Taki na wortoe foe Jehovah fri en sondro frede
„Now dan, Jehovah, . . . gi den srafoe foe joe dati den tan taki na wortoe foe joe fri en sondro frede”. — Tori foe den apostel 4:29
1, 2. (a) Sortoe belangstelling Jezus ben sori gi hen discipel baka di a opobaka foe dede en sortoe komando a ben gi den foe datede? (b) O fara den ben moe gi kotoigi?
ALADI na dede ben prati Jezus nanga hen discipel, den no ben frigiti na kari foe hen foe tron „fisiman foe libisoema”. Den ben sabi dati disi ben wani taki dati den ben moe meki na Wortoe foe Gado bekenti na mindri den libisoema. Ma fa den ben sa bigin foe wroko? Den ben abi tiri fanowdoe.
2 Leki wan bigi prisiri gi den discipel na Jezus di ben opobaka na dede ben kon sori hensrefi na wan toe okasi bifo a ben opo go na hen Tata (1 Kor. 15:3-8 ; Joh. 20:20). Na so fasi a ben kan gi den moro komando tapoe na tori foe na wroko di ben didon na den fesi. Ini Galiléa a ben taki:
„Ala makti ini hemel nanga grontapoe mi ben kisi. Go foe datede en meki discipel foe soema foe ala naatsi en dopoe den ini na nen foe na Tata en foe na Manpikin en foe na santa jeje, en leri den foe hori ala den sani di mi ben gi oenoe komando. En loekoe! mi de nanga oenoe te na a kaba foe na seti foe sani” (Matt. 28:18-20).
Na kristen wroko di ben de foe meki discipel, en dopoe en leri den, ben moe doe na mindri soema foe ala naatsi. Fa a ben de wan sani di ben gi dekati, dati na Jezus disi di ben opo komoto foe dede te nanga na kaba foe na seti foe sani ben sa de aladé nanga kristen-soema ini na kownoekondrewroko!
3. Sortoe prati na santa jeje ben abi sensi Pinksteren ini disi?
3 Jezus ben pramisi den discipel foe hen dati wan jepiman, na santa jeje ben sa kon (Joh. 14:16, 26). San disi ben sa wani taki, en fa na geest disi ben sa wroko? Let bifo Jezus ben opo go na hen Tata a ben taki gi den discipel dati:
„Joe sa kisi krakti te na santa jeje kon na joe tapoe, en joe sa de kotoigi foe mi ini Jeruzalem, en ini heri Judéa en Samaria en te na den moro farawe kondre foe grontapoe” (Tori foe den Apostel 1:8).
Fa disi ben de wan moro bigi kotoigiwroko di ben de na den fesi! Den discipel ben drai go na Jeruzalem baka en den ben horidoro drape ini begi. Na di foe féfi-tenti dé baka na opobaka foe Jezus ben de Pinksteren, en den discipel alamala ben kon tapoe wán presi makandra. Wantron wantron na babari ben de „leki foe wan krakti stéfi winti”, en disi ben go makandra nanga tra wondroe wroko. Jehovah ben kanti trowe hen santa jeje di Jezus ben pramisi, hen wroko krakti tapoe den. En foe doe san na santa jeje dati ben bewégi den? A ben tjari den so fara „foe taki . . .” — Tori foe den Apostel 2:1-4.
4. Fa den soema ben teki na boen njoensoe na a okasi dati?
4 Na ten ben kon now foe „fisi faja faja libisoema”. Nanga na jepi foe Gado santa jeje den discipel dati ben kan taki na wortoe foe Gado ini foeroe tongo. Na so fasi den soema di ben komoto foe foeroe presi foe grontapoe foe njan na Pinksterfesa, ben kan jere den e taki ini na égi tongo foe den foe den „bigi wroko foe Gado”. Den soema di ben si dati ben froewondroe troe troe. Dan Petrus ben opo tanapoe en ben gi wan verklaring foe disi. A ben gi kotoigi fini-fini foe na opobaka foe Jezus Kristus, aladi a ben gi tranga rai na den soema di ben de drape foe abi berouw en foe dopoe, foe den ben kan kisi jepi foe komoto foe na kron geslagti dati. Sortoe bakapisi disi ben abi? Dridoesoen soema ben teki na wortoe! Den disi ben kisi dopoe en ben tron wan pisi foe na kristen gemeente. En bigi prisiri ben de di „Jehovah ben poti na den mindri den soema di ala dé ben kisi jepi”. — Tori foe den Apostel 2:5-47.
5. (a) Nanga sortoe prakseri kristen soema e kon fesi rigeriman ini ten foe vervolgoe? (b) Sortoe dekati de na ini gi wi?
5 Na prékiwroko disi di na santa jeje ben jepi ben meki foeroe njoen soema kon di ben prijse Jehovah. Den disi foe den sé ben kolokoe pasa marki dati den ben kan go na doro en nanga jepi foe na publiki kotoigiwroko Jeruzalem ben kon foeroe nanga na „boen njoensoe”. Petrus nanga Johannes ben teki fesi ini na wroko disi en den ben gi den soema tranga foe drai baka, sodati den sondoe foe den figi poeroe en den ben kisi jeje kowroe-ati foe Jehovah. Foeroe foe den ben arki nanga prisiri na a boen njoensoe — ma no den hépriester, na edeman foe na tempel en den Saduccé-soema. Den ben kisi Petrus nanga Johannes en ben poti den ini doengroe-oso. Na so fasi den discipel ben bigin firi na ogri-ati di Jezus ben warskow den na fesi di a ben taki:
„Loekoe! Mi e seni oenoe leki skapoe na mindri foe tigri. Sori datede dati joe de voorzigti leki sneki en tog sondro fowtoe leki doifi. Loekoe boen nanga den soema, bikasi den sa gi joe abra na dan kroetoe en den sa krawasi joe ini den synagoge. Srefi foe mi ede den sa srepi joe go na fesi rigeriman nanga kownoe, den nanga den naatsi leki kotoigi. Ma te den e gi joe abra, no broko joe ede fa ofoe san joe sa taki, bikasi ini na joeroe dati joe sa kisi san joe sa taki; bikasi a no joe e taki wawan, ma na geest foe joe Tata e taki nanga joe” (Matt. 10:16-20).
Ma na a pisi ten dati, dan den „fisiman dati foe libisoema” ben kan prisiri foe foeroe soema di den ben kisi, so wan féfi-doesoen njoen bribiman. Fa den ben moe taki Jehovah tangi foe na kon moro foeroe disi foe soema! Ooktoe wi e kisi dekati nanga na dienstbericht foe den. — Tori foe den Apostel 4:1-4.
TAKI NA FESI FOE RIGERIMAN
6. (a) San Petrus nanga Johannes ben doe di den ben tjari den go na fesi den rigeriman? (b) Foe san ede den ben kisi sreka boen foe dati?
6 Na tra dé den rigeriman ben kon makandra, en den ben aksi Petrus nanga Johannes foe na activiteit foe den en ooktoe foe na dresi di den ben dresi wan malengri man. Djaso wan moi okasi ben de foe gi moro fara kotoigi. Soleki Jezus ben taki na fesi, dan na santa jeje ben gi Petrus now na krakti foe taki:
„Rigeriman foe na pipel en owroeman, efoe tide tapoe na gron foe wan boen wroko di ben doe gi wan sikiman, oenoe e aksi wi nanga jepi foe soema a ben kon betre, dan meki a de bekenti na oen alamala nanga na heri pipel foe Israël, dati ini na nen foe Jezus Kristus, na Nazareth-soema, di oenoe ben anga na wan postoe, ma di Gado ben opobaka foe dede — dati nanga jepi foe hen na man disi tanapoe fesi oenoe gosontoe. Disi de ’na ston, di oenoe, den basi, ben handri nanga hen leki a no abi waarde, ma di de na ede foe na oekoe’. Boiti dati, ini no wan tra soema jepi de, bikasi ondro hemel no wan tra nen ben gi na mindri den soema, sodati den kan kisi jepi foe libi” (Tori foe den Apostel 4:8-12).
Den toemsi prenspari waarheid ben moe meki bekenti! Den apostel ben taki foe datede fri. Den no ben hori noti na baka. Petrus nanga Johannes ben de eenvoudige fisiman, ma Jezus ben leri den foe taki tapoe wan dynamisch fasi en nanga vertrouw en overtoigi. Leki Kotoigi foe Jehovah den ben taki foedi den ben wani meki na wortoe foe Gado bekenti. — Loekoe Johannes 7:15-18, 45, 46.
7. San wi leri foe na tori foe Tori foe den Apostel 4 foe na denki nanga marki foe den vervolgoeman?
7 Fa wi kan de grantangi na Jehovah foe na tori ini Kapitel 4! Disi no wawan e sori fa opregti kristen moe taki nanga fri, ma na tori e sori ooktoe na kron prakseri foe grontapoe rigeriman di e gens na pipel foe Gado. Baka di den apostel ben gi na sondro frede kotoigi disi, den rigeriman ben seni den komoto ini na zaal foe na Sanhedrin, aladi den ben kroetoe nanga makandra. San den ben abi na prakseri? Den no ben kan taki dati wan wondroe marki no ben pasa ini na nen foe Jezus Kristus. Ma den ben kroetoe dati wan stop ben moe tjari kon na a panja foe na troe aanbegi. Den ben prakseri dati nanga tranga wortoe den ben kan tapoe skreki gi den apostel en ben kan tjari den so fara foe no taki moro ini na nen foe Jezus. — Tori foe den apostel 4:16, 17.
8. San e sori dati den discipel no ben frede?
8 Den kristen kotoigi foe Jehovah ben sa meki den tapoe den mofo nanga soso tranga wortoe? Meki troe kristen ini na ten disi poti prakseri tapoe na sondro frede eksempel foe den:
„Baka dati den (rigeriman) ben kari den en ben komanderi den foe no taki no wan presi wan sani ofoe leri tapoe na gron foe na nen foe Jezus. Ma Petrus nanga Johannes ben piki den: ’Oen kroetoe oensrefi efoe a de leti ini na ai foe Gado foe arki oenoe moro leki Gado. Ma foe wi sé, wi no kan tapoe foe taki foe den sani di wi ben si en jere’” (Tori foe den Apostel 4:18-20).
Foedi den ben frede san den soema ben prakseri, meki den rigeriman ben loesoe den apostel, baka di den ben taki tranga wortoe gi den.
MORO JEPI FOE JEHOVAH
9, 10. (a) San den dienstknegti foe Jehovah ben doe moro fara en sortoe tranga lostoe den ben abi? (b) San den ben aksi, en fa Gado ben jere na begi dati?
9 Baka di den ben loesoe den apostel den ben go baka na a gemeente. Den ben verteri den brada san ben pasa en dan na gemeente ben doe san kristen soema moesoe doe alaten ondro den sortoe omstandigheid disi. Den ben go na Jehovah ini begi. Ini den begi disi, di ben sori foe na bigi bribi di den ben abi ini Jehovah, den ben sori na tranga lostoe foe den foe tan dini Gado. Den ben taki:
„Soeverein Masra, joe de na Soema, di ben meki na hemel nanga na grontapoe nanga na se nanga ala sani di de na ini en di ben taki na fesi nanga jepi foe santa jeje nanga mofo foe wi fositen-tata David, na knegti foe joe: ’Foe san ede den naatsi de ini seki-seki en volkoe ben prakseri soso sani? Den kownoe foe grontapoe ben poti densrefi ini groepoe en den rigeriman kon moksi densrefi leki wan blok tegen Jehovah en tegen na salfoewan foe hen.’ Na so ooktoe ini disi foto, Herodes nanga Pontius Pilatus, makandra nanga den soema foe den naatsi nanga volkoe foe Israël ben kon makandra troe troe tegen joe santa dienstknegti Jezus, di joe ben salfoe, foe doe ala sani di joe anoe nanga rai ben poti kaba na fesi foe pasa. Now dan, Jehovah, poti prakseri tapoe den tranga wortoe foe den, en gi den srafoe foe joe dati den tan taki na wortoe foe joe fri en sondro frede, aladi joe e langa joe anoe foe meki soema gosontoe en aladi marki nanga wondroe e pasa nanga jepi foe na nen foe na santa dienstknegti foe joe Jezus.” — Tori foe den Apostel 4:24-30.
10 Den discipel no ben aksi ofoe den ben kan stop nanga na wroko ofoe dati den ben kan kon fri foe den tranga wortoe foe den féjanti foe na waarheid. Den ben sabi na komando foe den foe Jehovah — den ben moe de Kotoigi. A ben de na lostoe foe den ati foe ben tan taki na wortoe foe Gado fri en sondro frede, en den ben aksi hen ini disi foe jepi den. Den no ben sa brokosaka foe frede ede. Jehovah ben prisiri nanga na fasi disi? Na tori e verteri wi:
„Baka di den ben seni den begi foe den go na Gado, na presi pe den ben konmakandra ben seki, en den alamala sondro foe poeroe wan na mindri ben kon foeroe nanga santa jeje en den ben taki na wortoe foe Gado fri en sondro frede.” — Tori foe den Apostel 4:31.
11. (a) Sortoe bakapisi a ben abi dati den ben taki fri en sondro frede? (b) Foe san ede strafoe-oso no ben tjari den go so fara dati den ben stop nanga na wroko?
11 Den Kotoigi dati foe na Kownoekondre ben go doro nanga na wroko foe den nanga njoen krakti, en Jehovah ben de nanga den. „En moro bribiman ini Masra ben kon, bigi ipi foe mansoema nanga oemasoema” (Tori foe den Apostel 5:14). Leki wan bakapisi foe disi meki den kerki fesiman ben kon atibron agen en den ben trowe den apostel ini doengroe-oso. Ma a ben de na wani foe Jehovah, dati den ben sa go doro nanga na kotoigiwroko foe den ini Jeruzalem. Datede a ben seni den engel foe hen foe verloesoe den apostel en foe taigi den:
„Go dan, go tanapoe ini na tempel en tan taki ala wortoe foe na libi disi gi na volkoe” (Tori foe den Apostel 5:20).
Dati den ben trowe den apostel ini doengroe-oso, no ben meki den tapoe den mofo foe frede ede soleki den tranga wortoe foe den priester nanga rigeriman no ben tapoe den mofo.
12. Fa den apostel ben kan gi moro fara kotoigi fesi na kroetoe en den meki den tapoe skreki gi den?
12 Ma den skowtoe ben kisi den apostel agen en ben tjari den go na a Sanhedrin-zaal, pe den ben kon tanapoe na fesi foe wan hépriester di ati ben bron srefi-srefi, en di ben taki:
„Nanga tranga wi ben komanderi oenoe foe no go doro foe leri tapoe na gron foe na nen disi, en loekoe ete oenoe ben meki Jeruzalem kon foeroe nanga na leri foe oenoe, en oenoe abi na fasti bosroiti foe meki na broedoe foe na soema disi kon na wi tapoe.” (Tori foe den Apostel 5:28).
Den apostel ben sa lasi ati a fesi foe na kroetoe di no ben sori switifasi en pe skowtoe ben loekoe den en pe na hépriester ben taki nanga den tapoe wan krasi fasi? Nono.
„Petrus nanga den tra apostel ben piki: ’Wi moe arki moro na Gado leki rigeriman leki soema. Na Gado foe wi fositen papa ben opo Jezus na dede, di oenoe ben kiri foedi oenoe anga hen na wan oedoe. Hen Gado ben poti hé na hen reti-anoe leki na Moro Prenspari Fesiman nanga Jepiman foe gi Israël na okasi foe kisi berouw nanga pardon foe sondoe. En wi de kotoigi foe den sani disi, soleki na santa jeje, di Gado ben gi na den di e gi hen jesi leki tiriman.’” — Tori foe den Apostel 5:29-32.
13. Sortoe rai Gamaliël ben gi, en fa na kroetoe ben de nanga disi?
13 Agen wi kan de grantangi dati wi abi na tori ini na bijbel, foedi ini disi na kron prakseri foe den soema di e gens na wroko foe Gado e kon na krin. Aladi den apostel ben de boen soema, na kroetoe ben abi na prakseri foe ben kiri den. Ma na respeki wet-leriman Gamaliël ben opo tanapoe en a ben gi den kerki fesiman rai di ben fiti na a okasi dati. A ben taki:
„Oen man foe Israël, oen poti prakseri na oensrefi nanga san oenoe wani foe doe nanga den soema disi. Bifo den dé disi foe eksempel Theudas ben opo tanapoe en a ben taki dati a ben de wan soema, en wan toe man so wan fo hondro ben moksi densrefi nanga na groepoe foe hen. Ma den ben kiri hen en ala den soema di ben gi hen jesi ben panja en den tron noti. En ondro na omstandigheid foe now mi e taigi oenoe foe datede: no bemoei den soema disi, ma meki den doe den sani; (bikasi efoe na plan disi ofoe na wroko disi komoto foe libisoema, a sa kon a wan kaba; ma efoe a komoto foe Gado oenoe no sa man foe tjari hen kon na wan kaba;) noso kande sa kon na krin, dati oenoe de feti troe troe nanga Gado” (Tori foe den Apostel 5:34-39).
Den ben teki na koni rai disi foe Gamaliël afoe. Aladi den kerki fesiman no ben stop foe feti nanga Gado, tog den no ben kiri den apostel. Na presi foe dati den ben fon den, ben komanderi den foe no taki moro foe Jezus en meki den gwe. — Tori foe den Apostel 5:40.
DEKATI ONDRO TESI
14. Fa den kristen ben handri nanga dekati en nanga sortoe bakapisi?
14 Ala den sani disi ben skreki den apostel foe taki na wortoe foe Gado fri en sondro frede? Na tori e piki:
„Den dan ben komoto gwe foe na Sanhedrin, nanga prisiri dati den ben waarti foe ben njan sjen foe hen nen ede. En den ben tan sondro foe stop foe leri ibri dé ini na tempel en oso foe oso en foe meki na boen njoensoe foe Kristus, Jezus, bekenti” (Tori foe den Apostel 5:41, 42).
Nanga dekati den apostel en tra kristen ben de druk bezig foe meki na wortoe foe Gado bekenti en foe taki nanga fri en sondro frede en Jehovah ben blesi na wroko foe den.
„Na so na wortoe foe Gado ben tan gro, en na nomroe discipel ini Jeruzalem ben tan gro, en wan bigi ipi priester ben gi jesi na a bribi.” — Tori foe den Apostel 6:7.
15. San ben de wan toe foe den sani di Stéfanus ben taki fri en sondro frede, en fa den kerkiman ben doe?
15 Now di ooktoe priester ben drai densrefi en tron kristen, dan na gens foe na sé foe den tranga-ede kerki fesiman ben kon moro krakti. A no ben de langa ofoe na faja kotoigi Stéfanus ben moe frantwortoe hensrefi fesi na Sanhedrin. A ben gi wan krakti kotoigi, pe a ben gi wan overzicht foe na fasi fa Jehovah e meki hen prakseri kon troe. Ma den gensman ben lon go nanga atibron tapoe hen en ben ston hen kiri. A ben waka nanga Stéfanus leti so leki Jezus ben taki na fesi: „Na joeroe e kon pe ibri soema di e kiri joe, sa méne dati a de doe wan santa diniwroko gi Gado.” — Tori foe den Apostel 6:8-7:60; Joh. 16:2.
16. (a) San ben pasa baka dati nanga na tra pisi foe na kristen gemeente? (b) Fa den ben tanapoe nanga grontapoe goedoe?
16 Na pina-dede foe Stéfanus ben de na marki foe wan skwala foe bita vervolgoe.
„Tapoe na dé dati wan hebi vervolgoe ben kon tapoe na gemeente di ben de ini Jeruzalem; den alamala ben panja ini den presi foe Judéa nanga Samaria” (Tori foe den Apostel 8:1).
Ma disi ben sa tapoe na mofo foe Jehovah Kotoigi foe na ten dati? Troe troe a ben de wan njoen moeiti foe Satan foe stop den activiteit foe den dienstknegti foe Gado. Den ben moe libi na baka, oso nanga goedoe. Ma den ben abi na joisti loekoe tapoe goedoe na skinfasi. Ini disi den ben de leki den kristen di Paulus ben skrifi bakaten: „Joe ben sori sari gi den soema di ben de ini strafoe-oso, en di oenoe ben teki nanga prisiri na foefoeroe foe oenoe goedoe, aladi oenoe sabi dati oenoe srefi abi wan moro betre goedoe di e tan.” — Hebr. 10:34.
17, 18. (a) Fa wi e leri foe na fasi foe doe foe Filippus nanga tra kristen, di vervolgoe ben panja den, tapoe na fasi fa wi kan meki den methode foe Satan tron noti? (b) Sortoe blesi ben kon foe Jehovah?
17 Den discipel ben sabi dati den ben moe tan getrouw kotoigi foe Gado nanga Kristus krin krin. Datede meki „den soema di ben panja ben waka pasa na kondre en den ben meki na njoensoe foe na wortoe bekenti” (Tori foe den Apostel 8:4). Filippus ben go na a foto Samaria, pe a ben tan préki na wortoe fri en sondro frede en a ben gi den soema foeroe prisiri. A no ben de langa ofoe tra bribiman ben moksi densrefi na den, en wan boskopoe ben seni go na Jeruzalem foe verteri den Apostel dati Samaria ben teki na wortoe en na kristen gemeente ben kon de stéfi drape. — Tori foe den Apostel 8:5-8, 14-17, 25; 9:31.
18 Den kristen dati foe na fosi eeuw ben abi na joisti loekoe. Den ben begi ofoe Jehovah ben wani jepi den foe tan taki na wortoe foe Gado fri en sondro frede. Den ben doe disi ooktoe nanga na jepi foe hen jeje en a ben blesi den. Soleki na tori e taki, „na anoe foe Jehovah ben de nanga den”! — Tori foe den Apostel 11:19-21.
TAKI NOW FRI EN SONDRO FREDE
19. Sortoe bewijsi wi abi dati Jehovah Gado nanga Kristus ben de nanga den kristen Kotoigi ini na ten disi?
19 Ini ala den hondro hondro jari di pasa Jezus ben hori hen pramisi: „Mi de nanga joe ala dé te nanga na bosroiti foe na seti foe sani” (Matt. 28:20). Fa wi kan de grantangi, now di wi doro na ten, dati moro leki 2.000.000 kotoigi foe Jehovah ’e taki fri en sondro frede’! En na Gado foe den blesi na wroko foe den „fisiman disi foe libisoema”, dati „na boen njoensoe disi foe na kownoekondre” kon de bekenti tapoe ala presi foe grontapoe, srefi tapoe Antartica. A pasa go te na den farawe bergikondre en den pikin eilanti di didon ini den grontapoe-se (Matt. 24:14). Ja, na kotoigiwroko pasa go na ibri naatsi, „te na den moro farawe presi foe na grontapoe”, en ala disi doe kon nanga na jeje foe Jehovah. — Tori foe den Apostel 1:8; Zach. 4:6.
20. Fa Didibri ben sori na gens di a ben gens den soema di ben meki na Wortoe foe Gado bekenti en den vertegenwoordiger foe hen kan stop na wroko?
20 Soleki na Wortoe foe Gado ben taki na fesi, dan Didibri ati e bron, foedi a sabi dati na ten foe hen de sjatoe. A de tan gens na kotoigiwroko (Openb. 12:12, 17). Didibri nanga den soema foe hen no wani si Jehovah Kotoigi na ai, foedi den kristen disi „no de wan pisi foe grontapoe”. Foeroe foe den ben moe libi na oso foe den leki wan bakapisi foe vervolgoe. Hondro hondro foe den ben dede wan takroe dede, soleki Stéfanus ini na fosi eeuw foe wi teri (Openb. 17:6; 20:4). Ma a de krin dati na wroko kon foe Gado. Libisoema no ben kan stop hen, foedi troe srafoe foe Gado e tan taki na wortoe foe hen fri en sondro frede. Tapoe na fasi disi den ben meki den plan foe Didibri kon tron noti en den ben wini. — Loekoe Efese 6:11, 12; Jakobus 4:7; 1 Petr. 5:8, 9.
21. (a) Sortoe wroko Jehovah wani dati moe pasa now? (b) Foe san ede wi wani na wroko di wi kisi kon klari en fa wi kan taki na wortoe fri en sondro frede?
21 Ini na ten disi na wroko foe den Kownoekondre-„fisiman” e tan kon moro bigi, aladi na gens e kon moro krakti. En a de tan krin dati na blesi foe Jehovah de na tapoe. Soso ini na dienstjari di pasa Jehovah Kotoigi ben kan prisiri dati 113.672 njoen soema ben dopoe. Fa den disi ben kolokoe dati den ben kan abi wan prati ini na taki foe na Wortoe foe Jehovah! Disi de na wroko foe Gado gi wi ini na ten disi, en ala soema di ben gi densrefi abra na Jehovah, moe abi na tranga lostoe foe tan de druk bezig nanga disi, foedi a de na wroko di den kisi (1 Kor. 9:16). Na ati foe joe e bewégi joe foe taki na Wortoe foe Jehovah fri en sondro frede? O moro wi e si den toestand foe grontapoe e kon moro ogri, dan wi moe abi na fasti bosroiti foe tan préki na boen njoensoe foe na Kownoekondre te leki na wroko kon na wan kaba. Te gens e kon, meki wi no Iasi ati. Wi e tan prakseri dati na wroko di Jehovah ben gi Jezus foe doe, Jezus no ben bigin na wroko wawan, ma a ben kon klari nanga hen ooktoe (Joh. 17:4). A ben sreka wisrefi na fesi foe hori na prakseri na ogri-ati foe na grontapoe. Meki wi de alaten Ieki hen en leki den apostel en tra kristen foe na fosi eeuw, te wi, nanga na bribi, e soekoe Jehovah jepi foe doe hen wani tapoe wi. Meki na begi foe wi makandra de alaten: „Now dan. Jehovah, . . . gi den srafoe foe joe dati den tan taki na wortoe foe joe fri en sondro frede.” — Tori foe den Apostel 4:29.