ini santa yeye? Disi ben feni presi na Penkstri 33 G.T., tin dey baka di Yeyses ben go na heymel (2:1-4). Fa na dopu dati ben de wan span sani di ben psa! Tyari na tori disi kon na yu fesi. So wan 120 disipri ben de na ini na tapusey kamra, di ’wantronso, komoto fu heymel wan bbari leki di fu wan tranga winti di ben way ben furu na oso.’ A no ben de wan winti, ma a ben bari leki wan. Wan tongo „neleki di fu faya” ben de na tapu ibri disipri nanga apostru. „Den alamala ben kon furu nanga santa yeye èn ben bigin fu taki na ini difrenti tongo.” Di na dopu dati ben feni presi, dan den ben kon gebore tu nanga yepi fu santa yeye, den ben kisi salfu èn stanpu leki wan marki fu wan gudu na yeyefasi di den kisi.—Johanes 3:3, 5; 2 Korente sma 1:21, 22; 1 Johanes 2:20.
9. Fu san den disipri di ben furu nanga yeye ben taki?
9 Na tori disi ben abi krakti na tapu dyu nanga proseliti fu ’ibri nâsi na ondro heymel’ na ini Yerusalem’ (2:5-13). Nanga fruwondru den ben aksi: ’Fa a du kon taki ibri wan fu wi e yere na tongo fu en mma di meki en?’ A ben kan de den tongo fu presi leki Mediya (owstusey fu Yudeya), Frigiya (na ini Pikin-Asiya), nanga Rome (na ini Europa). Di den disipri ben taki ini difrenti tongo „fu den bigi wroko fu Gado,” dan furu arkiman ben fruwondru, ma spotuman ben taki taki den ben drungu.
Petrus e gi kotoygi di e buweygi sma
10. Sortu profeytitori ben kon tru nanga na sani di psa na Penkstri 33 G.T., èn disi kan teki gersi nanga wan sani na ini wi ten?
10 Petrus ben bigin fu gi kotoygi fu di a ben sori taki neygi yuru mmanten ben fruku tumusi fu drungu (2:14-21). Na presi fu dati, na tori disi ben de wan kontru fu na pramisi fu Gado fu kanti santa yeye na tapu en pipri. Nanga yepi fu santa yeye Gado ben gi Petrus krakti fu sori go na wi ten fu di a e kobroyki so srefi den wortu „na ini den kriboy dey” èn „den sa taki profeytitori” (Joèl 2:28-32). Yehovah ben sa gi wondru na ini heymel nanga marki na grontapu bifo en bigi dey ben kon, èn soso den wan di ben sa kari en nen na ini bribi ben sa kisi frulusu. So wan sortu kanti fu na santa yeye ini na ten disi na tapu salfuwan, meki den man fu „taki profeytitori” na wan tumusi krakti fasi èn bekwaam fasi.
11. San den dyu ben du na ini na tori fu Yeyses èn san Gado ben du?
11 Moro fara Petrus ben meki den kon sabi na Mesiyas (2:22-28). Gado ben sori taki Yeyses ben de a Mesiyas fu di a ben teki en fu du krakti wroko, marki nanga wondru (Hebrew sma 2:3, 4). Ma den dyu ben meki den spikri en na wan postu „nanga yepi fu kruktudu man”, Rome sma di no ben gi yesi na Gado wèt.’ Den ben gi Yeyses abra akruderi na raybosroyti di ben teki nanga na sabi di Gado sabi sani a fesi’ na a fasi taki disi ben de na wani fu Gado. Ma Gado ben opo Yeyses baka, èn a ben teki na libisma skin fu en puru na so wan fasi taki a no ben ondrofeni pori.—Psalm 16:8-11.
12. San David ben si na fesi, èn fu san na kisi fu frulusu e anga?
12 Krakti ben poti moro fara na tapu den profeytitori fu na Mesiyas omoro Petrus ben go doro fu gi kotoygi (2:29-36). A ben taki, taki David ben si na opobaka na fesi fu en moro gran manpikin, Yeyses na Mesiyas. Komoto fu wan moro hey posisi na a reti-anusey fu Gado na ini heymel, Yeyses ben kanti na santa yeye di a ben kisi fu en Tata (Psalm 110:1). Den arkiman fu Petrus, ’ben si èn ben yere’ fa a santa yeye ben e wroko fu di den ben e si tongo neleki di fu faya na tapu den ede fu den disipri èn ben e yere den freymde tongo di den ben taki. A ben sori tu taki frulusu e anga fu na erken di sma e erken Yeyses leki Masra èn Mesiyas.—Rome sma 10:9; Filipi sma 2:9-11.
Yehovah e gi na gro
13. (a) San dyu nanga proselit sma ben musu erken fu kisi wan yoysti dopu? (b) Omeni sma ben kisi dopu, èn san ben de na bakapisi fu dati na ini Yerusalem?
13 Fa den wortu fu Petrus ben abi bun bakapisi! (2:37-42) Disi ben wroko hebi tapu na ati fu den arkiman fu en, taki den ben agri nanga a kiri di den ben kiri na Mesiyas. Fu dati-ede meki a ben taki nanga tranga: „Abi berow, èn meki ibri wan fu unu teki dopu ini na nen fu Yeyses Krestes fu kisi pardon fu unu sondu, èn unu sa kisi na fri presenti fu na santa yeye.” Dyu nanga proseliti ben erken Yehovah kba leki den Gado èn taki den abi en yeye fanowdu. Now den ben musu sori berow èn teki Yeyses leki na Mesiyas fu ben kan teki dopu ini na nen (ini erkenning fu na posisi ofu wroko) fu na Tata, na Manpikin nanga na santa yeye (Mat. 28:19, 20). Fu di Petrus ben gi kotoygi na den dyu nanga den proseliti dati, meki a ben kobroyki na fosi sroto na yeye fasi di Yeyses ben gi en fu opo na doro fu sabi nanga okasi gi dyu di ben e bribi, fu go na ini na heymel Kownukondre (Mateyus 16:19). Na a wan dey dati 3000 sma ben teki dopu! Prakseri den furu kotoygi dati fu Yehovah di ben e preyki na ini na pikin kontren fu Yerusalem!
14. Fu san-ede èn na sortu fasi den bribiman ben „abi ala sani makandra”?
14 Furu sma di ben komoto fu farawe presi no ben abi nofo sani fu tan langa drape, ma ben wani sote fu leri moro fu na nyun bribi fu den èn ben wani preyki gi trawan. Fu dati-ede den fositen bakaman fu Yeyses ben yepi makandra na wan lobi fasi neleki fa Yehovah Kotoygi e du na ini na ten disi (2:43-47). Fu wan pisiten, bribiman ben abi „ala sani makandra”. Sonwan ben seri den gudu fu den èn san den ben kisi fu dati den ben prati gi iniwan sma di ben de ini nowtu. Disi ben gi na gemeente wan tumusi bun bigin ala di ’Yehovah ben poti aladey na tapu a den mindri, den wan di ben kisi frulusu.’
Wan sma di kon gosontu nanga a bakapisi fu dati
15. San ben psa di Petrus nanga Yohanes ben go na ini na tenpri, èn fa den sma ben du na tapu dati?
15 Yehovah ben horibaka gi den bakaman fu Yeyses nanga yepi fu „marki” (3:1-10). Sobun di Petrus nanga Yohanes ben kon na ini na tenpri wan ten fu 3 yuru bakadina, gi na yuru fu begi di ben abi fu du nanga na neti-ofrandi, wan man di ben malengri fu sensi en mma ben meki en ben sidon na a Moy Portu e aksi „presenti fu sari-ati.” ’Solfru nanga gowtu mi no abi,’ Petrus ben taki, ’ma san mi abi mi e gi yu: Ini na nen fu Yeyses na Nasaret sma, waka!’ Na man ben kon gosontu wantewante! Di a ben go na ini na tenpri, „ala di a ben e waka èn ben e dyonpo èn ben e prèyse Gado”, dan sma ben ’furu nanga bigi prisiri.’ Kande sonwan ben memre den wortu: „Na malengriwan sa kren neleki wan dia.” — Yesaya 35:6.
16. Fa den apostru ben man fu dresi wan malengri man?
16 Den sma di ben de nanga opo mofo, ben kon makandra na ini na gadri fu Salomow di ben abi postu na ala tu sey, wan gadri nanga postu di ben tapu, na a owstusey fu na tenpri (3:11-18). A ben sori taki Gado ben gi den apostru makti fu dresi na malengriman nanga yepi fu En glori Futuboy, Yeyses (Yesaya 52:13–53:12) Den dyu no ben erken „na santa nanga regtfardikiwan”; ma, Yehovah ben opo en baka fu dede. Ala di na pipri nanga den tiriman fu den no ben sabi taki den ben e kiri na Mesiyas, toku na so fasi Gado ben meki den profeyti wortu kon tru taki „en Krestes ben sa nyan pina”.—Danièl 9:26.
17. (a) San den dyu ben musu du? (b) San psa sensi den seni ’Krestes kon’ na ini wi ten?
17 Fu di den ben handri so nanga na Mesiyas, meki Petrus ben sori san den dyu ben musu du (3:19-26). Den ben musu fu „abi berow”, ofu ben musu firi sari fu den sondu, èn „dray baka”, ofu dray den libi, èn teki wan tra fasi fu libi. Efu den ben oefen bribi na ini Yeyses leki na Mesiyas, èn ben teki na frulusu-ofrandi, dan den ben sa kisi kowru-ati fu Yehovah leki den wan di kisi pardon fu den sondu (Rome sma 5:6-11). Den ben memre dyu taki den ben de manpikin fu na frubontu di Gado ben meki nanga den fositen tta, di a ben taygi Abraham: „Na ini yu siri ala nâsi fu grontapu seyker sa kisi blesi.” Fu dati-ede Gado ben seni en Mesiyas Futuboy na a fosi presi fu frulusu den dyu di ben abi berow. A moy fu si, taki sensi den ’seni Krestes kon’ na ini heymel Kownukondremakti na ini 1914, wan kon bun baka fu waarheid nanga teyokrasiya organisâsi di e gi kowru fu ati, ben kon a mindri Yehovah Kotoygi.—Genesis 12:3; 18:18; 22:18.
Den no ben sa stop!
18. Sortu „ston” den dyu „bow-man” ben trowe, èn na ini suma wwan frulusu de?
18 Fu di den ati ben bron taki Petrus nanga Yohanes ben meki na opobaka fu Yeyses bekenti, meki den granpristri, na tenpri edeman, nanga den Sadusey man, ben poti den na ini strafu-oso (4:1-12). Den Sadusey man no ben bribi ini na opobaka, ma furu trawan ben tron bribiman, soso den man wawan ben de so wan 5000. Di den ben aksi Yohanes nanga Petrus sani na fesi na moro hey krutubangi fu Yerusalem, Petrus ben taki, taki na malengriman ben kon betre „ini na nen fu Yeyses Krestes na Nasaret sma,” di den ben spikri na wan postu ma di ben kisi opobaka fu Gado. Na „ston” disi di den dyu „bow-man” ben trowe ben tron na „ede fu na uku” (Psalm 118:22). „Morofara”, Petrus ben taki, „na ini no wan tra sma frulusu de.”
19. Fa den apostru ben piki di den ben kisi na komando fu stòp nanga preyki?
19 Den ben pruberi fu stòp den tori disi (4:13-22). Fu di na man di ben kon betre ben de drape, meki den no ben man taki, taki na „marki disi di ben de aparti” no ben de so, ma den ben gi Petrus nanga Yohanes na komando ’fu no taki ofu leri na no wan presi tapu na gron fu na nen fu Yeyses.’ San den ben piki? ’Wi no kan stòp fu taki fu san wi si èn yere.’ Den ben gi yesi na Yehovah leki den Tiriman!
Gado ben yere den begi!
20. Fu san den disipri ben begi, èn san ben de na bakapisi?
20 Neleki fa Yehovah Kotoygi e begi na konmakandra, na so den disipri ben begi di den apostru, di ben kon fri, ben fruteri san ben psa nanga den (4:23-31). Den ben taki taki den tiriman Herodes Antipas nanga Pontiyus Pilatus, makandra nanga den hèyden fu Rome nanga den sma fu Israèl, ben konmakandra teyge na Mesiyas (Psalm 2:1, 2; Lukas 23:1-12). Leki piki tapu na begi, Yehovah ben furu den disipri nanga santa yeye, so taki den ben taki na wortu fu Gado fri èn sondro frede. Den no ben aksi na Tiriman fu den fu stòp na frufolgu, ma fu meki den man fu preyki fri èn sondro frede ala di frufolgu de.
21. Suma ben de Barnabas èn sortu eygifasi a ben abi?
21 Den bribiman ben tan abi ala sani makandra, èn no wan fu den ben de na ini nowtu (4:32-37). Wán man di ben gi bijdrage ben de na Lefiti man, Yosef fu Cyprus. Den apostru ben gi en tu na nyunman-nen Barnabas, san wani taki „Manpikin fu trowstu”, kande fu di a ben lobi yepi sma èn ben abi switi maniri. Seyker a de so taki wi alamala wani fu de netso wan sma.—Tori fu den Apostru 11:22-24.
Den leyman ben tyari kon na krin
22, 23. San ben de na sondu fu Ananiyas nanga Safira, èn fa wi kan nyanbun fu na ondrofenitori fu den?
22 Ma Ananiyas nanga en uma, Safira, ben tapu fu erken Yehovah leki den Tiriman (5:1-11). Den ben seri wan gron èn ben hori pikinso fu na moni na baka ala di den ben du neleki den ben gi ala na den apostru. Nanga a sabi di Petrus ben kisi fu Gado santa yeye meki a ben man fu si na hoygrifasi fu den, èn disi tyari den dede kon. Fa a de wan warskow gi den wan di Satan e kori fu de nanga triki!—Odo 3:32; 6:16-19.
23 Baka na sani disi di psa, no wan sma nanga takru buweygi fu ati ben abi na deki-ati fu kon moksi den srefi na den disipri. Ma trawan ben tron bribiman (5:12-16). Boyti fu dati fu di den sikiwan nanga den wan di ogri-yeye ben kwinsi, ben poti bribi ini na krakti fu Gado, meki ’alamala sondro fu puru wán, ben kon betre.’
Gi yesi na Gado moro leki libisma
24, 25. Fu san-ede den dyu tiriman ben frufolgu den apostru, ma sortu markitiki den kotrow-wan disi ben poti gi ala den futuboy fu Yehovah?
24 Na heypristri nanga den Saduseyman ben pruberi now fu gens na tumusi moy gro fu di den ben poti ala den apostru na ini strafu-oso (5:17-25). Ma na neti dati na engel fu Gado ben fri den. Èn di dey broko den ben e gi leri na ini na tenpri! Frufolgu no kan stòp den futuboy fu Yehovah.
25 Toku druk ben poti na tapu den apostru di den ben tyari den kon na fesi na Sanhedrin (5:26-42). Ma di den ben gi den na komando fu stòp gi leri, den ben taki: „ Wi musu gi yesi na Gado leki tiriman moro leki libisma”. Disi ben poti wan markitiki gi den disipri fu Yeyses, wan di den Kotoygi fu Yehovah na ini a ten disi e waka na en baka. Baka wan warskow fu na leriman fu Wèt, Gamaliyèl, den tiriman ben meki den fon den apostru, ben gi den na komando fu stòp nanga preyki, èn ben lusu den.
26. Fa wi kan teki na diniwroko fu den apostru gersi nanga di fu Yehovah Kotoygi na ini na ten disi?
26 Den apostru ben breyti taki den ben feni den warti fu kisi syen fu Yeyses nen ede. „Èn ibri dey sondro fu stòp den ben tan gi leri na ini na tenpri èn oso-fu-oso èn ben e meki na bun nyunsu bekenti.” Iya, den ben de oso-fu-oso preykiman. Na so den disiten Kotoygi fu Gado de, di ben kisi en yeye tu fu di den e gi yesi na en èn e taki, „Yehovah na wi Tiriman!”
Fa yu ben sa piki?
◻ Sortu ordru den fositen nanga den disiten bakaman fu Yeyses musu meki kon tru?
◻ San ben psa na tapu na dey fu Penkstri 33 G.T.?
◻ Oten èn fa Petrus ben kobroyki na fosi sroto na yeye fasi di Yeyses ben gi en?
◻ San wi kan leri fu na ondrofenitori fu Ananiyas nanga Safira?
◻ Sortu markitiki den apostru ben poti gi ala Kotoygi fu Yehovah, di den ben kisi na komando fu stòp nanga preyki?